Magmakontento sa Kolor sa Imong Panit

● Para sa ubang taga-Africa, Southern Asia, Caribbean, ug Middle East, kon puti kag panit dato ka ug sosyal tan-awon. Tungod niana, daghang lalaki ug babaye niining mga lugara ang naggamit ug mga produktong makapaputi—ugaling lang nadaot ang panglawas sa ubang naggamit niana.

Ang ubang pangpaputi dunay hydroquinone. Tungod niini nga kemikal, ang mga selula sa panit dili na mopatunghag melanin. Tungod niana, ang panit wala na kaayoy natural nga proteksiyon batok sa makadaot nga radyasyon sa adlaw. Ang hydroquinone mosuhop sa panit ug magpahinabog permanenteng kadaot sa mga tissue nga nagkonektar sa lainlaing bahin sa lawas. Ang resulta mao ang sayo nga pagpangunot sa panit. Lagmit makakanser usab ang maong kemikal. Ang ubang losyon duna usay mercury, nga makahilong substansiya.

Kon kanunayng gamiton ang maong mga produkto, ang panit mamula, matalumtom, ug monipis pag-ayo ug lisod tahion kon masamad. Ug kon ang ubang kemikal niining maong mga produkto mosagol sa dugo, mahimong madaot ang atay, kidney, utok, o uban pang organo.

Samtang ang ubang itomong mga tawo gustong magpaputi, daghan usab nga puting mga tawo ang ganahan kaayong magpaitom. Hinuon, ang igong gidugayon sa pagpainit sa adlaw makapahimsog ug makatabang aron ang panit mopatunghag bitamina D. Apan ang dugayng pagbulad sa adlaw, ilabina sa udtong tutok, makadaot sa panit. Sa tinuod lang, ang na-sunburn nga panit nagpaila nga kana nadaot ug kana maoy natural nga reaksiyon sa panit aron mapanalipdan sa makadaot nga radyasyon sa adlaw. Apan dili igo ang maong proteksiyon. Pananglitan, ang pagka-sunburn sa puti nga panit nagpasabot nga nakunhoran ang depensa sa panit. Tinuod, makatabang ang kanunayng paggamit ug losyon nga proteksiyon sa adlaw, apan dili kini bug-os nga makapanalipod sa panit batok sa pipila ka matang sa kanser, lakip na sa melanoma.

Busa, ang World Health Organization nag-awhag “nga ang matag usa magmakontento sa kolor sa iyang panit,” kay “hinungdanon kini aron mapanalipdan kita sa kadaot sa sobrang pagkaladlad sa adlaw.” Hinunoa, kadtong tinuod nga mga maalamon angayng magpadapat sa tambag sa Bibliya bahin sa pagpatahom sa ilang “natago nga pagkatawo sa kasingkasing,” kay dili sama sa panit nga madaot pagkatigulang, kini mahimo pang mouswag paglabay sa panahon!—1 Pedro 3:3, 4; Proverbio 16:31.