Pagpaniid sa Kalibotan

Ang sulat ni Papa Benedict XVI sa mga obispo nag-ingon: “Gikinahanglan gayod . . . nga mareporma ang United Nations Organization ug ang internasyonal nga mga institusyon sa ekonomiya ug pamatigayon aron matuman ang mga plano sa mga nasod sa tibuok kalibotan.”—L’OSSERVATORE ROMANO; italiko ilaha.

“Usa sa tulo ka taga-Ukraine nanigarilyo ug mga usa ka pakete matag adlaw.”—EXPRESS, UKRAINE.

Sa United States, 44 porsiyento sa mga lalaking tin-edyer nga gisurbi miingon nga “nakakita na sila diha sa Internet o sa cellphone ug labing menos usa ka hulagway sa ilang klasmet nga babaye nga naghubo.”—TIME, U.S.A.

“Kinagrabehan sa Tibuok Kasaysayan”

Ang nagakahitabo karon nga gubat, hulaw, kagubot sa politika, kamahal sa palaliton, ug kakabos mao ang “kinagrabehan sa tibuok kasaysayan,” miingon ang Associated Press. Kapin na sa usa ka bilyon ang gigutom karon sa tibuok kalibotan. Si Josette Sheeran sa UN World Food Program miingon, “ang nasod nga daghag gigutom maoy peligrosong nasod. . . . Tulo lang ang posibleng mahitabo sa tawong walay makaon: Makigrayot, molangyaw, o mamatay. Bisan hain niini, wala gayoy maayo.” Dugang pa, mas nagkadaghan ang mga tawong gigutom kay sa populasyon sa tibuok kalibotan. Bisan sa datong mga nasod, ang gidaghanon sa mga tawo nga kulag pagkaon misaka ug 15.4 porsiyento.

Mga Kaayohan Kon Magbasa Una Matulog

Sa dihang basahan sa ginikanan ang ilang anak sa dili pa matulog, labaw pa ang mahimo niana kay sa basta pagpakatulog sa bata. Ang mga tigdukiduki miingon nga maugmad niana ang katakos sa bata sa pagsulti, maingon man sa paglihok pinaagi sa paggunit sa libro ug sa pagpakli sa mga panid niana, ug mohait ang ilang memorya. “Apan labaw sa tanan, . . . panahon kana aron mas masuod ang ginikanan ug anak,” miingon ang mantalaang The Guardian. “Bation usab sa bata nga makalingaw ang pagbasa.” Si Propesor Barry Zuckerman, nga maoy nanguna sa maong panukiduki, miingon, “ganahan kaayog libro ang bata tungod kay mao kanay ginabasa kaniya sa iyang minahal sa kinabuhi.”

Pinangga nga Baka Mas Daghag Gatas

“Ang baka nga may ngalan mas daghag gatas,” miingon ang usa ka siyentista sa Newcastle University sa England. Gani, kon atimanon pag-ayo ang matag baka, modaghan ug mga 280 ka litro ang gatas nga iyang ipatungha matag tuig. Ngano? “Sama nga ang tawo ganahan kon hatagag maayong pagtagad, ang mga baka usab malipay ug mas relaks kon hatagag atensiyon,” miingon si Dr. Catherine Douglas sa School of Agriculture, Food and Rural Development sa maong unibersidad. “Sa wala pa namo kini matun-i, dugay nang nahibalo niini ang mapinanggaong mga tigbuhig hayop,” siya miingon. “Ang paghatag kanilag atensiyon, sama sa pagtawag kanila sa ilang ngalan, o ang kanunayng pagpakig-estorya kanila samtang nagdako, makatabang kanila ug makapatungha pa gyod ug daghang gatas.”