● Ang mga lampinig maoy batid nga mga inhenyero. Ngano man?

Hunahunaa: Sila maghimo ug magmentinar ug balay nga daghag lawaklawak pinaagig talagsaong papel, nga sila mismo ang maghimo. * Sila manguhag lanotlanot gikan sa mga tanom ug mga patayng kahoy—troso, koral, poste, ug uban pa. Dayon ila kining usapon, ug dugangag hagkot nga laway nga tugob sa protina. Sa dihang ipapilit, kini mouga nga mahimong gaan, lig-on, ug hunit nga papel. Dugang pa, ang laway dunay talagsaong substansiya nga magpaarang sa papel sa pagsuhop ug pagtaganag kainit, sa ingon mamentinar ang hustong temperatura diha sa ilang itloganan sa dihang bugnaw ang panahon.

Ang mga lampinig maghimog balay gamit lang ang ilang baba. Ang ilang nagamang balay dili masuphag tubig ug punog lawaklawak nga pormag hexagon (sayis kantos). Tungod sa pormang hexagon, walay luna nga mausik ug makapalig-on pa gyod kini sa balay. Ang mga lampinig nga nagpuyo sa umogong mga lugar mogamit ug daghang laway sa paghimog balay aron mas dili kini masuphag tubig. Dugang pa, mopili silag lugar nga makasalipod sa ilang himoong balay ug diha nila ibitay ang ilang balay. Ang mga lampinig dili makadaot sa kalikopan—dili sama sa mga pabrika sa papel nga naghugaw sa hangin, tubig, ug yuta!

Busa gitun-an sa mga arkitekto ug tigpanukiduki ang balay sa lampinig aron makaimbentog mas maayong materyales nga gaan, lig-on, lubay, ug dili makadaot sa kalikopan.

Unsay imong hunahuna? Ang lampinig nga ang utok samag gidak-on sa duha ka lugas sa balas sulagma bang nahibalo sa paghimog papel ug sa iyang balay? O ang katakos ba niini sa pagka-inhenyero nagpakita nga dunay nagdisenyo sa lampinig?

[Footnote]