SA LAWOM nga kagabhion diha sa tunga sa desyerto, ang sand cat mogawas sa lungag ug unya mohunong. Siya maniid ug mamati, ug dayon mohinok paglakaw sa kabalasan.

Sa kalit lang, ambakan sa iring ang walay-kalibotang tukbonon—ang gerbil, nga kamatang sa ilaga. Human makatukob, mangita siyag laing tukbonon sa tibuok gabii nga moambak panalagsa sa pagdakop ug tukbonon. Kon makadakop siyag daghan nga dili niya mahurot ug kaon, iya kining tabonag balas. Dayon sayo sa buntag, mobalik siya sa iyang lungag nga halos walay gawas-gawas sa tibuok adlaw. Aniay laing makapainteres nga impormasyon bahin niining idlas nga mananap:

• Ang sand cat hait ug pangdungog mao nga iyang matultolan ang iyang tukbonon bisag anaa pa sa ilalom sa balas

• Sa dihang mangitag kaparis, ang laki mopagawas ug taliis nga tingog. Kay ang baye hait ug pangdungog, madungog niya ang panawag sa laki bisag layo

• Sanglit bagag balhibo ang lapa-lapa sa sand cat, ang iyang tiil dili malubong ug dili maunsa bisag grabe ka init o ka bugnaw ang balas

•  Ang sulod sa iyang dunggan dunay baga, puting mga balhibo nga panampong sa balas

• Ang tunob sa sand cat halos dili makita tungod sa baga nga balhibo sa iyang lapa-lapa

• Ang sand cat makapabiling buhi sa tubig nga iyang makuha gikan sa iyang matukob

• Ang kainiton sa balas sa Kara-Kum Desert moabot ug 80 grado Celsius. Usahay ang temperatura mous-os ug -25 grado Celsius