Kada adlaw, kapin sa 20 ka sundalo kanhi sa United States maghikog. Kada bulan, mga 950 ka beterano nga ginaatiman sa Department of Veterans Affairs sa U.S.A. mosulay paghikog.

“Halos 50 porsiyento sa mga babaye nga wala pay 30 anyos gikan sa probinsiya nga nanarbaho sa siyudad namabdos una pa makasal—daghan kaayo kini kon itandi sa gidaghanon sa [Insek nga] mga inahan sa miaging henerasyon nga wala makasal,” nagreport ang China Daily. Dugang pa, ang mga Insek daw “dili na kaayo supak sa . . . pagpuyo-puyo.”

Mibalik na usab sa Greece ang malarya, sakit nga halos nawagtang na niining nasora niadtong 1974. Ang problema sa ekonomiya ug gipakunhorang badyet para sa serbisyo medikal mao kunoy hinungdan niini.

Gipakita sa usa ka surbi nga bisan pag dako na kaayog kausaban ang tinamdan sa mga tawo, 74 porsiyento sa mga gisurbi gusto gihapon nga ang ilang ginikanan maoy magpili sa ilang minyoan imbes silay mopili. Dugang pa, 89 porsiyento gustong moipon ug puyo dili lang uban sa ilang mga ginikanan ug mga igsoon kondili sa mga paryente usab.

“Ang [Katolikong] Simbahan huyang na diha sa adunahang Europe ug sa America. Ang atong kultura karaan na, ang atong mga simbahan dagko, ang atong mga kombento walay sulod ug ang pagpalakaw sa Simbahan dili maayo, ang atong mga rituwal ug ang mga besti sa kadagkoan luho kaayo. . . . Ang Simbahan nabiyaan nag 200 ka tuig.”—Interbiyo sa Katolikong kardinal nga si Carlo Maria Martini, nga gipatik sa Corriere della Sera human siya mamatay.