Ang paghikog gitawag nga “permanenteng solusyon sa usa ka temporaryong problema.” Bisag lisod tuohan, ang makapaguol nga kahimtang—bisan kanang daw wala na kay mahimo—lagmit temporaryo lang. Sa pagkatinuod, mahimong moarang-arang ang imong kahimtang.—Basaha ang kahon nga  “Ang Ilang Situwasyon Nausab.”

Bisag dili kana mahitabo, mas maayong atubangon lang nimo ang imong mga problema matag adlaw. Si Jesus miingon: “Ayaw gayod kamo kabalaka bahin sa sunod nga adlaw, kay ang sunod nga adlaw adunay iyang kaugalingong mga kabalaka. Igo na sa matag adlaw ang iyang kaugalingong pagkadaotan.”—Mateo 6:34.

Apan komosta kon ang imong kahimtang dili mausab? Pananglitan, duna kay sakit nga dili na matambalan. O kaha, naguol ka tungod kay nabungkag ang inyong kaminyoon o namatyan kag minahal?

Bisan sa mga situwasyon nga sama niini, duna kay mausab: ang imong panglantaw sa situwasyon. Kon makakat-on ka sa pagdawat sa mga kahimtang nga dili nimo mausab, tingali mahimong positibo ang imong panglantaw niana. (Proverbio 15:15) Mangita sab kag mga paagi sa pagsagubang sa situwasyon imbes maghunahuna dayon nga kamatayon ray solusyon. Ang resulta? Anam-anam nimong makontrolar ang usa ka situwasyon nga sa imong tan-aw wala na kay mahimo.—Job 2:10.

HINUMDOMI KINI: Ang bukid dili masaka sa usa lang ka tikang, pero mahimo kining anam-anamon pagsaka. Ingon pod niana ang pagsagubang sa kadaghanang problema bisag unsa pa kana ka dako.

ANG IMONG MAHIMO KARON: Ipakigsulti ang imong kahimtang, tingali sa usa ka higala o membro sa pamilya. Siya lagmit makatabang kanimo sa pagbaton ug mas timbang nga panglantaw sa imong situwasyon.—Proverbio 11:14.