Nganong nagtuo kag ebolusyon kaniadto?

Bisag nagdako ko nga Katoliko, may mga pagduhaduha ko bahin sa Diyos. Pananglitan, dili ako makatuo ug Diyos nga magsunog ug mga tawo sa impiyerno. Busa sa gitudloan ko sa akong mga propesor sa unibersidad nga ang buhing mga butang mitungha pinaagig ebolusyon ug wala lalanga sa Diyos, mituo ako niana, nga naghunahuna nga gisuportahan kinig ebidensiya. Gawas pa, ang akong relihiyon nagtuo nga gigiyahan sa Diyos ang ebolusyon.

Unsay nakapainteres nimo sa Bibliya?

Ang akong asawa nga si Susana nagtuon sa Bibliya uban sa mga Saksi ni Jehova, kinsa nagpakita kaniya gikan sa Bibliya nga ang Diyos dili magsakit ug tawo diha sa impiyerno. * Ilang gipakita usab kaniya ang saad sa Diyos nga ang atong planeta himoong paraiso. * Sa kataposan, nakakaplag ra gyod kamig pagtulon-an nga katuohan! Sa 1989, usa ka Saksi nga ginganlag Nick miduaw kanako. Sa among panaghisgot bahin sa lawas sa tawo ug sa sinugdanan niini, nainteres ko sa simpleng pangatarongan sa Bibliya diha sa Hebreohanon 3:4, nga nag-ingon nga “ang matag balay adunay nagtukod, apan siya nga nagtukod sa tanang butang mao ang Diyos.”

Ang imo bang pagtuon bahin sa lawas sa tawo nakatabang nimo sa pagtuo sa paglalang?

Oo. Pananglitan, ang katakos sa atong lawas sa pag-ayo rag iya maayo kaayong pagkadisenyo. Ang proseso sa pag-ayo sa samad, pananglitan, dunay upat ka hugna, ug kini nagpahinumdom kanako nga ingong surgeon, igo ra akong nagtabang sa sistema sa lawas sa pag-ayo rag iya.

Unsa diay mahitabo kon masamdan ang atong lawas?

Sa pipila lang ka segundos, mosugod dayon ang unang hugna sa  mga proseso nga gidisenyo sa pagpatang-on sa dugo. Kini nga mga proseso komplikado ug epektibo kaayo. Dugang pa, makaingon ko nga ang mga plumbing engineer tingali nasina gyod sa atong circulatory system, nga dunay mga 100,000 kilometros nga kaugatan, kay kini may katakos sa pagsampong sa mga buslot ug sa pag-ayo rag iya.

Unsay nalangkit sa ikaduhang hugna sa proseso sa pag-ayo?

Sulod sa pipila ka oras motang-on ang pagdugo ug mosugod paghubag ang samad. Ang paghubag naglakip ug hugna-hugna nga proseso nga katingalahan kaayo. Una, ang kaugatan, nga sa primero mikupos aron mapugngan ang kusog nga pagdugo, karon moburot. Kini moburot aron daghang dugo ang makaagos diha sa parte nga dunay samad. Dayon, tungod sa pluwido nga kargadog protina, ang nasamdan nga parte mohubag. Ang maong pluwido hinungdanon sa pagkontra sa impeksiyon, pagpalasaw sa mga hilo, ug pagtangtang sa nadaot nga tisyu. Ang matag hugna nagkinahanglag produksiyon sa minilyon ka linaing molekula ug selula pinaagig hugna-hugna nga mga proseso. Ang uban niini nga mga proseso magpasugod sa sunod nga hugna, ug dayon kini mohunong.

Sa unsang paagi magpadayon ang proseso sa pag-ayo?

Sulod sa pipila ka adlaw, ang atong lawas magpagawas ug mga materyales sa pagpang-ayo, usa ka proseso nga nagpakita nga magsugod na ang ikatulong hugna nga abtag mga duha ka semana. Ang mga selula nga mopormag lanot-lanot mopaingon sa samad ug modaghan. Ang gigming nga kaugatan manurok ug manubo paingon sa samad, diin didto ilang kuhaon ang hugaw ug magsuplay ug dugang sustansiya panahon sa proseso sa pagtangtang ug pag-ayo. Sa laing komplikadong hugna-hugna nga mga proseso, mogawas ang linaing mga selula nga magpapikot sa samad.

Pagkadaghan niana nga obra! Unsa ka dugay mahuman ang proseso sa pag-ayo?

Ang kataposang hugna, nga mao ang pagpasig-uli, moabot ug mga bulan. Ang bali nga mga bukog mapasig-uli sa orihinal nga kalig-on, ug ang mga lanot-lanot nga sa sinugdan gihanig diha sa samad pulihag mas lig-ong materyales. Sa katibuk-an, ang proseso sa pag-ayo maoy katingalahang pananglitan sa maayo kaayong sistema sa pagtinabangay.

May mahinumdoman ka bang situwasyon nga nakapatingala nimo?

Oo. May pasyente ko nga 16 anyos nga dalagita nga naaksidente sa sakyanan. Ang iyang kondisyon kritikal kay ang iyang spleen nasisi ug siya nag-internal bleeding. Kaniadto, operasyon dayon ang among solusyon aron sa pagtahi o pagtangtang sa spleen. Apan karon, ang mga doktor mosalig sa katakos sa lawas sa pag-ayo rag iya. Ang ako lang gihimo mao ang pagtambal sa iyang impeksiyon, kakulang sa pluwido sa lawas, anemya, ug kangutngot sa samad. Paglabayg pipila ka semana, nakita sa scan nga ang iyang spleen naayo na! Nahingangha gyod ko sa katakos sa lawas sa pag-ayo rag iya. Ug karon kombinsido na ko nga dunay Diyos nga nagdisenyo kanato.

Unsay nakapadani nimo sa mga Saksi ni Jehova?

Nakita nako nga sila mahigalaon, ug ang ilang tubag sa akong mga pangutana direkta sa Bibliya. Nakadayeg sab ko sa ilang kaisog sa pagpaambit sa ilang pagtuo ug sa pagtabang sa uban sa pagkakat-on bahin sa Diyos.

Ang imo bang pagkahimong Saksi ni Jehova nakatabang sa imong trabaho?

Oo. Kini nakatabang gyod nako sa pagsagubang sa compassion fatigue, usa ka matang sa kalapoy sa emosyon nga sagad makaapektar sa mga doktor ug nars nga kanunayng mag-atubang ug mga masakiton o nasamdan. Ug sa dihang ang mga pasyente gustong makig-estorya, ikasaysay nako kanila ang saad sa atong Maglalalang sa pagwagtang sa tanang sakit ug pag-antos * ug sa pagpatunghag usa ka kalibotan diin wala nay moingon, “Ako masakiton.” *