ANG rekord sa Bibliya sa Genesis 22:6 nag-ingon nga dihang nangandam sa pagtanyag ug halad sa layo nga dapit, si Abraham nagkuha ug “sugnod alang sa halad-nga-sinunog ug gipapas-an kini kang Isaac nga iyang anak ug gidala niya ang kalayo ug ang kutsilyo nga pang-ihaw, ug silang duha nagkuyog paglakaw.”

Wala maghisgot ang Kasulatan kon sa unsang paagi sila maghaling kaniadto. Mahitungod niini nga rekord, labing menos usa ka komentarista nagtuo nga “imposibleng dili mapalong [ang kalayo] sa dugay nga biyahe” ni Abraham ug Isaac. Busa, lagmit ang gitumong niini mao ang galamiton nga gikinahanglan aron madala ang kalayo.

Bisan pa niana, ang uban moingon nga sa kapanahonan sa Bibliya dili sayon ang paghaling. Kon posible, mas sayon alang kanila ang pagpangayog baga sa silingan imbes maghaling. Busa daghang eskolar ang nagtuo nga si Abraham nagdala ug sudlanan—tingali usa ka kulon nga gitaorag kadena—nga dunay baga nga gikuha gikan sa dapog. (Isa. 30:14) Ang baga nga gidala niining paagiha daling makapasiga sa uga nga kahoy matag higayon nga mopahulay sila.