Alerto si apostol Pablo sa kapeligrohan sa propaganda ni Satanas, pero dili ingon niana ang tanan niyang isigka-Kristohanon. Pananglitan, ang pipila sa Corinto dayag nga sobrang nagsalig sa kaugalingon​—nga naghunahunang sila lig-on kaayo nga dili na mapukan. (1 Cor. 10:12) Mao nga gihatag ni Pablo kini nga pasidaan: “Ako nahadlok nga sa unsa mang paagi, ingon nga ang halas nagdaldal kang Eva pinaagi sa lipatlipat niini, basin ug ang inyong kaisipan pagapahisalaagon gikan sa katim-os ug kaputli nga angay kang Kristo.”​—2 Cor. 11:3.

Ang kinasingkasing nga kabalaka ni Pablo nagpakita nga dili maayong mokompiyansa. Kon gusto nimong masuklan ang pag-atake sa imong hunahuna ug magmadaogon niana, kinahanglang sayron nimo ang kapeligrohan sa propaganda ug panalipdan ang imong kaugalingon batok niini.

Unsa ang propaganda? Niini nga konteksto, nagtumong kana sa paggamit ug mapihigon o malimbongong impormasyon aron kontrolahon ang hunahuna ug lihok sa mga tawo. Ang pipila nag-ingon nga ang propaganda sama ra sa “pagpamakak, pagtuis, panglimbong, pagmaniobra, pagkontrolar sa hunahuna, [ug] pag-impluwensiya sa hunahuna” ug nalangkit sa “mga taktika nga dili subay sa maayong pamatasan, makadaot, ug dili patas.”​—Propaganda and Persuasion.

Unsa ka peligroso ang propaganda? Kini malimbongon​—sama sa usa ka dili makita, walay baho, makahilo nga gas—​ug kini mosulod sa atong kaisipan. Kay dili man nato daling mailhan ang propaganda, ang eksperto sa panggawi nga si Vance Packard miingon: “Daghan kanato ang naimpluwensiyahan ug  nakontrolar niini​—nga wala nato mamatikdi.” Ubos sa impluwensiya niini, matod sa usa ka eskolar, ang mga tawo “dali rang madaldal sa paghimog peligroso kaayong mga buhat”​—sama sa ‘pagpuo sa rasa, gubat, grabeng diskriminasyon, relihiyosong pagpihig ug uban pang matang sa binuang nga mga buhat.’​—Easily Led​—A History of Propaganda.

Karon kon malimbongan ta sa propaganda sa mga tawo, unsa pa kaha sa propaganda ni Satanas? Iyang gitun-an ang kinaiya sa tawo sukad sa sinugdan sa paglalang sa tawo. “Ang tibuok kalibotan” karon anaa sa iyang gahom. Magamit niya ang bisan unsang bahin niini sa pagpakaylap sa iyang mga bakak. (1 Juan 5:19; Juan 8:44) Milampos si Satanas sa ‘pagbuta sa hunahuna sa mga tawo’ kay karon siya “nagpahisalaag sa tibuok gipuy-ang yuta.” (2 Cor. 4:4; Pin. 12:9) Sa unsang paagi masuklan nimo ang iyang propaganda?

Gihatag ni Jesus kining simpleng paagi sa pagsukol sa propaganda: “Kamo mahibalo sa kamatuoran, ug ang kamatuoran magpagawas kaninyo.” (Juan 8:31, 32) Sama sa usa ka sundalo diha sa panggubatan, nagkinahanglan kag tuboran sa kasaligang impormasyon aron dili ka malimbongan sa kaaway. Gitagana kini ni Jehova. Sa Bibliya, makita nimo ang tanan nimong gikinahanglan sa pagsukol sa propaganda ni Satanas.​—2 Tim. 3:16, 17.

Siyempre, nahibalo niana ang banggiitang tigpropaganda, si Satanas. Mao nga gigamit niya ang iyang sistema sa mga butang aron dili ka ganahang magbasa ug magtuon sa Bibliya. Ayawg pailad sa iyang mga pamaagi! (Efe. 6:11) Paningkamot nga “bug-os [nimong] masabtan” ang kamatuoran. (Efe. 3:18) Nagkinahanglan kanag panlimbasog. Apan hinumdomi kining simpleng kamatuoran nga gihisgotan sa awtor nga si Noam Chomsky: “Walay mobubo sa kamatuoran diha sa imong hunahuna. Kinahanglang ikaw mismo ang mangita niini.” Busa ‘pangitaa kini’ pinaagi sa makugihong ‘pagsusi sa Kasulatan sa adlaw-adlaw.’​—Buh. 17:11.

Hinumdomi nga dili gusto ni Satanas nga makahunahuna kag tarong o matimbangtimbang pag-ayo ang mga butang. Ngano? Kay matod sa usa ka reperensiya, ang propaganda “lagmit mas epektibo kon ang mga tawo . . . dili na pahunahunaon pag-ayo.” (Media and Society in the Twentieth Century) Busa ayawg  tuo dayon sa imong madungog. (Prov. 14:15) Gamita ang imong hinatag sa Diyos nga katakos sa panghunahuna ug gahom sa pagpangatarongan aron masayran nimo ang kamatuoran.​—Prov. 2:10-15; Roma 12:1, 2.

Ang tighimog estratehiya sa gubat mogamit tingalig propaganda aron ang usa mawad-ag pagsalig sa kaugalingon ug mosurender. Lagmit iyang ipahinabo nga ang mga sundalo mag-unayg away o limbongan sila aron mobulag sa grupo. Matod pa, usa ka German nga heneral ang miangkon nga usa ka rason sa kapildihan sa Gubat sa Kalibotan I mao nga ang mga tawo “nadani sa propaganda sa kaaway sama sa koneho nga nalamat sa bitin.” Si Satanas naggamit ug susamang mga taktika. Pananglitan, ipahinabo niya nga dili magkasinabtanay ang mga Kristohanon o kaha hayloon sila sa pagbulag sa organisasyon ni Jehova tungod sa kahiubos o sa gituohang inhustisya.

Ayawg palimbong! Magpagiya sa Pulong sa Diyos. Pananglitan, maylabot sa pagpatunhay sa panaghiusa uban sa mga igsoon, ang Bibliya nagdasig kanimo sa pagpadayon sa pagpasaylo sa usag usa nga kinabubut-on ug sa paghusay dayon sa dili pagsinabtanay. (Col. 3:13, 14; Mat. 5:23, 24) Kini puwersadong nagpasidaan kanato batok sa pagpalain sa atong kaugalingon o pagbulag sa kongregasyon. (Prov. 18:1) Susiha kon lig-on ba ang imong depensa batok sa propaganda ni Satanas. Pangutan-a ang kaugalingon: ‘Unsay nagdominar sa akong hunahuna dihang nakaatubang ko niini nga situwasyon? Ang espiritu ba sa kalibotan o ang espiritu sa Diyos?’​—Gal. 5:16-26; Efe. 2:2, 3.

Ang usa ka sundalo nga mihuyang ang pagsalig ngadto sa iyang lider dili makasukol pag-ayo. Mao nga sulayan sa mga tigpropaganda nga pahuyangon ang pagsalig sa sundalo ngadto sa iyang komander. Tingali mogamit silag propaganda sama sa: “Dili kasaligan ang inyong mga lider!” ug “Ipameligro lang mo nila!” Aron mahimong mas epektibo kini nga mga pag-atake, mataktikanhon tingali nilang gamiton ang mga sayop nga lagmit nahimo niana nga mga lider. Gibuhat kana ni Satanas. Dili siya mohunong sa pagpahuyang sa imong pagsalig sa pagpanguna nga gitagana ni Jehova.

 Unsay imong depensa? Magmaunongon sa organisasyon ni Jehova ug matinumanong paluyohi ang pagpanguna nga iyang gitagana​—bisag motungha pa ang pagkadili-hingpit. (1 Tes. 5:12, 13) Ayaw kamo ‘pagkatay-og sa inyong pangatarongan’ dihang mag-atubang ug makadaot nga pag-atake sa mga apostata o sa ubang tiglimbong sa hunahuna​—bisan pag morag katuohan ang ilang akusasyon. (2 Tes. 2:2; Tito 1:10) Sunda ang tambag nga gihatag ngadto sa batan-ong si Timoteo. Magpabilin sa kamatuoran nga imong nakat-onan, ug hinumdomi kon diin nimo kini makat-oni. (2 Tim. 3:14, 15) Oo, dunay daghang ebidensiya nga nagpakitang makasalig ka sa galamiton nga gigamit ni Jehova sa duolag 100 ka tuig sa paggiya kanato diha sa dalan sa kamatuoran.​—Mat. 24:45-47; Heb. 13:7, 17.

Apan, hinumdomi nga usahay dayag ang propaganda ni Satanas. May mga higayon nga mogamit siyag pagpanghulga​—“usa sa labing karaan nga matang sa propaganda.” (Easily Led​—A History of Propaganda) Pananglitan, gidominar sa mga Asiryanhon ang ilang mga kaaway pinaagi sa “pagpanghulga uban sa usa ka propaganda,” misulat ang British nga propesor nga si Philip M. Taylor. Si Satanas mogamit ug kahadlok sa tawo, kahadlok sa paglutos, kahadlok sa kamatayon, ug uban pang matang sa negatibong kahadlok aron madominar ka ug mohunong sa pag-alagad kang Jehova.​—Isa. 8:12; Jer. 42:11; Heb. 2:15.

Ayawg tugoti nga gamiton ni Satanas ang kahadlok sa pagpahuyang sa imong pagsalig o sa pagbungkag sa imong integridad. Si Jesus miingon: “Ayaw kahadlok niadtong mopatay sa lawas ug human niini dili na makahimo sa pagbuhat ug bisan unsa pa.” (Luc. 12:4) Pagbaton ug bug-os nga pagsalig sa saad ni Jehova nga panalipdan ka, hatagan kag “gahom nga labaw sa kasarangan,” ug tabangan ka nga makasukol sa bisan unsang panghulga.​—2 Cor. 4:7-9; 1 Ped. 3:14.

Siyempre, makaatubang ka tingalig makahahadlok ug makapahugno nga mga panghitabo. Pero hinumdomi ang pagdasig ni Jehova kang Josue: “Magmaisogon ug magmakusganon ka. Ayaw kakurat o kalisang, kay si Jehova nga imong Diyos magauban kanimo bisan diin ka moadto.” (Jos. 1:9) Kon mabalaka ka, iampo dayon kana kang Jehova. Makaseguro ka nga “ang kalinaw sa Diyos . . . magbantay sa [imong] kasingkasing ug sa [imong] gahom sa pangisip” aron makasukol ka sa tanang propaganda ni Satanas.​—Filip. 4:6, 7, 13.

Nahinumdoman ba nimo ang propaganda nga gigamit sa mensahero sa Asirya, ang Rabsake, batok sa katawhan sa Diyos? Sama rag miingon siya, ‘Walay makapanalipod kaninyo batok sa Asirya. Bisag ang inyong Diyos, si Jehova, walay mahimo alang kaninyo.’ Mapangahason siyang miingon: ‘Si Jehova mismo ang nagsugo namo nga laglagon kining nasora.’ Unsay tubag ni Jehova? “Ayaw kahadlok tungod sa mga pulong nga imong nadungog nga gisulting mapasipalahon sa mga tig-alagad sa hari sa Asirya labot kanako.” (2 Hari 18:22-25; 19:6) Dayon, iyang gipadala ang usa ka anghel kinsa mipatay ug 185,000 ka Asiryanhon sa usa lang ka gabii!​—2 Hari 19:35.

Nakatan-aw ka na bag salida diin klaro kaayo nimong nakita nga may karakter nga gilimbongan ug gimaniobra? Nakaingon ka ba sa imong hunahuna: ‘Ayawg tuo ana! Namakak nâ sila!’ Karon, handurawa nga gisinggit sa mga anghel kanang susamang mensahe kanimo: “Ayawg palimbong sa mga bakak ni Satanas!”

Busa, ayawg paminawa ang propaganda ni Satanas. (Prov. 26:24, 25) Pamati kang Jehova ug salig kaniya sa tanan nimong buhaton. (Prov. 3:5-7) Sunda ang iyang mahigugmaong hangyo: “Magmaalamon, anak ko, ug lipaya ang akong kasingkasing.” (Prov. 27:11) Pinaagi niana, masuklan nimo ang pag-atake sa imong hunahuna!