1. Nganong makabenepisyo ta sa paghisgot sa Salmo 15:​1-5?

 SA MIAGING artikulo, atong nakat-onan nga kadtong magpahinungod sa ilang kinabuhi kang Jehova ug padayong makigsuod kaniya puwedeng mahimong dinapit sa iyang simbolikong tolda. Pero unsay mga kuwalipikasyon aron dawaton ta ni Jehova ingong iyang mga higala? Naay giingon ang Salmo 15 bahin niini. (Basaha ang Salmo 15:​1-5.) Kini nga salmo naay praktikal nga mga leksiyon nga makatabang nato nga mas masuod sa Diyos.

2. Unsa tingali ang naa sa hunahuna ni salmistang David sa dihang naghisgot siya bahin sa tolda ni Jehova?

² Ang unang bersikulo sa Salmo 15 nag-ingon: “Oh Jehova, kinsa man ang mahimong dinapit sa imong tolda? Kinsa man ang makapuyo sa imong balaang bukid?” (Sal. 15:1) Sa dihang gihisgotan ni salmistang David ang “tolda” ni Jehova, naa tingali sa iyang hunahuna ang tabernakulo nga temporaryong naa sa Gabaon niadtong panahona. Naghisgot pod si David sa “balaang bukid” sa Diyos nga nagtumong tingali sa Zion sa Jerusalem ug nahimutang daghang kilometro gikan sa Gabaon. Niini nga bukid, si David nagpatindog ug tolda diin gibutang ang kaban sa pakigsaad hangtod nga natukod ang templo.—2 Sam. 6:17.

3. Nganong angay tang mainteres sa Salmo 15? (Tan-awa sab ang hulagway.)

³ Tinuod, dili tanang Israelinhon ang gitugotan nga mag-alagad sa tabernakulo, ug pipila lang ang puwedeng mosulod sa tolda diin gibutang ang kaban sa pakigsaad. Pero ang tanang matinumanong mga alagad ni Jehova puwedeng mahimong dinapit sa iyang simbolikong tolda kon naa silay suod nga relasyon kaniya ug magpabilin nga iyang higala. Mao gyod nay atong gipangandoy. Ang Salmo 15 naghisgot ug pipila ka hiyas nga kinahanglan natong ugmaron ug ipakita aron padayon tang mahimong higala ni Jehova.

 MAGKINABUHI NGA WALAY IKASAWAY UG BUHATA KON UNSAY MATARONG

4. Nganong nahibalo ta nga dili lang igo ang pagpabawtismo aron mahimong higala ni Jehova? (Isaias 48:1)

⁴ Ang Salmo 15:2 nag-ingon nga ang higala sa Diyos maoy “usa nga nagkinabuhi nga walay ikasaway, [nga] nagabuhat kon unsay matarong.” Ang mga pulong nga “nagkinabuhi” ug “nagabuhat” nagpakita nga kinahanglang padayon nato ning himoon imbes kay kausa lang. Pero kaya ba gyod natong ‘magkinabuhi nga walay ikasaway’? Oo. Bisag dili ta perpekto, isipon ta ni Jehova nga nagkinabuhi nga walay ikasaway kon himoon nato ang atong maarangan nga sundon siya. Ang pagpahinungod sa atong kaugalingon sa Diyos ug pagpabawtismo maoy sinugdanan pa lang. Matikdi nga sa panahon sa Bibliya, ang pagkahimong sakop sa nasod sa Israel wala magpasabot nga ang usa awtomatikong mahimong dinapit sa tolda ni Jehova. Tungod na kay ang uban nila nagtawag kaniya pero dili sa “kamatuoran ug pagkamatarong.” (Basaha ang Isaias 48:1.) Busa ang usa ka Israelinhon nga gusto gyong mahimong higala ni Jehova kinahanglang mokat-on bahin sa Iyang mga balaod ug mosunod niana. Sa samang paagi, aron madawat nato ang pag-uyon sa Diyos, dili lang igo ang pagpabawtismo ug pagkahimong Saksi ni Jehova. Kinahanglang padayon natong ‘buhaton kon unsay matarong.’ Unsay gipasabot niana?

5. Unsay gipasabot sa pagkahimong masinugtanon kang Jehova sa tanang butang?

⁵ Para kang Jehova, ang ‘pagkinabuhi nga walay ikasaway’ ug ‘pagbuhat kon unsay matarong’ wala magpasabot nga igo na ang regular nga pagtambong sa mga tigom. (1 Sam. 15:22) Kinahanglang maningkamot ta nga magmasinugtanon sa Diyos sa tanang bahin sa atong kinabuhi, bisan sa dihang nag-inusara ta. (Prov. 3:6; Eccl. 12:​13, 14) Importante nga sundon nato si Jehova bisan sa ginagmay nga mga butang. Kon himoon nato na, atong gipakita nga  gimahal nato siya ug mas masuod ta kaniya.—Juan 14:23; 1 Juan 5:3.

6. Base sa Hebreohanon 6:​10-12, unsay mas importante kay sa maayong mga buhat nga atong gihimo kaniadto?

⁶ Giapresyar pag-ayo ni Jehova ang atong mga nahimo para niya. Pero ang ato bang maayong mga nahimo kaniadto mao ray basehan aron magpabilin tang dinapit sa tolda ni Jehova? Dili. Giklaro ni sa Hebreohanon 6:​10-12. (Basaha.) Si Jehova dili malimot sa atong maayong mga gihimo kaniadto. Pero gusto niya nga padayon nato siyang simbahon nga kinasingkasing “hangtod sa kataposan.” Mahimo nato siyang higala hangtod sa hangtod “kon dili ta moundang.”—Gal. 6:​9, footnote.

MOSULTI SA KAMATUORAN DIHA SA KASINGKASING

7. Unsay gipasabot sa pagsulti sa kamatuoran diha sa kasingkasing?

⁷ Kadtong gusto nga mahimong dinapit sa tolda ni Jehova kinahanglang “nagasulti sa kamatuoran diha sa iyang kasingkasing.” (Sal. 15:2) Wala lang ni basta magpasabot nga dili ta mamakak. Gusto ni Jehova nga magmatinud-anon ta sa tanang bahin sa atong kinabuhi. (Heb. 13:18) Importante na, “kay gidumtan ni Jehova ang tawong limbongan, apan makigsuod Siya sa matul-id.”—Prov. 3:32.

8. Unsa nga buhat ang kinahanglan natong likayan?

⁸ Kadtong ‘nagasulti sa kamatuoran diha sa ilang kasingkasing’ dili magpakaaron-ingnon nga masinugtanon sa Diyos, pero sa tago nagsupak diay sa iyang mga balaod. (Isa. 29:13) Likayan nila nga mahimong salingkapaw o limbongan. Ang limbongan nga tawo tingali magsugod sa pagduhaduha kon makahatag bag kaayohan ang pipila ka sugo ni Jehova. (Sant. 1:​5-8) Supakon tingali niya ang mga sugo ni Jehova nga para niya dili ra importante. Dayon kon wala ray dili maayong resulta sa iyang pagsupak, tingali maaghat siya nga supakon pod ang ubang balaod sa Diyos ug tungod ana ang iyang pagsimba mahimong salingkapaw. (Eccl. 8:11) Pero dili nato na gustong himoon kay gusto natong magmatinud-anon sa tanang butang.

9. Unsay atong makat-onan sa unang panagkita ni Jesus ug Natanael? (Tan-awa sab ang hulagway.)

⁹ Importante gyod nga naa tay matinud-anon nga kasingkasing. Makita nato ni sa  dihang gipailaila ni Felipe ang iyang higala nga si Natanael ngadto kang Jesus. Bisag kadto ang unang higayon nga nakita ni Jesus si Natanael, siya miingon: “Ania, usa ka maayong Israelinhon nga dili manglimbong.” (Juan 1:47) Siyempre nahibalo si Jesus nga matinud-anon ang uban niyang mga tinun-an, pero nakita niya nga talagsaon gyod ang pagkamatinud-anon ni Natanael. Dili hingpit si Natanael parehas nato. Pero walay pagpakaaron-ingnon kaniya; matinud-anon siya sa tanang butang. Nakadayeg si Jesus tungod niana ug gikomendahan siya. Nindot gyod kon mao pod nay masulti ni Jesus bahin kanato!

10. Nganong angay tang mag-amping sa atong isulti? (Santiago 1:26)

¹⁰ Ang kadaghanan sa gihisgotan sa Salmo 15 maoy bahin sa atong pagtratar sa uban. Ang Salmo 15:3 nag-ingon nga ang usa ka dinapit sa tolda ni Jehova ‘wala magbutangbutang pinaagi sa iyang dila, wala maghimog daotan sa iyang isigkatawo, ug wala mangdaot sa iyang mga higala.’ Kon dili ta mag-amping sa atong isulti, mahimong madaot nato ang uban ug puwede tang mawad-an sa pag-uyon ni Jehova.—Basaha ang Santiago 1:26.

11. Unsa ang pagbutangbutang, ug unsay himoon ngadto sa mga tigbutangbutang nga dili mahinulsolon?

¹¹ Ang salmista espesipikong naghisgot bahin sa pagbutangbutang. Unsa ang pagbutangbutang? Kini maoy bakak nga mga estorya nga makadaot sa reputasyon sa usa ka tawo. Kon ang usa nagbutangbutang sa uban ug dili maghinulsol, mapalagpot siya gikan sa Kristohanong kongregasyon.—Jer. 17:10.

12-13. Unsang mga situwasyon nga dili tingali ta kabantay nga nangdaot na ta sa uban? (Tan-awa sab ang hulagway.)

¹² Gipahinumdoman pod ta sa Salmo 15:3 nga ang mga dinapit ni Jehova dili maghimog daotan sa ilang isigkatawo ug dili mangdaot sa ilang mga higala. Unsaon nato ni pagpadapat?

 ¹³ Likayan nato ang pagsultig negatibo bahin sa uban. Kon dili ta mag-amping niining bahina, basin makapangdaot ta sa uban nga dili ta kabantay. Hunahunaa ni nga mga pananglitan: (1) usa ka sister miundang sa pagpayunir, (2) naay magtiayon nga wala na mag-alagad sa Bethel, o (3) ang usa ka brader dili na ansiyano o ministeryal nga alagad. Dili gyod maayo nga maghimohimo tag estorya kon nganong nausab ang ilang kahimtang ug ipanabi ni ngadto sa uban. Hinumdomi nga naa tingali maayong mga rason sa maong mga kausaban nga wala nato mahibaloi. Hinumdomi pod nga ang usa ka dinapit sa tolda ni Jehova dili angayng ‘mohimog daotan sa iyang isigkatawo, ug dili mangdaot sa iyang mga higala.’

PASIDUNGGI KADTONG MGA NAHADLOK KANG JEHOVA

14. Unsaon nato pagkahibalo kon kinsa ang “talamayon” nga angay natong likayan?

¹⁴ Ang Salmo 15:4 nag-ingon nga ang higala ni Jehova “nagasalikway kang bisan kinsa nga talamayon.” Unsaon nato pagkahibalo nga ang usa talamayon? Kay dili ta hingpit, dili ta kuwalipikado nga mohukom kon kinsay talamayon. Tungod na kay naa tay tendensiya nga makigsuod lang niadtong mga tawo nga atong ganahan ug likayan kadtong dili nato ganahan. Maong angay natong hinumdoman nga kadto lang giisip ni Jehova nga “talamayon” ang atong isalikway. (1 Cor. 5:11) Apil ani kadtong mga nagabuhat ug daotan nga wala maghinulsol, nagasupak sa atong tinuohan, o kadtong naningkamot nga pahuyangon ang atong espirituwalidad.—Prov. 13:20.

15. Unsay usa ka paagi nga atong mapasidunggan kadtong mga “nahadlok kang Jehova”?

¹⁵ Dugang pa, ang Salmo 15:4 nag-ingon nga pasidunggan nato kadtong mga “nahadlok kang Jehova.” Busa mangita tag mga paagi nga makapakitag kaayo ug pagtahod sa mga higala ni Jehova. (Roma 12:10) Ang usa ka paagi nga gihisgotan sa Salmo 15:4 mao ang ‘pagtuman sa atong saad,’ bisan pag usahay lisod kining himoon. Kon dili ta motuman sa atong mga saad, mapasakitan nato ang uban. (Mat. 5:37) Pananglitan, gidahom ni Jehova nga ang iyang mga dinapit motuman sa ilang panaad sa kaminyoon. Malipay pod siya kon ang mga ginikanan maningkamot nga motuman sa ilang gisulti sa ilang mga anak. Ang atong gugma sa Diyos ug sa isigkatawo magpalihok kanato nga tumanon ang atong mga saad kutob sa mahimo.

16. Unsa pay laing paagi nga mapasidunggan nato ang mga higala ni Jehova?

¹⁶ Mapasidunggan sab nato ang mga higala sa Diyos kon abiabihon nato sila ug magmahinatagon ta. (Roma 12:13) Kon mogahin tag panahon sa atong mga igsoon diha sa mga tapoktapok o lingawlingaw, dili lang panahon sa mga tigom ug ministeryo, mas masuod ta nila ug kang Jehova. Dugang pa kon maabiabihon ta, atong gisundog si Jehova.

AYAW HIGUGMAA ANG KUWARTA

17. Nganong ang Salmo 15 naghisgot bahin sa kuwarta?

¹⁷ Mabasa nato nga ang dinapit ni Jehova “wala magapahulam sa iyang salapi nga may tubo, ug siya wala magadawat ug hiphip batok sa mga inosente.” (Sal. 15:5) Nganong giapil niini nga salmo ang paghisgot bahin sa kuwarta? Kay kon dili balanse ang atong panglantaw sa kuwarta, mahimong mapasakitan nato ang uban ug madaot ang atong relasyon sa Diyos. (1 Tim. 6:10) Sa panahon sa Bibliya, ang uban namentaha sa ilang mga igsoon nga pobre pinaagi sa pagpautang nga may tubo. Ang ubang maghuhukom midawat ug hiphip ug gihukman  ang mga inosente sa dili patas nga paagi. Ang maong mga buhat gidumtan ni Jehova.—Ezeq. 22:12.

18. Unsang mga pangutana ang makatabang nato nga masusi ang atong panglantaw bahin sa kuwarta? (Hebreohanon 13:5)

¹⁸ Maayo nga susihon nato ang atong panglantaw bahin sa kuwarta. Pangutan-a ang kaugalingon: ‘Magsige ba kog hunahunag kuwarta ug kon unsay akong mapalit? Kon manghulam kog kuwarta, dugay ba kong mobayad, nga maghunahuna nga dili pa ni kinahanglan sa nagpahulam? Kon daghan kog kuwarta, mobati ba ko nga mas labaw sa uban ug malisdan nga mohatag? Naghunahuna ba ko nga materyalistiko ang mga igsoon tungod lang kay kuwartahan sila? Sa mga dato lang ba ko makigsuod ug dili kaayo makig-uban sa mga pobre?’ Dako kaayo natong pribilehiyo nga nahimong dinapit ni Jehova. Kon dili nato higugmaon ang kuwarta, magpabilin tang dinapit ni Jehova ug dili gyod ta niya biyaan!—Basaha ang Hebreohanon 13:5.

GIMAHAL NI JEHOVA ANG IYANG MGA HIGALA

19. Unsa ang pangunang rason kon nganong gipasulat ni Jehova ang Salmo 15?

¹⁹ Ang kataposang bersikulo sa Salmo 15 naghisgot niini nga saad: “Bisan kinsa nga nagabuhat niining mga butanga dili gyod matarog.” (Sal. 15:5) Dinhi, gipakita sa salmista ang pangunang rason kon nganong gipasulat ni Jehova kini nga salmo. Gusto sa Diyos nga magmalipayon ta, maong naghatag siyag giya nga moresultag kaayohan ug proteksiyon para nato.—Isa. 48:17.

20. Unsay madahom sa mga dinapit ni Jehova?

²⁰ Ang mga dinapit ni Jehova makalaom ug nindot kaayo nga kaugmaon. Ang mga dinihogan magpuyo sa langit diin “dunay daghang puloy-anan” nga giandam ni Jesus para nila. (Juan 14:2) Kadtong naay paglaom nga mabuhi sa yuta makalaom sa katumanan sa giingon sa Pinadayag 21:3. Dako gyod kaayo nga pribilehiyo nga gidapit ta ni Jehova nga mahimong iyang higala ug mopuyo sa iyang tolda hangtod sa hangtod!