Mga Magmamantala sa Gingharian Nagtaho

“Daghan Kaayo Mo ug Nahibaloan Bahin sa Bibliya”

SA DIHANG ang 12-anyos nga si Jesus maisogong misulti sa relihiyosong mga lider sa Jerusalem, “kadtong tanan nga nagapamati kaniya padayong nahibulong sa iyang pagsabot ug sa iyang mga tubag.” (Lucas 2:47) Mao usab karon, daghang batan-ong mga alagad ni Jehova nagmaisogon sa pagsulti sa ilang mga magtutudlo ug mga kauban sa tunghaan bahin sa Diyos ug sa Bibliya, ug kasagaran sila nakasinati usab ug magantihong mga resulta.

Si Tiffany, edad 14, diha sa usa ka klase diin ang panaghisgot nagpunting sa tagna sa Bibliya bahin sa 70 ka semana sa mga tuig, nga makaplagan diha sa Daniel 9:24-27. Ang magtutudlo mihatag ug pipila ka impormasyon bahin sa mga bersikulo ug daklit nga naghisgot sa maong ulohan.

Sa sinugdan, si Tiffany nagpanuko sa pag-isa sa iyang kamot. “Apan sa usa ka hinungdan,” matod niya, “nahasol gayod ako nga ang mga bersikulo wala ikapatin-aw sa bug-os. Ug sa kalit lang, giisa nako ang akong kamot.” Natingala ang magtutudlo nga may estudyanteng dunay ikasulti bahin sa ulohan, sanglit kadaghanan sa mga estudyante nalisdan sa pagsabot niana.

Gihatagag higayon sa pagsaysay sa tagna, si Tiffany mitindog ug misulti dihadiha. Pagkahuman niya, hilom kaayo ang klasehanan. Medyo ginerbiyos si Tiffany. Dayon mipakpak ug dugay ang klase.

“Dalayegon kaayo kana, Tiffany, dalayegon kaayo,” balikbalik nga sulti sa magtutudlo. Giangkon niya nga nahibalo siyang dunay labaw pang gipasabot ang maong mga bersikulo, apan si Tiffany mao ang unang nakasaysay niini kaniya nga tin-aw kaayo. Pagkahuman sa klase, gipangutana niya si Tiffany kon nganong daghan siyag nahibaloan sa Bibliya.

“Tungod kini kay ako usa sa mga Saksi ni Jehova,” tubag niya. “Kinahanglang ipatin-aw sa akong mga ginikanan kanako sa makadaghan ang maong tagna una nako masabti kini.”

Ang mga klasmet natingala usab sa iyang kahibalo sa Bibliya. Usa ka estudyante miingon kang Tiffany: “Nahibalo na ko kon nganong kamong mga Saksi ni Jehova mamalaybalay; tungod kay daghan kaayo mo ug nahibaloan bahin sa Bibliya.” Ang uban misaad nga dili na gayod sila magbugalbugal kaniya tungod sa iyang gituohan.

Sa dihang gisugilon ni Tiffany sa iyang mga ginikanan ang iyang eksperyensiya, misugyot sila nga itanyag niya sa iyang magtutudlo ang librong Kahibalo nga Motultol sa Kinabuhing Walay Kataposan. Sa dihang gitanyag niya kini ug gipakita sa magtutudlo ang bahin nga nagsaysay sa tagna ni Daniel, gidawat dayon niya ang libro ug nagpasalamat kaniya.

Sa pagkatinuod, sa dihang ang Kristohanong mga batan-on maisogong mosulti kon unsay gitudlo sa ilang mga ginikanan kanila bahin sa Diyos ug sa Bibliya, moresulta kini sa kadayeganan ug pasidungog kang Jehova ug panalangin alang kanila.—Mateo 21:15, 16.