Patalinghogi ang Matagnaong Pulong sa Diyos
Patalinghogi ang Matagnaong Pulong sa Diyos
‘Atong nabatonan ang matagnaong pulong nga nahimong labi pang tino; ug nagabuhat kamo ug maayo sa pagtagad niini.’—2 PEDRO 1:19.
1, 2. Unsang pananglitan sa mini nga mesiyas ang imong mahisgotan?
SA DAGHANG siglo, naningkamot ang mini nga mga mesiyas sa pagpanagna sa umaabot. Sa ikalimang siglo K.P., usa ka tawo nga nagngalan sa iyang kaugalingon nga si Moises nagpatuo sa mga Hudiyo sa isla sa Creta nga siya mao ang mesiyas ug magluwas kanila gikan sa pagdaogdaog. Sa gitakda nga adlaw sa ilang kaluwasan, ilang gisundan siya ngadto sa usa ka bukid nga nag-umbaw sa Dagat Mediteranyo. Siya miingon nga molukso lamang sila sa dagat ug kini mabahin. Daghan niadtong milukso sa katubigan sa ubos nangalumos, ug ang mini nga mesiyas mikalagiw sa nahitaboan.
2 Sa ika-12ng siglo, usa ka “mesiyas” mitungha sa Yemen. Ang caliph, o magmamando, nangayo kaniya ug ilhanan sa iyang pagka-mesiyas. Kini nga “mesiyas” nagsugyot nga mahimong magpapunggot siyag ulo sa caliph. Siya nagtagna ug dihadiha nga pagkabanhaw nga magsilbing ilhanan. Ang caliph miuyon sa plano—ug mao kadto ang kataposan sa maong “mesiyas.”
3. Kinsa ang tinuod nga Mesiyas, ug unsay gipamatud-an sa iyang ministeryo?
3 Ang mini nga mga mesiyas ug ang ilang mga tagna bug-os nangapakyas, apan ang pagtagad sa matagnaong pulong sa Diyos dili gayod makapahigawad. Ang tinuod nga Mesiyas, si Jesu-Kristo, mao ang buhi nga katumanan sa daghang tagna sa Bibliya. Nagkutlo gikan sa tagna ni Isaias, pananglitan, ang magsusulat sa Ebanghelyo nga si Mateo nagsulat: “‘O yuta sa Zabulon ug yuta sa Neftali, ubay sa dalan sa dagat, sa pikas daplin sa Jordan, Galilea sa kanasoran! ang mga tawo nga naglingkod diha sa kangitngit nakakita ug dakong kahayag, ug bahin nilang naglingkod diha sa dapit sa anino sa kamatayon, ang kahayag misubang nganha kanila.’ Sukad nianang panahona si Jesus nagsugod sa pagwali ug nag-ingon: ‘Paghinulsol kamo, kay ang gingharian sa mga langit haduol na.’” (Mateo 4:15-17; Isaias 9:1, 2) Si Jesus mao ang “dakong kahayag,” ug ang iyang ministeryo nagpamatuod nga siya mao ang Manalagna nga gitagna ni Moises. Kadtong modumili sa pagpamati kang Jesus pagalaglagon.—Deuteronomio 18:18, 19; Buhat 3:22, 23.
4. Sa unsang paagi gituman ni Jesus ang Isaias 53:12?
4 Gituman usab ni Jesus ang matagnaong mga pulong sa Isaias 53:12: “Iyang gibubo ang iyang kalag ngadto gayod sa kamatayon, ug siya giisip nga kauban sa mga malapason; ug siya nagpas-an sa sala mismo sa daghang tawo, ug siya mipataliwala alang sa mga malapason.” Nahibalo nga iyang ihatag sa dili madugay ang iyang tawhanong kinabuhi ingong lukat, gilig-on ni Jesus ang pagtuo sa iyang mga tinun-an. (Marcos 10:45) Iyang gihimo kini sa usa ka talagsaong paagi pinaagi sa pagkausab sa dagway.
Ang Pagkausab sa Dagway Makapalig-on sa Pagtuo
5. Sa imong kaugalingong mga pulong, unsaon nimo pagbatbat ang pagkausab sa dagway?
5 Ang pagkausab sa dagway maoy usa ka matagnaong hitabo. Si Jesus miingon: ‘Ang Anak sa tawo gitakda nga moabot diha sa himaya sa iyang Amahan uban sa iyang mga manulonda . . . Sa pagkamatuod ako magaingon kaninyo nga adunay pipila niadtong nagabarog dinhi nga dili gayod makatilaw ug kamatayon hangtod nga makita nila una ang Anak sa tawo nga moabot diha sa iyang gingharian.’ (Mateo 16:27, 28) Ang uban bang mga apostoles aktuwal nga nakakita sa pag-abot ni Jesus sa iyang Gingharian? Ang Mateo 17:1-7 nag-ingon: “Unom ka adlaw sa ulahi gikuyog ni Jesus si Pedro ug si Santiago ug si Juan nga iyang igsoon ug gidala sila ngadto sa usa ka habog nga bukid nga sila ra. Ug nausab ang iyang hitsura atubangan kanila.” Pagkatalagsaong hitabo! “Misidlak ang iyang nawong ingon sa adlaw, ug ang iyang panggawas nga mga besti misilaw ingon sa kahayag. Ug, tan-awa! mipakita kanila si Moises ug si Elias, nga nakigkabildo kaniya.” Dugang pa, “usa ka hayag nga panganod milandong kanila,” ug ilang nadungog ang kaugalingong tingog sa Diyos nga nag-ingon: “‘Kini mao ang akong Anak, ang hinigugma, kinsa akong giuyonan; pamati kamo kaniya.’ Pagkadungog niini ang mga tinun-an miyukbo sa ilang nawong ug nangahadlok pag-ayo. Unya si Jesus miduol ug, nga mihikap kanila, miingon: ‘Tindog ug ayawg kahadlok.’”
6. (a) Nganong gitawag ni Jesus ang pagkausab sa dagway nga usa ka panan-awon? (b) Ang pagkausab sa dagway maoy pasiunang pagkakita sa unsa?
6 Kining katingalahang okasyon lagmit nahitabo diha sa usa sa kabakiliran sa Bukid sa Hermon, diin dinhi gipalabay ni Jesus ug sa iyang tulo ka apostoles ang gabii. Ang pagkausab sa dagway lagmit nahitabo sa gabii, nga klaro kaayong makita. Usa ka katarongan nga gitawag kini ni Jesus nga usa ka panan-awon maoy tungod kay ang dugay na kaayong patay nga si Moises ug Elias wala diha sa literal. Si Kristo lamang ang atua didto. (Mateo 17:8, 9) Ang maong makasulaw nga pasundayag nakahatag kang Pedro, Santiago, ug Juan ug matahom kaayong pasiunang pagkakita sa mahimayaong presensiya ni Jesus sa Gingharianong gahom. Si Moises ug Elias maoy mga landong sa dinihogang kaubang mga manunod, ug ang panan-awon gamhanang nagpalig-on sa iyang pamatuod bahin sa Gingharian ug sa iyang umaabot nga pagkahari.
7. Sa unsang paagi kita nahibalo nga tin-aw kaayong nahinumdom si Pedro sa pagkausab sa dagway?
7 Ang pagkausab sa dagway nakatabang sa paglig-on sa pagtuo sa tulo ka apostoles nga maoy magdula sa pangunang papel diha sa Kristohanong kongregasyon. Ang makasulaw nga dagway ni Kristo, ang iyang naggilakgilak nga besti, ug ang kaugalingong tingog sa Diyos nga nagpahayag nga si Jesus mao ang Iyang pinalanggang anak nga kaniya sila kinahanglang magpatalinghog—kining tanan nakaalagad sa katuyoan niini nga epektibo kaayo. Apan kinahanglang dili isulti sa mga apostoles ang panan-awon ngadto sa uban hangtod banhawon si Jesus. Mga 32 ka tuig sa ulahi, kini nga panan-awon tin-aw gihapon sa hunahuna ni Pedro. Naghisgot bahin niini ug sa kahulogan niini, siya misulat: ‘Dili, dili pinaagig pagsubay ug maayong pagkatumotumong bakak nga mga sugilanon nga gipasinati namo kamo sa gahom ug presensiya sa atong Ginoong Jesu-Kristo, kondili pinaagi sa pagkahimong mga saksing-nakakita sa iyang kahalangdon. Kay nakadawat siya gikan sa Diyos nga Amahan ug dungog ug himaya, sa diha nga ang mga pulong nga sama niini gipadangat kaniya pinaagi sa halangdong himaya: “Kini mao ang akong anak, ang akong hinigugma, kinsa ako mismong giuyonan.” Oo, kining mga pulonga ang among nadunggan gikan sa langit samtang didto kami uban kaniya sa balaang bukid.’—2 Pedro 1:16-18.
8. (a) Unsay gipasiugda sa proklamasyon sa Diyos bahin sa iyang Anak? (b) Unsay gipaila sa panganod nga mitungha diha sa pagkausab sa dagway?
8 Labaw nga hinungdanon mao ang proklamasyon sa Diyos: “Kini mao ang akong anak, ang hinigugma, kinsa akong giuyonan; pamati kamo kaniya.” Gipasiugda niining mga pulonga si Jesus ingong naentronong Hari sa Diyos, nga kaniya ang tanang kalalangan kinahanglang magpakitag pagkamasinugtanon. Ang naglandong nga panganod nagpaila nga ang katumanan niini nga panan-awon dili makita sa literal nga mga mata. Kini makita lamang sa mga mata sa pagsabot sa bahin niadtong makaila sa “ilhanan” sa dili makitang presensiya ni Jesus sa Gingharianong gahom. (Mateo 24:3) Sa pagkatinuod, ang instruksiyon ni Jesus nga dili isulti ang panan-awon ngadto kang bisan kinsa hangtod nga siya mabanhaw gikan sa mga patay nagpakita nga ang pagbayaw ug paghimaya kaniya mahitabo human sa iyang pagkabanhaw.
9. Nganong ang pagkausab sa dagway makapalig-on sa atong pagtuo?
9 Human sa paghisgot bahin sa pagkausab sa dagway, si Pedro miingon: ‘Tungod niana atong nabatonan ang matagnaong pulong nga nahimong labi pang tino; ug nagabuhat kamo ug maayo sa pagtagad niini ingong usa ka lampara nga nagasidlak sa usa ka ngitngit nga dapit, hangtod nga ang adlaw mobanagbanag ug ang kabugwason mosubang, sa inyong mga kasingkasing. Hibaloi ninyo kini una sa tanan, nga walay propesiya sa Kasulatan nga nagsumikad sa kinaugalingong pagbadbad. Kay ang propesiya wala sa bisan kanus-a gipadangat pinaagi sa kabubut-on sa tawo, hinunoa namulong ang mga tawo gikan sa Diyos samtang giagak sila sa balaang espiritu.’ (2 Pedro 1:19-21) Ang pagkausab sa dagway nagpasiugda sa pagkatinuod sa matagnaong pulong sa Diyos. Kinahanglang atong patalinghogan kanang pulonga ug dili ang ‘maayong pagkatumotumong bakak nga mga sugilanon’ nga walay pagpaluyo o pag-uyon sa Diyos. Ang pagkausab sa dagway makapalig-on gayod sa atong pagtuo sa matagnaong pulong tungod kay kanang pasiunang panan-awon sa himaya ug Gingharianong gahom ni Jesus natuman na. Oo, kita adunay dili-ikalimod nga pamatuod nga si Kristo presente na karon ingong gamhanang langitnong Hari.
Kon sa Unsang Paagi ang Kabugwason Mosubang
10. Kinsa o unsa ang ‘kabugwason’ nga gihisgotan ni Pedro, ug nganong mao kanay imong tubag?
10 Si Pedro nagsulat: ‘Nagabuhat kamo ug maayo sa pagtagad sa matagnaong pulong ingong usa ka lampara nga nagasidlak sa usa ka ngitngit nga dapit, hangtod nga ang adlaw mobanagbanag ug ang kabugwason mosubang.’ Kinsa o unsa ang ‘kabugwason’? Ang pulong ‘kabugwason’ makita kas-a lamang diha sa Bibliya, ug kaamgid kinig kahulogan sa “bituon sa kabuntagon.” Ang Pinadayag 22:16 nagtawag kang Jesu-Kristo nga “ang sanag nga bituon sa kabuntagon.” Sa pipila ka panahon sa tuig, ang maong mga bituon mao ang kataposang makita nga mosubang sa sidlakang kapunawpunawan. Sila mosubang sa hapit nang mosilang ang adlaw, ug kini sa ingon nagpadayag sa pagbanagbanag sa bag-ong adlaw. Gigamit ni Pedro ang pulong ‘kabugwason’ sa pagpunting kang Jesus human nga Iyang nadawat ang Gingharianong gahom. Niadtong higayona, si Jesus misubang sa tibuok uniberso, apil na ang atong yuta! Ingong Mesiyanikong Kabugwason, siya naglandong sa pagbanagbanag sa usa ka bag-ong adlaw, o panahon, alang sa masinugtanong katawhan.
11. (a) Nganong ang 2 Pedro 1:19 wala magpasabot nga ‘ang kabugwason’ mosubang sa aktuwal nga mga kasingkasing sa tawo? (b) Unsaon nimo pagpatin-aw ang 2 Pedro 1:19?
11 Gipasiugda sa daghang maghuhubad sa Bibliya ang ideya nga ang mga pulong ni apostol Pedro nga natala diha sa 2 Pedro 1:19 nagpasabot sa pisikal nga kasingkasing sa tawo. Ang hamtong nga kasingkasing motimbang lamang ug 250 ngadto sa 300 gramos. Sa unsang paagi si Jesu-Kristo—karon usa na ka mahimayaon dili-mamatay nga espiritung linalang sa langit—mosubang niining gamayng tawhanong mga organo? (1 Timoteo 6:16) Oo, ang atong mahulagwayong mga kasingkasing nalangkit niining butanga, kay pinaagi niini kita nagapatalinghog sa matagnaong pulong sa Diyos. Apan tan-awag maayo ang 2 Pedro 1:19, ug imong masabtan nga ang New World Translation migamit ug mga comma aron malahi ang mga pulong nga nagapatin-aw nga ‘hangtod nga ang adlaw mobanagbanag ug ang kabugwason mosubang’ gikan sa nag-unang mga pulong diha sa bersikulo ug gikan sa ekspresyon nga “sa inyong mga kasingkasing.” Kining bersikuloha mahimong ikapahayag niining paagiha: ‘Atong nabatonan ang propetikanhong pulong nga nahimong labi pang tino; ug nagabuhat kamo ug maayo sa pagtagad niini samag usa ka lampara nga nagasidlak sa ngitngit nga dapit, sa ato pa, sa inyong mga kasingkasing, hangtod nga ang adlaw mobanagbanag ug ang kabugwason mosubang.’
12. Unsay kahimtang sa tawhanong mga kasingkasing sa katibuk-an, apan unsay tinuod labot sa tinuod nga mga Kristohanon?
12 Unsay kahimtang sa mahulagwayong mga kasingkasing sa makasasalang katawhan sa katibuk-an? Aw, ang ilang mga kasingkasing anaa sa espirituwal nga kangitngit! Apan, kon kita tinuod nga mga Kristohanon, daw kita adunay lampara nga nagasidlak diha sa atong mga kasingkasing, nga mahimong mangitngit unta. Ingon sa gipadayag sa mga pulong ni Pedro, ang tinuod nga mga Kristohanon makapadayon sa pagbantay ug malamdagan sa pagbanagbanag sa bag-ong adlaw pinaagi sa pagpatalinghog sa madan-agong Pulong sa Diyos. Sila mahibalo unya sa kamatuoran nga ang Kabugwason misubang na, dili diha sa unodnong mga kasingkasing sa tawo, kondili sa atubangan sa tanang kalalangan.
13. (a) Nganong makatino kita nga ang Kabugwason misubang na? (b) Nganong ang mga Kristohanon makalahutay sa malisod nga mga kahimtang nga gitagna ni Jesus sa atong adlaw?
13 Ang Kabugwason misubang na! Kita makatino niana pinaagi sa pagpatalinghog sa dakong tagna ni Jesus bahin sa iyang presensiya. Karon, atong ginaagoman ang katumanan niini diha sa mga hitabo nga wala pa hitupngi sukad sama sa mga gubat, kagutom, linog, ug pagsangyaw sa maayong balita sa tibuok kalibotan. (Mateo 24:3-14) Bisag ang malisod nga mga kahimtang nga gitagna ni Jesus nakaapektar usab kanato ingong mga Kristohanon, kita makalahutay nga malinawon ug malipayon sa kasingkasing. Ngano? Tungod kay atong gipatalinghogan ang matagnaong pulong sa Diyos ug nagtuo sa iyang mga saad alang sa umaabot. Kita nahibalo nga kita anaa na sa ganghaan sa labing maayong mga panahon tungod kay kita ania na gayod sa kinatumyan sa “panahon sa kataposan”! (Daniel 12:4) Ang kalibotan naglisod sa hilabihan ingon sa gitagna sa Isaias 60:2: “Tan-awa! ang kangitngit mismo motabon sa yuta, ug ang bagang kangiob sa nasodnong mga pundok.” Sa unsang paagi makakita ang usa ka tawo sa iyang dalan niini nga kangitngit? Ang tawo kinahanglang mapainubsanong magpatalinghog sa matagnaong pulong sa Diyos karon, sa dili pa ulahi ang tanan. Ang mga tawo nga matinud-anon ug kasingkasing kinahanglang modangop kang Jehova nga Diyos, ang Tuboran sa kinabuhi ug kahayag. (Salmo 36:9; Buhat 17:28) Pinaagi lamang sa pagbuhat niini nga makakita ang tawo ug tinuod nga kalamdagan ug paglaom aron matagamtam ang katingalahang umaabot nga gilaraw sa Diyos alang sa masinugtanong katawhan.—Pinadayag 21:1-5.
“Ang Kahayag Miabot sa Kalibotan”
14. Unsay atong kinahanglang himoon aron matagamtam ang katumanan sa katingalahang mga tagna sa Bibliya?
14 Gitin-aw sa Kasulatan nga si Jesu-Kristo nagmando na karon ingong Hari. Tungod sa iyang pagsugod sa pagmando sa 1914, ang katingalahang mga tagna matuman pa sa umaabot. Aron matagamtam ang katumanan niini, kinahanglang atong pamatud-an nga kita mga maaghop nga nagpasundayag ug pagtuo kang Jesu-Kristo, nga naghinulsol sa makasasalang mga buhat ug mga sala nga nahimo tungod sa pagkawalay hibangkaagan. Siyempre, kadtong gusto ug kangitngit dili makadawat ug kinabuhing walay kataposan. Si Jesus miingon: “Kini mao ang pasukaranan sa paghukom, nga ang kahayag mianhi na sa kalibotan apan ang mga tawo nahigugma sa kangitngit inay kay sa kahayag, kay ang ilang mga buhat maoy tuman-kadaotan. Kay siya nga nagabuhat ug mangil-ad nga mga butang nagadumot sa kahayag ug dili moduol sa kahayag, aron nga ang iyang mga buhat dili mabadlong. Apan siya nga nagabuhat kon unsa ang matuod nagaduol sa kahayag, aron nga ang iyang mga buhat mapadayag ingon nga nabuhat uyon sa Diyos.”—Juan 3:19-21.
15. Unsay mahitabo kon dili nato dawaton ang kaluwasan nga gipaposible sa Diyos pinaagi sa iyang Anak?
15 Ang espirituwal nga kahayag miabot sa kalibotan pinaagi ni Jesus, ug ang pagpatalinghog kaniya hinungdanon. Si Pablo nagsulat: “Ang Diyos, kinsa namulong dugay na kanhi sa daghang okasyon ug sa daghang paagi ngadto sa atong mga katigulangan pinaagi sa mga propeta, sa kataposan niining mga adlawa namulong kanato pinaagi sa usa ka Anak, si kinsa gitudlo niya nga manununod sa tanang butang, ug pinaagi kang kinsa iyang gihimo ang mga sistema sa mga butang.” (Hebreohanon 1:1, 2) Unsay mahitabo kon dili nato dawaton ang kaluwasan nga gipaposible sa Diyos pinaagi sa iyang Anak? Si Pablo nagpadayon sa pag-ingon: ‘Kon ang pulong nga gipamulong pinaagi sa mga manulonda napamatud-ang lig-on, ug ang matag kalapasan ug dili-masinugtanong buhat nakadawat ug silot nahiuyon sa hustisya; unsaon man nato pag-ikyas kon dili nato dawaton ang ingon kadako nga kaluwasan sa pagkaagi nga kini gisugdan pagpamulong pinaagi sa atong Ginoo ug gipanghimatud-an kanato pinaagi niadtong nakadungog kaniya, samtang ang Diyos miduyog sa pagpanaksi pinaagi sa mga ilhanan ingon man usab sa mga tilimad-on ug nagkadaiyang gamhanang mga buhat ug sa pag-apod-apod sa balaang espiritu sumala sa iyang kabubut-on?’ (Hebreohanon 2:2-4) Oo, si Jesus hinungdanon kaayog papel sa pagsangyaw sa matagnaong pulong.—Pinadayag 19:10.
16. Nganong kita bug-os nga makasalig sa tanang tagna ni Jehova nga Diyos?
16 Ingon sa gipadayag na, si Pedro miingon: ‘Walay tagna sa Kasulatan nga nagsumikad sa kaugalingong paghubad.’ Ang mga tawo lamang dili makamugna ug tinuod nga mga tagna, apan kita bug-os nga makasalig sa tanang tagna sa Diyos. Kini nagagikan kang Jehova nga Diyos mismo. Pinaagi sa balaang espiritu gipaarang niya nga ang iyang mga alagad makasabot kon sa unsang paagi nagakatuman ang mga tagna sa Bibliya. Sa pagkatinuod, kita mapasalamaton kaayo kang Jehova nga kita nakakita sa katumanan sa daghan nianang mga tagnaa sukad sa tuig 1914. Ug kita bug-os nga makatino nga ang nahibiling mga tagna bahin sa kataposan niining daotang sistema sa mga butang matuman. Hinungdanong atong patalinghogan ang mga tagna sa Diyos samtang atong ginapalamdag ang atong kahayag. (Mateo 5:16) Pagkadako sa atong pasalamat nga gipahinabo ni Jehova nga ang ‘kahayag mokidlap kanato diha sa mabagang kangitngit’ nga nagtabon sa yuta karon!—Isaias 58:10.
17. Nganong nagkinahanglan kita ug espirituwal nga kahayag gikan sa Diyos?
17 Ang pisikal nga kahayag magpaarang kanato sa pagkakita. Kini usab ang nagpaposible sa pagtubo sa mga tanom nga mohatag kanato ug nagkalainlaing pagkaon. Dili kita mabuhi kon walay pisikal nga kahayag. Komosta ang espirituwal nga kahayag? Kini naghatag kanato ug giya ug nagpakita kanato sa umaabot ingon sa gitagna diha sa Pulong sa Diyos, ang Bibliya. (Salmo 119:105) Si Jehova nga Diyos mahigugmaong ‘nagpadala sa iyang kahayag ug kamatuoran.’ (Salmo 43:3) Siyempre magpakita gayod kita ug lalom nga apresasyon sa maong mga tagana. Busa himoon nato kutob sa maarangan nga masabtan ang kahayag sa “mahimayaong kahibalo sa Diyos” aron madan-agan niini ang atong mahulagwayong kasingkasing.—2 Corinto 4:6; Efeso 1:18.
18. Unsa ang andam nang himoon karon sa Kabugwason ni Jehova?
18 Pagkabulahan nato nga nahibalo nga sa 1914, si Jesu-Kristo, ang Kabugwason, misubang sa tibuok uniberso ug nagsugod sa pagtuman sa panan-awon sa pagkausab sa dagway! Ang Kabugwason ni Jehova presente na karon, andam sa pagtuman sa katuyoan sa Diyos alang sa dugang katumanan sa pagkausab sa dagway—“sa gubat sa dakong adlaw sa Diyos nga Labing Gamhanan.” (Pinadayag 16:14, 16) Human nga laglagon kining daang sistema, tumanon ni Jehova ang iyang saad bahin sa “bag-ong mga langit ug usa ka bag-ong yuta” nga diha niana kita makadayeg kaniya hangtod sa walay kataposan ingong Soberanong Ginoo sa uniberso ug ang Diyos sa tinuod nga tagna. (2 Pedro 3:13) Hangtod moabot kanang dakong adlaw, kita magpadayon sa paglakaw diha sa diyosnong kahayag pinaagi sa pagpatalinghog sa matagnaong pulong sa Diyos.
Unsaon Nimo Pagtubag?
• Unsaon nimo pagbatbat ang pagkausab sa dagway ni Jesus?
• Sa unsang paagi makalig-on sa pagtuo ang pagkausab sa dagway?
• Kinsa o unsa ang Kabugwason ni Jehova, ug kanus-a kini misubang?
• Nganong angay natong patalinghogan ang matagnaong pulong sa Diyos?
[Mga pangutana]
[Hulagway sa panid 13]
Makapatin-aw ka ba sa kahulogan sa pagkausab sa dagway?
[Hulagway sa panid 15]
Ang Kabugwason misubang na. Nahibalo ka ba kon sa unsang paagi ug kanus-a?