Imo Bang ‘Gipalit ang Nahiangay nga Panahon’?

SIAPOSTOL Pablo nagtambag sa unang-siglong mga Kristohanon sa Efeso: “Pagbantay pag-ayo nga ang inyong paglakaw dili ingon sa dili-maalamon kondili ingon sa maalamon nga mga tawo, nga magapalit sa nahiangay nga panahon alang sa inyong kaugalingon, tungod kay ang mga adlaw daotan.” (Efeso 5:15, 16) Nganong gikinahanglan kining tambaga? Aron matubag kanang pangutanaha gikinahanglan ang kahibalo sa mga kahimtang nga giatubang sa mga Kristohanon nianang karaang siyudad.

Ang Efeso ilado sa talagsaong kaadunahan niini, grabeng imoralidad, kaylap nga krimen, ug nagkalainlaing demonyohanong mga buhat. Dugang pa, ang mga Kristohanon didto kinahanglang makigbugno batok sa mga pilosopikanhong mga tinuohan bahin sa panahon. Ang dili-Kristohanong mga Grego sa Efeso wala motuo nga ang panahon miirog sa usa ka direksiyon. Ang Gregong pilosopiya nagtudlo kanila nga ang kinabuhi gisublisubli sa walay kataposang siklo sa panahon. Ang usa ka tawo nga nag-usik sa iyang panahon sa usa ka siklo sa kinabuhi makabawi niining tanan sa laing siklo. Kining matanga sa panghunahuna lagmit nakaaghat sa mga Kristohanon sa Efeso nga sagopon ang tinamdang walay-pagpakabana bahin sa orasan ni Jehova sa mga hitabo, lakip na sa iyang orasan sa diyosnong paghukom. Busa, haom ang tambag ni Pablo nga ‘paliton ang nahiangay nga panahon.’

Wala maghisgot si Pablo bahin sa panahon sa linangkob nga diwa. Ang Gregong pulong nga iyang gigamit nagkahulogan ug usa ka tinudlong panahon, usa ka yugto sa panahon alang sa usa ka espesipikong katuyoan. Si Pablo nagtambag sa unang-siglong mga Kristohanon nga maalamong gamiton ang nahiangayng yugto sa panahon, o ang yugto sa kaluoy, nga ilang presenteng gipahimuslan, sa dili pa moabot ang kataposan niini ug pagabakwion ang kaluoy sa Diyos ug ang gitanyag nga kaluwasan.—Roma 13:11-13; 1 Tesalonica 5:6-11.

Kita nagkinabuhi sa susamang nahiangay nga yugto sa panahon. Inay nga usikan kining dili-na-masubling yugto sa kaluoy pinaagi sa pagpangagpas sa temporaryong mga kalipayan nga gitanyag sa kalibotan, ang mga Kristohanon maalamon kon ilang gamiton ang ilang nabatonang panahon sa pagbuhat sa “mga buhat sa diyosnong pagkamahinalaron” ug sa ingon nagpalig-on sa ilang relasyon sa Maglalalang, si Jehova nga Diyos.—2 Pedro 3:11; Salmo 73:28; Filipos 1:10.