‘Ihatag ang Labaw Pa Kay sa Kasagarang Pagtagad’
‘Ihatag ang Labaw Pa Kay sa Kasagarang Pagtagad’
“Kinahanglan kitang mohatag ug labaw pa kay sa kasagarang pagtagad sa mga butang nga atong nadungog, aron dili gayod kita maanod.”—HEBREOHANON 2:1.
1. Iilustrar kon sa unsang paagi ang pagkalinga mahimong motultol sa katalagman.
ANG mga aksidente sa awto maoy nakaingon sa kamatayon sa mga 37,000 ka tawo kada tuig sa Tinipong Bansa lamang. Ang mga eksperto nag-ingon nga daghan niini nga mga kamatayon malikayan unta kon nagtan-aw pa pag-ayo ang mga drayber sa karsada. Ang ubang mga motorista nalinga sa mga senyal ug mga karatula o tungod sa paggamit sa ilang cell phone. Anaa usab kadtong nagkaon samtang nagdrayb. Niining tanang situwasyon, ang pagkalinga mahimong motultol sa katalagman.
2, 3. Unsang tambag ang gihatag ni Pablo ngadto sa Hebreohanong mga Kristohanon, ug nganong haom ang iyang tambag?
2 Duolan sa 2,000 ka tuig una pa maimbento ang awto, gipaila ni apostol Pablo ang usa ka matang sa butang nga makapalinga nga nakadaot sa pipila ka Hebreohanong mga Kristohanon. Gipasiugda ni Pablo nga ang nabanhawng Jesu-Kristo gihatagag posisyon nga labaw sa tanang manulonda, kay siya naglingkod sa tuong kamot sa Diyos. Dayon miingon ang apostol: “Mao nga kinahanglan kitang mohatag ug labaw pa kay sa kasagarang pagtagad sa mga butang nga atong nadungog, aron dili gayod kita maanod.”—Hebreohanon 2:1.
3 Nganong ang Hebreohanong mga Kristohanon kinahanglang ‘mohatag ug labaw pa kay sa kasagarang pagtagad sa mga butang nga nadungog’ mahitungod kang Jesus? Tungod kay duolan na sa 30 ka tuig ang milabay sukad si Jesus mibiya sa yuta. Tungod kay wala na ang ilang Agalon, ang ubang Hebreohanong mga Kristohanon nagsugod sa pagkaanod gikan sa matuod nga pagtuo. Nalinga sila sa Judaismo, ang ilang kanhing relihiyon.
Kinahanglan Silang Mohatag ug Labaw pa nga Pagtagad
4. Nganong ang pipila ka Hebreohanong mga Kristohanon natental sa pagbalik ngadto sa Judaismo?
4 Nganong ang usa ka Kristohanon matental tingali sa pagbalik ngadto sa Judaismo? Aw, ang sistema sa pagsimba ilalom sa Balaod naglangkit sa makitang mga butang. Ang mga tawo makakita sa mga saserdote ug makapanimaho sa sinunog nga mga halad. Apan, sa pipila ka bahin lahi kaayo ang Kristiyanidad. Ang mga Kristohanon dunay Hataas nga Saserdote, si Jesu-Kristo, apan wala na siya makita dinhi sa yuta sulod na sa tulo ka dekada. (Hebreohanon 4:14) Sila may templo, apan ang balaang dapit niini mao ang langit mismo. (Hebreohanon 9:24) Dili sama sa pisikal nga pagtuli ilalom sa Balaod, ang Kristohanong pagtuli maoy “sa kasingkasing pinaagi sa espiritu.” (Roma 2:29) Busa, alang sa Hebreohanong mga Kristohanon, ang Kristiyanidad morag nagsugod na sa pagkahimong dili makita.
5. Sa unsang paagi gipakita ni Pablo nga ang sistema sa pagsimba nga gisugdan ni Jesus mas labaw kay nianang ilalom sa Balaod?
5 Ang Hebreohanong mga Kristohanon kinahanglang makaamgo nga dunay butang nga hinungdanon kaayo bahin sa sistema sa pagsimba nga gisugdan ni Kristo. Mas gipasukad kini sa pagtuo kay sa panan-aw, apan mas labaw kini sa Balaod nga gihatag pinaagi kang manalagnang Moises. “Kon ang dugo sa mga kanding ug sa torong mga baka ug ang abo sa nating baka nga iwisik niadtong mga nahugawan makapabalaan hangtod sa pagkahinlo sa unod,” misulat si Pablo, “dili ba labaw pa gayod nga ang dugo ni Kristo, kinsa pinaagi sa walay kataposang espiritu naghalad sa iyang kaugalingon nga walay buling ngadto sa Diyos, magahinlo sa atong mga tanlag gikan sa patay nga mga buhat aron makahimo kitag sagradong pag-alagad ngadto sa buhi nga Diyos?” (Hebreohanon 9:13, 14) Oo, ang kapasayloan nga mabatonan pinaagi sa pagtuo sa halad lukat ni Jesu-Kristo mas labaw pa sa daghang paagi kay nianang gipaposible sa mga halad nga gitanyag ilalom sa Balaod.—Hebreohanon 7:26-28.
6, 7. (a) Tungod sa unsang situwasyon nga nahimong dinalian nga ang Hebreohanong mga Kristohanon ‘mohatag ug labaw pa kay sa kasagarang pagtagad sa mga butang nga nadungog’? (b) Sa dihang gisulat ni Pablo ang iyang sulat ngadto sa mga Hebreohanon, unsa ka dako ang panahon nga gitagal sa Jerusalem? (Tan-awa ang potnot.)
6 Dihay laing hinungdan kon nganong ang Hebreohanong mga Kristohanon kinahanglang mohatag ug seryosong pagtagad sa mga butang nga nadungog bahin kang Jesus. Iyang gitagna nga ang Jerusalem pagalaglagon. Miingon si Jesus: “Modangat kanimo ang mga adlaw sa dihang ang imong mga kaaway magatukod libot kanimo ug usa ka salipdanan sa talinis nga mga estaka ug ikaw pagalikosan ug ikaw pagasakiton gikan sa tanang direksiyon, ug ikaw ug ang imong mga anak nga anaa sa sulod nimo ipusdak nila sa yuta, ug dili ka nila binlan ug bato nga napatong sa bato, tungod kay wala ka makaila sa panahon sa pagsusi kanimo.”—Lucas 19:43, 44.
7 Kanus-a kini mahitabo? Wala ipahibalo ni Jesus ang adlaw ug takna. Hinunoa, gihatag niya kining maong instruksiyon: “Inigkakita ninyo nga malibotan ang Jerusalem sa nagkampong kasundalohan, nan hibaloi nga haduol na ang paglaglag kaniya. Nan silang anaa sa Judea pakalagiwa ngadto sa kabukiran, ug kadtong anaa sa iyang taliwala pabiyaa, ug kadtong anaa sa mga dapit sa kabanikahan ayaw na pasudla kaniya.” (Lucas 21:20, 21) Sulod sa 30 ka tuig human isulti ni Jesus kanang mga pulonga, ang ubang mga Kristohanon sa Jerusalem nawad-an na sa pagbati sa pagkadinalian ug nalinga. Wala na sila magtan-aw sa karsada, ingnon ta. Kon dili nila usbon ang ilang panghunahuna, tinong moabot ang katalagman. Gihunahuna man nila kini o wala, nagkaduol na ang kalaglagan sa Jerusalem! a Maayo na lang, ang tambag ni Pablo nagpasidaan niadtong mga Kristohanon sa Jerusalem nga nahikatulog sa espirituwal.
Paghatag ug “Labaw pa kay sa Kasagarang Pagtagad” Karon
8. Nganong kinahanglan kitang “mohatag ug labaw pa kay sa kasagarang pagtagad” sa mga kamatuoran sa Pulong sa Diyos?
8 Sama sa unang-siglong mga Kristohanon, kita kinahanglang “mohatag ug labaw pa kay sa kasagarang pagtagad” sa mga kamatuoran sa Pulong sa Diyos. Ngano? Tungod kay kita usab nag-atubang sa nagkaduol nga kalaglagan, dili lamang sa usa ka nasod, kondili sa tibuok sistema sa mga butang. (Pinadayag 11:18; 16:14, 16) Siyempre, wala kita mahibalo sa eksaktong adlaw ug oras sa dihang si Jehova mohimo niini. (Mateo 24:36) Bisan pa niana, kita maoy mga saksi sa katumanan sa mga tagna sa Bibliya nga klarong nagpaila nga kita nagkinabuhi na sa “kataposang mga adlaw.” (2 Timoteo 3:1-5) Busa, angay kitang magbantay batok sa bisan unsa nga makalinga kanato. Kita kinahanglang mohatag ug pagtagad sa Pulong sa Diyos ug magbaton ug dulot nga pagbati sa pagkadinalian. Pinaagi lamang sa pagbuhat niini nga kita ‘molampos sa pag-ikyas niining tanang butanga nga gitakdang mahitabo.’—Lucas 21:36.
9, 10. (a) Sa unsang paagi ikapakita nato ang atong kaugalingon nga matinagdanon sa espirituwal nga mga butang? (b) Sa unsang paagi ang pulong sa Diyos nahisama sa ‘usa ka lampara sa atong tiil’ ug ‘kahayag sa atong alagianan’?
9 Niining hinungdanong mga panahon, sa unsang paagi ikapakita nato nga kita naghatag ug “labaw pa kay sa kasagarang pagtagad” sa espirituwal nga mga butang? Ang usa ka paagi mao ang pagkamakanunayon sa atong pagtambong sa Kristohanong mga tigom, asembliya, ug mga kombensiyon. Kita kinahanglang mahimong makugihon nga mga estudyante sa Bibliya aron kita makaduol sa Awtor niini, si Jehova. (Santiago 4:8) Kon mokuha kita ug kahibalo bahin kang Jehova pinaagi sa personal nga pagtuon ug sa mga tigom, kita mahisama sa salmista nga miingon sa Diyos: “Ang imong pulong maoy lampara sa akong tiil, ug kahayag sa akong alagianan.”—Salmo 119:105.
10 Ang Bibliya nagsilbing ‘kahayag sa atong alagianan’ sa dihang kini nagtug-an kanato sa mga katuyoan sa Diyos alang sa umaabot. Kini usab maoy ‘lampara sa atong tiil.’ Sa laing pagkasulti, kini makatabang kanato sa atong sunod nga lakang sa dihang kita mag-atubang ug malisod nga mga problema sa kinabuhi. Mao nga hinungdanong kita “mohatag ug labaw pa kay sa kasagarang pagtagad” sa dihang kita magtigom aron sa pagdawat ug instruksiyon uban sa mga isigkamagtutuo ug sa dihang kita personal nga magbasa sa Pulong sa Diyos. Ang impormasyon nga atong nakat-onan motabang kanato sa paghimog maalamon ug mapuslanon nga mga desisyon nga makapahimuot kang Jehova ug makapalipay sa iyang kasingkasing. (Proverbio 27:11; Isaias 48:17) Sa unsang paagi mapauswag nato ang gitas-on sa panahon sa pagsentro sa atong pagtagad diha sa mga tigom ug panahon sa personal nga pagtuon aron makuha nato ang daghan kaayong kaayohan gikan sa espirituwal nga mga tagana sa Diyos?
Pagpauswag sa Atong Pagsentro sa Pagtagad Diha sa mga Tigom
11. Ngano man nga ang paghatag ug pagtagad diha sa Kristohanong mga tigom malisod usahay?
11 Usahay, ang paghatag ug pagtagad diha sa Kristohanong mga tigom dili sayon. Ang hunahuna dali rang malinga, tingali sa naghilak nga masuso o sa naulahi pag-abot nga nangitag kalingkoran. Human sa tibuok adlaw nga trabaho, kita tingali gikapoy na. Ang usa nga nagsulti diha sa plataporma dili tingali ang labing makalingaw nga mamumulong, ug sa dili pa nato maamgohan, kita naghunahuna na ug laing mga butang—tingali nagduka pa gani! Tungod sa kahinungdanon sa impormasyon nga gipresentar, angay kitang maningkamot sa pagpauswag sa atong gahom sa pagsentro sa pagtagad diha sa mga tigom sa kongregasyon. Apan sa unsang paagi mahimo nato kini?
12. Unsay makapasayon sa atong paghatag ug pagtagad diha sa mga tigom?
12 Kasagaran sayon ra ang paghatag ug pagtagad diha sa mga tigom kon kita nangandam pag-ayo. Busa, nganong dili maggahin ug panahon sa paghunahunang daan sa materyal nga pagakonsiderahon? Mogugol lamang ug pipila ka minuto kada adlaw ang pagbasa ug pagpamalandong sa usa ka bahin sa giasayn nga mga kapitulo alang sa pagbasa sa Bibliya sa semana. Pinaagi sa pagplano, makakaplag usab kitag panahon sa pag-andam sa Pagtuon sa Libro sa Kongregasyon ug sa Pagtuon sa Bantayanang Torre. Bisan unsang eskedyula ang atong gipili, usa ka butang ang tino: Ang pagpangandam motabang kanato sa paghatag ug pagtagad sa materyal nga ginatun-an diha sa mga tigom sa kongregasyon.
13. Unsay makatabang kanato sa pagsentro kanunay sa pagtagad diha sa materyal nga ginahisgotan panahon sa mga tigom?
13 Gawas pa sa maayong pagpangandam, nakaplagan sa uban nga sila mas maminaw diha sa mga tigom kon sila molingkod duol sa atubangan sa Kingdom Hall. Ang pagtan-aw kanunay sa mamumulong, nga sundan diha sa Bibliya sa dihang dunay teksto nga basahon, ug pagkuhag mga nota maoy laing mga paagi aron dili maglatagaw ang atong hunahuna. Apan, ang pagbaton ug andam nga kasingkasing mas hinungdanon pa kay sa bisan unsang partikular nga paagi sa pagsentro sa pagtagad. Kinahanglang nakasabot kita sa katuyoan sa atong pagpakigtigom. Sa panguna kita nakigtigom sa mga isigkamagtutuo aron mosimba kang Jehova. (Salmo 26:12; Lucas 2:36, 37) Ang mga tigom maoy hinungdanong paagi diin kita gipakaon sa espirituwal. (Mateo 24:45-47) Dugang pa, kini nagtagana kanato ug mga kahigayonan sa ‘pagdasig sa usag usa ngadto sa paghigugma ug maayong mga buhat.’—Hebreohanon 10:24, 25.
14. Unsa gayoy magpalampos sa usa ka tigom?
14 Ang uban mokiling tingali sa paghukom sa kalidad sa usa ka tigom sumala sa mga katakos sa pagpanudlo niadtong adunay mga bahin. Kon maayo kaayo ang mga mamumulong, kini matawag nga usa ka makalingaw nga tigom. Apan kon dili kaayo epektibo ang pagpanudlo, tingali lahi ang atong panglantaw. Tinuod nga kadtong dunay bahin sa programa angayng mohimo sa ilang kinamaayohan sa paggamit sa arte sa pagpanudlo ug ilabina sa pag-abot sa mga kasingkasing. (1 Timoteo 4:16) Bisan pa niana, kita nga namati kinahanglang dili sobra ka hinawayon. Bisan tuod hinungdanon ang katakos sa pagpanudlo sa mga mamumulong, dili kini ang bugtong butang nga makapalampos sa usa ka tigom. Dili ka ba mouyon nga ang angay natong hatagag unang pagtagad, dili kon unsa ka maayo mopakigpulong ang mamumulong, kondili kon unsa ka maayo ang atong pagpaminaw? Sa dihang motambong kita ug mga tigom ug mohatag ug pagtagad sa ginahisgotan, kita nagasimba sa Diyos sumala sa iyang kabubut-on. Mao kanay makapalampos sa tigom. Kon andam kita nga mokuha ug kahibalo bahin sa Diyos, kita makabenepisyo gikan sa mga tigom, bisan unsa pay mga katakos sa mamumulong. (Proverbio 2:1-5) Nan, magmadeterminado kita sa ‘paghatag ug labaw pa kay sa kasagarang pagtagad’ panahon sa atong mga tigom.
Pagbaton ug Bug-os nga Benepisyo Gikan sa Personal nga Pagtuon
15. Sa unsang paagi makabenepisyo kanato ang pagtuon ug pagpamalandong?
15 Kita makabenepisyo ug dako gikan sa ‘paghatag ug labaw pa kay sa kasagarang pagtagad’ panahon sa atong personal nga pagtuon ug pagpamalandong. Ang pagbasa ug paghunahuna pag-ayo sa ginaingon sa Bibliya ug sa Kristohanong mga publikasyon maghatag kanato ug bililhong mga kahigayonan sa pagtisok sa mga kamatuoran sa Pulong sa Diyos diha sa atong kasingkasing. Kini sa baylo, adunay dakong epekto diha sa paagi sa atong paghunahuna ug paglihok. Sa pagkatinuod, kini motabang kanato sa pagkalipay diha sa pagtuman sa kabubut-on ni Jehova. (Salmo 1:2; 40:8) Busa, kinahanglang ugmaron nato ang atong gahom sa pagsentro sa pagtagad aron kini makabenepisyo kanato sa dihang kita magtuon. Pagkadali rang malinga! Ang ginagmayng mga kabaldahan—usa ka tawag sa telepono o kasaba makapalinga kanato. O nalisdan tingali kita sa pagsentro sa atong pagtagad sulod sa taas nga panahon. Kita molingkod tingali uban ang maayong mga tumong sa pagkaon sa espirituwal, apan sa wala madugay ang hunahuna, sa pagkatinuod, naglatagaw na. Sa unsang paagi kita ‘makahatag ug labaw pa kay sa kasagarang pagtagad’ panahon sa personal nga pagtuon sa Pulong sa Diyos?
16. (a) Nganong hinungdanon nga kita mag-eskedyul ug panahon alang sa personal nga pagtuon? (b) Sa unsang paagi nakagahin ka ug panahon alang sa pagtuon sa Pulong sa Diyos?
16 Makabenepisyo ang paghimog eskedyul ug pagpili ug dapit nga makatabang pag-ayo sa pagtuon. Alang sa kadaghanan kanato, diyutay na lang ang atong panahon alang sa atong kaugalingon. Bation tingali nato nga daw ang pagkapuliki sa adlaw-adlaw nga mga hitabo nakaanod kanato samag sanga diha sa sulog kaayo nga sapa. Sa pagkatinuod, kinahanglang sungsongon nato ang sulog, ingnon ta, ug mangitag malinawong mga yugto diha sa atong puliki nga kinabuhi alang sa pagtuon. Kita dili basta maghulat na lang nga motungha ang kahigayonan nga magtuon. Hinunoa, kinahanglang kontrolahon nato ang situwasyon pinaagi sa paggahin ug panahon alang sa pagtuon. (Efeso 5:15, 16) Ang uban naggahin ug mubo nga panahon sa buntag diin wala kaayoy makapalinga. Nakaplagan sa uban nga ang gabii naghatag ug mas maayong kahigayonan. Ang punto mao nga kinahanglang tagdon nato ang hinungdanong panginahanglan sa pagkuha ug tukmang kahibalo bahin sa Diyos ug sa iyang Anak. (Juan 17:3) Busa mag-eskedyul kita ug panahon alang sa personal nga pagtuon ug dayon sundon gayod ang maong eskedyul.
17. Unsay pagpamalandong, ug sa unsang paagi kini makabenepisyo kanato?
17 Ang pagpamalandong—ang paagi sa paghunahuna kon unsay nakat-onan nato pinaagi sa pagtuon—maoy hinungdanon. Motabang kini kanato sa pagkuha sa mensahe sa Bibliya gikan sa pinatik nga panid ug pagsilsil niini sa atong kasingkasing. Ang pagpamalandong motabang kanato sa pagsabot kon unsaon pagpadapat ang tambag sa Bibliya aron kita mahimong “mga magtutuman sa pulong, ug dili tigpaminaw lamang.” (Santiago 1:22-25) Dugang pa, ang pagpamalandong motabang kanato sa pagkahimong mas suod pa kang Jehova, kay kini makapaarang kanato sa paghunahuna bahin sa iyang mga hiyas ug kon sa unsang paagi kini gipasiugda diha sa materyal nga gitun-an.
18. Unsang mga kahimtang ang gikinahanglan alang sa epektibong pagpamalandong?
18 Aron bug-os nga makabenepisyo gikan sa pagtuon ug pagpamalandong, kinahanglang wagtangon nato sa atong hunahuna ang mga butang nga makapalinga. Aron makadawat ug bag-ong impormasyon sa dihang kita namalandong, kinahanglang wagtangon nato sa hunahuna ang mga butang sa adlaw-adlawng pagkinabuhi nga makapalinga. Aron mahimo kini gikinahanglan ang panahon ug pag-inusara, apan, pagkamakapalagsik ang pag-ambit sa espirituwal nga pagkaon ug sa mga tubig sa kamatuoran nga makaplagan diha sa Pulong sa Diyos!
19. (a) Maylabot sa personal nga pagtuon, unsay nakatabang sa pipila sa pagpauswag sa gitas-on sa panahon sa ilang pagsentro sa pagtagad? (b) Unsay angay natong tinamdan ngadto sa pagtuon, ug unsang mga benepisyo ang atong makuha gikan niining hinungdanong kalihokan?
19 Komosta kon mubo ra ang panahon nga masentro nato ang atong pagtagad ug ang atong hunahuna magsugod na sa paglatagaw paglabay sa mubong yugto sa pagtuon? Nakaplagan sa uban nga mapauswag nila ang ilang gahom sa pagsentro sa pagtagad samtang nagtuon pinaagi sa pagsugod uban ang mugbong mga yugto sa pagtuon ug anam-anam nga patas-an kana. Ang atong tumong mao ang paggugol ug igong panahon sa pagtuon inay kay dalidalion kana. Kinahanglang ugmaron nato ang dakong kaikag sa ulohan nga konsiderahon. Ug makahimo kitag dugang panukiduki ginamit ang daghang materyal nga gitagana sa matinumanon ug maalamong ulipon nga matang. Bililhon kaayo ang pagsusi sa “lawom nga mga butang sa Diyos.” (1 Corinto 2:10) Ang pagbuhat sa ingon makapauswag sa atong kahibalo bahin sa Diyos ug makaugmad sa atong gahom sa pagsabot. (Hebreohanon 5:14) Kon kita maoy makugihon nga mga estudyante sa Pulong sa Diyos, kita usab mahimong ‘kuwalipikado nga manudlo sa uban.’—2 Timoteo 2:2.
20. Sa unsang paagi maugmad ug mabatonan nato ang suod nga relasyon uban kang Jehova nga Diyos?
20 Ang pagtambong sa Kristohanong mga tigom ug paghimog personal nga pagtuon makatabang ug dako sa pag-ugmad ug pagbaton ug suod nga relasyon uban kang Jehova. Dayag nga mao kana ang kahimtang sa salmista nga miingon sa Diyos: “Gihigugma ko gayod ang imong balaod! Kini ang akong gipalandong sa tibuok nga adlaw.” (Salmo 119:97) Nan, magmakanunayon kita sa pagtambong sa mga tigom, asembliya, ug mga kombensiyon. Ug hinaot nga paliton nato ang panahon alang sa pagtuon sa Bibliya ug pagpamalandong. Kita dagayang gantihan tungod sa paghatag ug “labaw pa kay sa kasagarang pagtagad” sa Pulong sa Diyos.
[Footnote]
a Ang sulat ngadto sa mga Hebreohanon lagmit nga gisulat sa 61 K.P. Kon mao, mga lima ka tuig lamang sa ulahi nga ang Jerusalem gilikosan sa nagkampong mga kasundalohan ni Cestius Gallus. Sa wala madugay miatras ang maong kasundalohan, nga nagtugot sa mabinantayong mga Kristohanon sa pagkalagiw. Upat ka tuig human niana, ang siyudad gilaglag sa Romanong kasundalohan ilalom ni Heneral Tito.
Nahinumdom Ka Ba?
• Nganong ang ubang Hebreohanong mga Kristohanon naanod gikan sa matuod nga pagtuo?
• Sa unsang paagi kita makapaminaw pag-ayo diha sa Kristohanong mga tigom?
• Unsay motabang kanato aron makabenepisyo gikan sa personal nga pagtuon sa Bibliya ug pagpamalandong?
[Mga Pangutana sa Pagtuon]
[Hulagway sa panid 11]
Ang Hebreohanong mga Kristohanon kinahanglang magmaalisto sa nagkaduol nga kalaglagan sa Jerusalem
[Hulagway sa panid 13]
Ang mga ginikanan makatabang sa ilang mga anak sa pagbenepisyo gikan sa Kristohanong mga tigom