“Umari Kanako, . . . ug Ako Magapalagsik Kaninyo”

Mga Batan-on nga Nahisama sa Makapalagsik nga mga Yamog

WALAY duhaduha nga gilakip ni Jesu-Kristo ang iyang batan-ong mga sumusunod sa dihang siya miingon: “Umari kanako, . . . ug ako magapalagsik kaninyo.” (Mateo 11:28) Sa dihang gidala sa mga tawo ang ilang nga anak ngadto kaniya, ang iyang mga tinun-an misulay sa pagpugong kanila. Apan si Jesus miingon: “Pasagdi ang mga bata nga moduol kanako; ayaw sila pagpugngi.” “Gikugos [pa gani ni Jesus] ang mga bata ug gipanalanginan sila.” (Marcos 10:14-16) Walay duhaduha nga giisip ni Jesus ang mga bata nga bililhon.

Ang Bibliya nag-asoy bahin sa matinumanong mga batan-ong lalaki ug babaye, maingon man ang mga gagmayng bata, nga naghatag ug maayo kaayong panig-ingnan diha sa pag-alagad sa Diyos. Gitagna sa basahon sa mga Salmo ang usa ka “pundok sa mga batan-on” nga makapalagsik sama sa mga yamog. Naghisgot usab kini bahin sa “mga batan-ong lalaki” ug “mga ulay” nga nagdayeg sa ngalan ni Jehova.—Salmo 110:3; 148:12, 13.

Usa ka Dapit Diin Mouswag ang mga Batan-on

Haom nga ipakasama sa yamog ang mga batan-on, tungod kay ang yamog may kalambigitan sa kadagaya ug panalangin. (Genesis 27:28) Ang mga yamog mabugnaw ug makapalagsik. Niining panahon sa presensiya ni Kristo, daghang batan-ong mga Kristohanon ang kinabubut-on ug maikagon nga nagtanyag sa ilang kaugalingon. Sama sa makapalagsik nga mga yamog, daghang batan-ong lalaki ug babaye ang malipayong nag-alagad sa Diyos ug nagtabang sa ilang mga isigkamagsisimba.—Salmo 71:17.

Ang Kristohanong mga batan-on makapalagsik dili lamang alang sa uban; sila mismo nakakaplag ug kalagsik diha sa ilang pag-alagad. Ang organisasyon sa Diyos nagtaganag usa ka palibot diin sila mahimong mouswag. Tungod kay naghupot ug hataas nga moral, ang mga batan-ong lalaki ug babaye nagtagamtam ug suod nga relasyon uban sa Diyos. (Salmo 119:9) Sulod sa kongregasyon, nakigbahin usab sila sa maayong mga kalihokan ug nakakitag maayong mga higala—mga butang nga makapahimo sa kinabuhi nga mas makapatagbaw ug makahuloganon.

‘Usa ka Kaayohan ug Kalagsik’

Gibati ba sa mga batan-on nga sila nahisama sa “mga yamog”? Himamata si Tania, usa ka batan-ong babaye nga aktibong nakigbahin sa mga kalihokan sa kongregasyon ug malipayong naggugol ug kapin sa 70 ka oras kada bulan diha sa ministeryo. Unsay iyang gibati? “Gibati ko nga napalagsik ug nadasig,” siya miingon. “‘Usa ka kaayohan ug kalagsik’ alang kanako nga si Jehova ug ang iyang yutan-ong organisasyon nahimong bahin sa akong kinabuhi.”—Proverbio 3:8.

Si Ariel, laing batan-on nga bug-os-panahong ministro, nagpabili sa espirituwal nga pagkaon nga iyang madawat sulod sa kongregasyon. “Sa dihang ako motambong sa Kristohanong mga tigom, kombensiyon, ug mga asembliya ug makakaon  diha sa espirituwal nga lamesa ni Jehova, kini makapalagsik gayod kanako sa espirituwal nga paagi,” matod niya. “Ug nadasig ako sa pagkahibalo nga sa tibuok kalibotan, ako adunay kaubang mga magbubuhat.” Sa paghubit sa kinalabwang tinubdan sa kalagsik, siya miingon: “Pagkamakapalagsik nga mahimong higala si Jehova, ilabina sa dihang akong madungog o makita ang grabeng mga epekto niining sistemaha sa kalibotan nganha sa mga tawo.”—Santiago 2:23.

Sa panuigon nga 20 anyos, si Abishai nag-alagad ingong usa ka bug-os-panahong ebanghelisador ug ministeryal nga alagad sa kongregasyon. Iyang gihubit ang iyang eksperyensiya niining mga pulonga: “Gibati kong nalagsik tungod kay akong nahibaloan kon unsaon pagsagubang ang daghang problema nga giatubang sa mga batan-on karong adlawa. Ang kamatuoran nga gikan sa Bibliya nakatabang kanako sa pagsentro kanunay sa akong pagtagad sa kon unsay gikinahanglan aron makaalagad kang Jehova nga bug-os-kalag.”

Sa sayong bahin sa iyang pagkatin-edyer, si Antoine dali rang masuko. Kas-a iyang gibunalan ug lingkoranan ang usa ka isigkaestudyante, ug gidunggab niya ug lapis ang lain pa. Si Antoine dili gayod makapalagsik nga tawo! Apan ang instruksiyon gikan sa Bibliya nakapausab sa iyang panggawi. Karon 19 anyos na ug nag-alagad ingong usa ka ministeryal nga alagad ug bug-os-panahong ministro diha sa kongregasyon, siya miingon: “Ako nagpasalamat kang Jehova tungod sa pagtugot kanako nga makabatog kahibalo bahin kaniya ug sa pagtabang kanako nga masabtan ang panginahanglan sa pagpugong sa kaugalingon ug sa pag-usab sa akong dalan. Tungod niini, nalikayan ko ang daghang problema.”

Namatikdan sa uban ang makapalagsik nga tinamdan sa batan-ong mga Kristohanon. Si Matteo maoy usa ka batan-ong Saksi sa Italya. Ang iyang magtutudlo mihukom nga ang tanan diha sa klase nga mamalikas kinahanglang mobayad ug gamayng multa. Wala madugay sa ulahi, mihangyo ang mga bata nga kuhaon ang maong lagda tungod kay, matod nila, “imposible nga dili makapamalikas.” “Apan,” matod ni Matteo, “ang maestra miingon nga dili kini imposible, ug gigamit ko niya, nga usa sa mga Saksi ni Jehova, ingong panig-ingnan, nga nagdayeg kanako atubangan sa tibuok klase tungod sa akong hinlong sinultihan.”

Sa usa ka gubot nga klasehanan sa Thailand, ang magtutudlo nagpabarog sa 11-anyos nga si Racha atubangan sa klase ug nagdayeg kaniya tungod sa iyang pamatasan, nga nag-ingon: “Nganong dili ninyo himoon siyang sulondan? Siya kugihang magtuon ug maayog pamatasan.” Dayon iyang giingnan ang mga estudyante: “Maayo tingali nga mahimo mong usa sa mga Saksi ni Jehova, sama kang Racha, aron moarang-arang ang inyong pamatasan.”

Makalilipay ang pagkakita sa libolibo ka Kristohanong mga batan-on nga mas makaila kang Jehova ug mobuhat sa iyang kabubut-on. Ang maong dalayegong mga batan-on nagpakitag kaalam nga sagad makaplagan sa mga tigulang na. Ang Diyos makatabang kanila nga molampos sa ilang presenteng kinabuhi ug makahatag kanilag mahimayaong kaugmaon sa umaabot nga bag-ong kalibotan. (1 Timoteo 4:8) Diha sa umaw sa espirituwal nga presenteng sistema sa mga butang, nga puno sa di-tagbaw ug nahigawad nga mga batan-on, ang Kristohanong mga batan-on nagpasundayag ug makapalagsik nga kalainan!