Nahinumdom Ka Ba?

Nalingaw ka ba sa pagbasa sa di pa dugayng mga isyu sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Sa unsang paagi makapanalipod ang “katakos sa panghunahuna”? (Proverbio 1:4)

Kini makapaalerto kanato sa espirituwal nga mga kapeligrohan ug makapalihok kanato sa pagplano ug usa ka maalamong buhat, sama sa paglikay sa seksuwal nga mga tentasyon diha sa trabahoan. Motabang kini kanato sa pag-ila nga dili-hingpit ang mga isigka-Kristohanon, nga makapalikay kanato nga magmahinaykon sa dihang maglagot. Makapalikay usab kini kanato sa sobrang pagpangagpas sa materyal nga mga butang nga makapadaot na hinuon sa atong espirituwalidad.—8/15, mga panid 21-4.

• Sa unsang paagi ang usa ka tawo mahimong usa ka maayong silingan?

Ang duha ka paagi aron mahimong usa ka maayong silingan mao ang pagkahimong maayong tighatag ug mapasalamatong tigdawat. Bililhon ang pagkahimong usa ka maayong silingan sa dihang mohampak ang mga kalisdanan. Ang mga Saksi ni Jehova naningkamot nga mahimong maayong mga silingan pinaagi sa pagpasidaan sa uban maylabot sa nagsingabot nga panghitabo, nga mao ang buhat sa Diyos sa pagtapos sa pagkadaotan.—9/1, mga panid 4-7.

• Sumala sa Bibliya, kinsa ang tinuod nga mga santos, ug sa unsang paagi sila motabang sa mga tawo?

Ang tanang unang mga Kristohanon maoy tinuod nga mga santos, o mga balaan, ug ang Diyos maoy naghimo kanila nga ingon ug dili mga tawo o mga organisasyon. (Roma 1:7) Sa dihang banhawon ngadto sa langitnong kinabuhi, ang mga balaan makig-ambit kang Kristo sa pagpanalangin sa mga matinumanon dinhi sa yuta. (Efeso 1:18-21)—9/15, mga panid 5-7.

• Unsay kapuslanan kon ang mga Kristohanon dunay nahibaloan bahin sa atletikong mga bangga sa karaang Gresya?

Ang mga sinulat ni apostol Pedro ug Pablo dunay mga ilustrasyon o mga paghisgot maylabot sa karaang mga dula. (1 Corinto 9:26; 1 Timoteo 4:7; 2 Timoteo 2:5; 1 Pedro 5:10) Hinungdanon alang sa karaang atleta ang pagbaton ug maayong tigbansay, pagpugong sa kaugalingon, ug nga duna gayoy tumong ang iyang mga paghago. Ingon usab niana ang bahin sa espirituwal nga mga paghago sa mga Kristohanon karon.—10/1, mga panid 28-31.

• Unsa ang mga hagit ug mga ganti sa pagmatuto ug mga anak diha sa langyawng nasod?

Daghang anak ang mas daling makakat-on ug bag-ong pinulongan kay sa ilang mga ginikanan, kinsa malisdan tingali sa pagsabot sa hunahuna ug mga reaksiyon sa ilang mga anak. Ug ang mga anak malisdan tingali sa pagsabot sa mga pagtulon-an sa Bibliya diha sa pinulongan sa ilang mga ginikanan. Apan, ang bugkos sa pamilya mapalig-on samtang itudlo sa mga ginikanan ang ilang pinulongan ngadto sa ilang mga anak, kinsa sa ingon mahibalo ug duha ka pinulongan ug masinati ug duha ka kultura.—10/15, mga panid 22-6.

• Nganong hinungdanon ang pagkat-on sa pagpangayog pasaylo?

Ang kinasingkasing nga pagpangayog pasaylo kasagarang maoy usa ka paagi aron maulian ang nadaot nga relasyon. Ang Bibliya naghatag ug mga pananglitan sa gahom sa pagpangayog pasaylo. (1 Samuel 25:2-35; Buhat 23:1-5) Kasagaran, kon ang duha ka tawo may panagbingkil, silang duha dunay sayop. Busa, silang duha kinahanglang magpahiuyon ug mangayog pasaylo.—11/1, mga panid 4-7.

• Nganong daotan ang pagsugal bisag sa ginagmay lang nga kantidad?

Ang pagsugal makapukaw sa pagpaimportante sa kaugalingon, sa espiritu sa pakigkompetensiya, ug kadalo, nga gisaway sa Bibliya. (1 Corinto 6:9, 10) Daghang nagiyan sa sugal ang nagsugod sa linghod nga pangedaron pinaagi sa ginagmayng mga pusta.—11/1, panid 31.

• Sanglit daghang basahon sa Bibliya ang gisulat sa Grego, nganong kinahanglan pa man nga hubaron ang Bibliya sa Grego, ug unsay mga resulta?

Ang modernong Grego medyo lahi kay sa Grego sa Septuagint nga hubad sa Hebreohanong Kasulatan ug sa Kristohanon Gregong Kasulatan. Sa di pa dugayng kasiglohan makadaghang gisulayan ang paghubad sa pipila ka bahin o sa tibuok nga Bibliya ngadto sa komong sinultihan nga Grego. Karon, dunay mga 30 ka hubad sa Bibliya, sa bug-os o sa bahin, nga masabtan sa ordinaryong Grego, ug ang usa ka talagsaong hubad mao ang Bag-ong Kalibotang Hubad sa Balaang Kasulatan, nga gipatik niadtong 1997.—11/15, mga panid 26-9.

• Nganong ang mga Kristohanon wala baori sa paghatag ug ikapulo?

Ubos sa Balaod nga gihatag ngadto sa karaang Israel, ang paghatag ug ikapulo maoy usa ka paagi sa pagsuportar sa tribo ni Levi ug sa pag-atiman sa mga nanginahanglan. (Levitico 27:30; Deuteronomio 14:28, 29) Ang haladnong kamatayon ni Jesus naghanaw sa Balaod lakip na sa paghatag ug ikapulo. (Efeso 2:13-15) Sa unang kongregasyon, ang sumbanan mao nga mohatag ang matag Kristohanon sumala sa iyang maarangan ug segun sa ihukom sa iyang kasingkasing. (2 Corinto 9:5, 7)—12/1, mga panid 4-6.

• Ang Pinadayag 20:8 nagpasabot ba nga sa kataposang pagsulay, si Satanas magpahisalaag ug daghan kaayong tawo?

Ang teksto nag-ingon nga kadtong mapahisalaag ingon unya ka daghan “sa balas sa dagat.” Sa Bibliya, kana nga ekspresyon kasagarang nagkahulogan ug wala mahibaloing gidaghanon, nga wala magpasabot nga kini daghan kaayo. Ang binhi ni Abraham, nga gitagna nga “sama sa mga lugas sa balas nga anaa sa baybayon,” nahibaloan sa ulahi nga 144,000 ka tawo, gawas pa kang Jesu-Kristo. (Genesis 22:17; Pinadayag 14:1-4)—12/1, panid 29.