“Aron Ipaila ang Ngalan ni Jehova”

SA TIBUOK KALIBOTAN, Ang Bantayanang Torre ug ang kaubang magasin nga Pagmata! gipabilhan tungod sa espirituwal nga unod ug matulon-anong bili niini. Nga namalandong bahin niini, usa ka magbabasa sa Pransiya di pa dugay nagsulat:

“Usa ako ka batan-ong babaye, taga-Aprika kaniadto, nga gamay rag grado. Di pa dugay, ako misugod pagbasa sa inyong mga magasin. Tungod kay nadani ako sa mga ulohan, akong nadiskobrehan ang kaayohan sa pagbasa. Pinaagi sa inyong mga magasin, ang akong bokabularyo nadugangan ug makahimo na akog sulat nga diyutay na lag mga sayop.

“Nahingangha ako nga kamo nagpatik ug mga artikulo bahin sa tanang ulohan maylabot sa mga tawo, sa planetang yuta, ug sa Maglalalang. Kining mga artikuloha daling sabton nga maghimo sa usa ka tawo nga himasa. Walay lain ang may katakos sa pagtudlo sa tanang matang sa mga tawo sa samang panahon.

“Natingala usab ako sa dihang akong nahibaloan nga kining tanan inyong gihimo nga wala magpaganansiya kondili aron ipaila gayod ang ngalan ni Jehova. Nahibalo ako nga kamo iyang giuyonan, ug ako mapasalamaton kaninyo. Palihog sa pagpadayon sa pagbatog kusog gikan sa Maglalalang aron kamo makapanudlo.”

Ang mga Saksi ni Jehova sa pagkakaron nagahimo sa ilang edukasyonal nga buluhaton sa Bibliya diha sa 235 ka nasod. Ang Bantayanang Torre gipatik diha sa 148 ka pinulongan ug ang Pagmata! sa 87. Kining mga magasina wala patika aron madayeg si bisan kinsa. Ang tambag nga gipasukad sa Bibliya ug ang kinaulahiang impormasyon nga makaplagan diha niana gidisenyo sa pagpasidungog sa Maglalalang, nga miingon: “Ako, si Jehova, mao . . . ang Usa nga nagtudlo kanimo aron ikaw makabaton ug kaayohan.” (Isaias 48:17) Hinaot makabaton kag kaayohan pinaagi sa pagbasa nga makanunayon sa Balaang Kasulatan ginamit kining mga tabang sa pagtuon sa Bibliya.