Mga Pangutana Gikan sa mga Magbabasa

Asa na unya ang mga demonyo panahon sa Usa ka Libo ka Tuig nga Pagmando ni Kristo?

Ang Bibliya wala mohatag ug espesipikong tubag niini nga pangutana. Hinunoa, posible natong makab-ot ang usa ka makataronganong konklusyon kon asa na unya ang mga demonyo panahon sa Milenyal nga Pagmando ni Kristo.

Sa paghatag ug pasiunang pagtan-aw sa mahitabo unya sa sinugdanan ug sa kataposan sa Milenyo, si apostol Juan miingon: “Nakita ko ang usa ka manulonda nga mikunsad gikan sa langit nga may dalang yawi sa kahiladman ug usa ka dakong kadena. Ug iyang gidakop ang dragon, ang orihinal nga halas, nga mao ang Yawa ug Satanas, ug gigapos siya sulod sa usa ka libo ka tuig. Ug iyang gitambog siya sa kahiladman ug gisirhan kini ug gitimbrehan kini sa ibabaw niya, aron dili na siya makapahisalaag pa sa kanasoran hangtod nga matapos ang usa ka libo ka tuig. Human niining mga butanga kinahanglang buhian siya sa makadiyot.” (Pinadayag 20:1-3) Kining mga bersikuloha naghisgot lamang bahin sa pagtambog kang Satanas sa kahiladman ug sa pagbuhi kaniya sa ulahi sulod sa mubong yugto. Bisan tuod wala hisgoti ang mga demonyo, makataronganon lamang ang paghunahuna nga sa dihang ang manulonda nga dunay yawi sa kahiladman—ang gihimaya nga Jesu-Kristo—modakop ug motambog sa Yawa ngadto sa kahiladman, ingon usab niana ang iyang buhaton sa mga demonyo.—Pinadayag 9:11.

Sa dihang nahimong Hari sa langit sa 1914, si Jesu-Kristo milihok sa paagi nga may dako kaayong epekto kang Satanas maingon man sa mga demonyo. Ang Pinadayag 12:7-9 nagkanayon: “Miulbo ang gubat sa langit: Si Miguel ug ang iyang mga manulonda nakiggubat sa dragon, ug ang dragon ug ang mga manulonda niini [mga demonyo] nakiggubat apan kini wala makadaog, ni may dapit pa alang kanila sa langit. Busa gitambog ang dakong dragon, ang orihinal nga halas, ang usa nga gitawag Yawa ug Satanas, nga nagpahisalaag sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.” Sukad niadto, si Satanas ug ang iyang mga demonyo natanggong na dinhi sa yuta. Makataronganon ang paghunahuna nga sa dihang limitehan pa gayod ni Jesu-Kristo ang kalihokan ni Satanas aron mawala na ang iyang daotang impluwensiya sa yuta, buhaton usab Niya kini sa mga demonyo.

Tagda usab ang unang tagna sa Bibliya. Kini nag-ingon: “Ibutang ko [Diyos] ang panag-away tali kanimo [Satanas] ug sa babaye [langitnong organisasyon ni Jehova] ug tali sa imong [Satanas] binhi ug sa iyang binhi [Jesu-Kristo]. Siya magsamad kanimo sa ulo ug ikaw magsamad kaniya sa tikod.” (Genesis 3:15) Ang pagsamad sa ulo sa halas naglakip sa pagtambog kang Satanas ngadto sa kahiladman panahon sa Usa ka Libo ka Tuig nga Pagmando ni Kristo. Ang tagna nagpadayon sa pag-ingon nga dunay panag-away tali sa Usa nga maoy magsamad ug sa binhi ni Satanas. Apil sa dili-makita nga bahin niini nga binhi, o organisasyon, mao ang daotang mga manulonda, o mga demonyo. Busa makataronganon ang pag-ingon nga sa dihang itambog ni Jesus si Satanas sa kahiladman, iya usab nga gaposon ug itambog sa kahiladman ang mga demonyo. Sanglit ang daotang mga espiritu nalisang kaayo sa kahiladman, kini nagpaila nga sila nasayod bahin sa pagtambog kanila sa umaabot.—Lucas 8:31.

 Apan, posible kaha nga wala hisgoti sa Pinadayag 20:1-3 ang mga demonyo tungod kay laglagon sila sa Armagedon apil sa makitang bahin sa binhi ni Satanas? Gipakita sa Bibliya nga malagmit dili kini ang mahitabo. Mahitungod sa dangatan ni Satanas sa kataposan, kini nag-ingon: “Ang Yawa nga nagpahisalaag kanila gitambog ngadto sa linaw nga kalayo ug asupre, diin atua na ang mapintas nga mananap ug ang mini nga manalagna; ug sila pagasakiton adlaw ug gabii hangtod sa kahangtoran.” (Pinadayag 20:10) Ang mapintas nga mananap ug ang mini nga manalagna naghulagway sa politikanhong mga ahensiya ug bahin sila sa makitang organisasyon ni Satanas. (Pinadayag 13:1, 2, 11-14; 16:13, 14) Kini malaglag sa Armagedon, sa dihang dugmokon ug taposon sa Gingharian sa Diyos ang tanang gingharian sa kalibotan. (Daniel 2:44) Ang Bibliya naghisgot bahin sa “kalayo nga walay kataposan nga giandam alang sa Yawa ug sa iyang mga manulonda.” (Mateo 25:41) Si Satanas ug ang iyang mga demonyo itambog sa “linaw nga kalayo ug asupre” kauban sa mapintas nga mananap ug mini nga manalagna tungod kay sila usab laglagon sa walay kataposan. Kon ang dili makita nga espirituhanon ug mas gamhanan nga bahin sa binhi ni Satanas laglagon sa Armagedon, ang mga demonyo gihisgotan unta nga anaa na sa simbolikong linaw uban sa mapintas nga mananap ug mini nga manalagna. Sila wala hisgoti sa Pinadayag 20:10, busa kini nagpakita nga ang mga demonyo dili laglagon sa Armagedon.

Sanglit dili direktang gisulti ang pagtambog sa mga demonyo ngadto sa kahiladman, dili usab espesipiko nga gisulti ang pagpagawas kanila gikan niini. Apan, sila ug ang Yawa parehas ug dangatan. Human buhian uban sa Yawa ug makigduyog kaniya panahon sa kataposang pagsulay sa katawhan sa hinapos sa usa ka libo ka tuig, ang mga demonyo usab itambog ngadto sa linaw nga kalayo ug sa ingon makaagom ug walay-kataposang kalaglagan.—Pinadayag 20:7-9.

Busa, bisan tuod ang Pinadayag 20:1-3 naghisgot lamang sa pagdakop ug pagtambog kang Satanas sa kahiladman sa kawalay-kalihokan, kita makataronganong makahinapos nga ang iyang mga manulonda usab gaposon ug itambog sa kahiladman. Si Satanas ug ang iyang panon sa mga demonyo dili tugotan sa pagbalda sa katumanan sa katuyoan sa Diyos sa paghimo sa yuta nga usa ka paraiso ug sa pagpasig-uli sa mga tawo ngadto sa kahingpitan panahon sa Usa ka Libo ka Tuig nga Pagmando ni Kristo.