Nagtuo Ka ba nga Aduna Gayoy Yawa?

ANG Kasulatan nagbatbat sa Yawa ingong tinuod nga persona. Siya dili makita sa mga tawo sama sa Diyos. “Ang Diyos maoy Espiritu,” nag-ingon ang Bibliya. (Juan 4:24) Ang Yawa maoy usa ka espiritung linalang. Hinuon, dili sama sa Maglalalang, ang Yawa adunay sinugdanan.

Dugay na sa wala pa lalanga ni Jehova nga Diyos ang mga tawo, naglalang siyag daghang espiritung mga linalang. (Job 38:4, 7) Diha sa Bibliya kining mga espirituha gitawag ug mga manulonda. (Hebreohanon 1:13, 14) Silang tanan hingpit sa dihang gilalang sa Diyos—walay usa kanila ang yawa o may daotang kinaiya. Nan, sa unsang paagi mitungha ang Yawa? Ang pulong “yawa” nagkahulogang “mabutangbutangon” ug sa ingon nagtumong sa usa ka indibiduwal nga mapasipalahong nagbutangbutang sa uban. Ang “Satanas” nagkahulogang “Magsusukol,” o magsusupak. Maingon nga ang usa ka matinud-anong tawo kanhi nahimong kawatan tungod kay siya nangawat, ang usa ka hingpit nga espirituhanong anak sa Diyos nagtuman sa iyang daotang tinguha ug naghimo sa iyang kaugalingon nga Satanas nga Yawa. Ang Bibliya nagpatin-aw kon sa unsang paagi mahimong daoton sa usa ka tawo ang iyang kaugalingon niining paagiha: “Ang matag usa masulayan pinaagi sa pagkaganoy ug pagkahaylo sa iyang kaugalingong tinguha. Unya ang tinguha, sa dihang kini makapanamkon na, manganak ug sala; unya, ang sala, sa dihang kini mahingpit na, manganak ug kamatayon.”—Santiago 1:14, 15.

Dayag nga kini ang nahitabo. Sa dihang gilalang ni Jehova nga Diyos ang unang tawhanong magtiayon, si Adan ug Eva, gipanid-an kini sa usa ka manulonda nga hapit nang morebelde sa Diyos. Nahibalo siya nga gisugo ni Jehova si Adan ug Eva nga pun-on ang yuta ug matarong nga mga tawo, nga magsimba sa Maglalalang. (Genesis 1:28) Nakita ning maong manulonda nga duna siyay kahigayonan nga makaangkon ug dungog ug kahalangdon. Kay gitukmod sa kahakog, gusto niyang maangkon ang usa ka butang nga angay lamang ihatag sa Maglalalang—ang pagsimba sa mga tawo. Imbes isalikway kanang daotang tinguha, kini nga espiritung anak sa Diyos nagsigeg hunahuna niana hangtod nga misangpot kini sa pagpamakak ug dayon pagrebelde. Tagda kon unsay iyang gihimo.

Ang rebelyosong manulonda migamit ug bitin  aron sa pagpakig-estorya sa unang babaye, si Eva. “Tinuod ba nga miingon ang Diyos nga dili gayod kamo makakaon gikan sa tanang kahoy sa tanaman?” nangutana ang bitin kang Eva. Sa dihang gisulti ni Eva ang sugo sa Diyos ug ang silot kon supakon kana, ang bitin miingon: “Dili gayod kamo mamatay. Kay nasayod ang Diyos nga sa mismong adlaw nga kamo mokaon gikan niini [sa kahoy nga anaa sa taliwala sa tanaman] ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.” (Genesis 3:1-5) Ang akusasyon mao nga ang Diyos wala magsulti kang Adan ug Eva sa tinuod. Pinaagi sa pagkaon sa bunga nianang kahoya, si Eva mahisama kono sa Diyos, nga aduna nay katungod sa pagdesisyon kon unsay maayo ug kon unsay daotan. Kana ang unang bakak nga gisulti sukad masukad. Ang pagsulti niana naghimo sa maong manulonda nga usa ka mabutangbutangon. Nahimo usab siyang magsusupak sa Diyos. Busa ang Bibliya nag-ila niini nga kaaway sa Diyos ingong “ang orihinal nga halas, ang usa nga gitawag Yawa ug Satanas.”—Pinadayag 12:9.

“Magmabinantayon”

Ang bakak nga gisulti sa Yawa kang Eva milampos gayod sumala sa iyang giplano. Ang Bibliya nag-ingon: “Niana nakita sa babaye nga ang kahoy maayong kan-on ug nga kini takos pangandoyon sa mga mata, oo, ang kahoy tilinguhaong tan-awon. Busa siya mikuha sa bunga niini ug mikaon niini. Human niana siya mihatag usab ug pipila sa iyang bana sa dihang nahiuban na kaniya ug siya mikaon niini.” (Genesis 3:6) Si Eva mituo kang Satanas ug misupak sa Diyos. Iya pa ganing nadala si Adan sa pagsupak usab sa balaod sa Diyos. Busa ang Yawa milampos sa pag-agni sa unang magtiayon sa pagrebelde sa Diyos. Sukad niadto, si Satanas adunay dili-makitang impluwensiya sa mga kalihokan sa tawo. Unsay iyang tumong? Ang pagpahilayo sa mga tawo gikan sa pagsimba sa matuod nga Diyos ug siya na ang ilang simbahon. (Mateo 4:8, 9) Nan, uban sa maayong katarongan nga ang Kasulatan nagpasidaan: “Hupti ninyo ang maayong panghunahuna, magmabinantayon. Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob.”—1 Pedro 5:8.

Klaro kaayo ang pagkabatbat sa Bibliya sa Yawa ingong tinuod nga espiritung persona—usa ka manulonda nga nahimong daotan ug makuyaw! Ang unang hinungdanong lakang nga atong himoon aron kita makapabiling mabinantayon mao ang pag-ila sa kamatuoran nga siya naglungtad gayod. Apan dili kay kana ra ang nalangkit sa paghupot sa atong maayong panghunahuna ug pagpabiling mabinantayon. Hinungdanon usab nga kita dili maignorante sa mga “laraw” ni Satanas ug sa iyang mga pamaagi sa paglimbong sa mga tawo. (2 Corinto 2:11) Unsa ang iyang mga pamaagi? Ug sa unsang paagi kita makabarog nga malig-on batok niini?

Pahimuslan sa Yawa ang Kinaiyanhong Panginahanglan sa Tawo

Ang Yawa nagmatikod na sa mga tawo sukad pa sa paglalang sa katawhan. Nahibalo siya sa pagkagama sa tawo—sa iyang mga panginahanglan, interes, ug tinguha. Nahibalo pag-ayo si Satanas nga ang tawo gilalang nga may espirituwal nga panginahanglan, ug gipahimuslan pag-ayo sa Yawa kini nga panginahanglan. Sa unsang paagi? Pinaagi sa pagsulti sa katawhan ug relihiyosong kabakakan. (Juan 8:44) Daghang relihiyosong mga pagtulon-an bahin sa Diyos ang nagkasumpaki ug makalibog. Kinsa ba ang ilabinang interesado niini? Dili gayod mahimong tinuod ang nagkasumpaking mga pagtulon-an. Nan, dili ba posible nga ang daghang relihiyosong mga pagtulon-an klarong gilaraw ug gigamit ni Satanas aron mahisalaag ang mga tawo? Sa pagkatinuod, ang Bibliya nagtumong kaniya ingong “ang diyos niining sistema sa mga butang,” nga nagbuta sa hunahuna sa mga tawo.—2 Corinto 4:4.

Ang kamatuoran bahin sa Diyos makapanalipod sa usa ka tawo batok sa relihiyosong panglimbong. Gipakasama sa Bibliya ang kamatuoran sa Pulong sa Diyos ngadto sa usa ka bakos nga gitaod sa mga sundalo sa karaang panahon aron mapanalipdan  ang ilang mga hawak. (Efeso 6:14) Kon magkuha kag kahibalo bahin sa Bibliya ug ipadapat gayod kana, nga samag gibakos nimo kana, ang Pulong sa Diyos manalipod kanimo aron dili ka mahisalaag sa relihiyosong kabakakan ug kasaypanan.

Ang tinguha sa tawo nga adunay pagasimbahon mitultol kaniya sa pagsusi sa butang nga wala niya mahibaloi. Kini nagladlad kaniya sa lain pang tusong mga pamaagi ni Satanas. Aron mapahimuslan ang pagkamausisahon sa tawo bahin sa kon unsay katingad-an ug misteryoso, gigamit ni Satanas ang espiritismo aron daghan ang iyang makontrolar. Maingon nga ang usa ka mangangayam mogamit ug paon aron madani ang iyang ayamon, si Satanas naggamit sa mga pagpanag-an, astrolohiya, hipnotismo, pagpamarang, panghimalad, ug salamangka aron madani ug mabitik ang mga tawo sa tibuok kalibotan.—Levitico 19:31; Salmo 119:110.

Sa unsang paagi imong mapanalipdan ang imong kaugalingon aron dili malit-agan sa espiritismo? Ang Deuteronomio 18:10-12 nag-ingon: “Walay makaplagan diha kanimo nga bisan kinsang magpaagi sa iyang anak nga lalaki o sa iyang anak nga babaye sa kalayo, bisan kinsa nga nagapanag-an, usa ka salamangkero o bisan kinsa nga nagapangitag mga tilimad-on o usa nga barangan, o usa nga tigpangdaot o bisan kinsa nga nagakonsultag espiritista o tigpanagna sa mga hitabo o bisan kinsa nga nagapakisayod sa mga patay. Kay bisan kinsa nga nagabuhat niining mga butanga dulumtanan kang Jehova, ug tungod niining dulumtanan nga mga butang si Jehova nga imong Diyos nagahingilin kanila gikan sa imong atubangan.”

Klaro ang tambag sa Kasulatan: Ayaw pagpalangkit sa espiritismo. Komosta kon nalangkit ka na sa espiritismo ug karon gusto nimong mahigawas niana? Imong masundog ang panig-ingnan sa unang mga Kristohanon sa siyudad sa Efeso. Sa dihang gidawat nila “ang pulong ni Jehova,” ang Bibliya nag-ingon, “ubay-ubay niadtong nanaggamit ug mga kalaki sa salamangka nagtapok sa ilang mga basahon ug nagsunog niini atubangan sa tanan.” Mahal kadtong mga libroha. Mibalor kadtog 50,000 ka pirasong plata. (Buhat 19:19, 20) Bisan pa niana, ang mga Kristohanon sa Efeso wala magpanuko sa pagsunog niana.

Pahimuslan ni Satanas ang mga Kahuyangan sa Tawo

Ang hingpit nga manulonda nahimong Satanas nga Yawa tungod kay siya nagpadaog sa tinguha nga bayawon ang kaugalingon. Gipukaw usab niya ang magarbohon ug mahakogong pangandoy ni Eva nga mahisama sa Diyos. Karong panahona, daghan ang gikontrolar ni Satanas pinaagi sa pagpukaw sa ilang pagbati sa garbo. Pananglitan, gibati sa pipila nga ang ilang rasa, tribo, o nasod mas maayo kay sa uban. Sukwahi gayod kini sa gitudlo sa Bibliya! (Buhat 10:34, 35) Ang Bibliya tin-awng nag-ingon: “Gihimo [sa Diyos] gikan sa usa ka tawo ang tanang nasod sa katawhan.”—Buhat 17:26.

Ang usa ka epektibong depensa batok sa pagpaningkamot ni Satanas sa pagpukaw sa garbo sa mga tawo mao ang pagkamapainubsanon. Ang Bibliya nag-awhag kanato nga “dili maghunahuna ug labaw bahin sa [atong] kaugalingon kay sa angay nga hunahunaon.” (Roma 12:3) “Ang Diyos magabatok sa mga mapahitas-on,” kini nag-ingon, “apan siya magahatag ug dili-takos nga kalulot sa  mga mapainubsanon.” (Santiago 4:6) Ang usa ka seguradong paagi sa pagsukol sa mga paningkamot ni Satanas mao ang pagpasundayag diha sa imong kinabuhi sa pagkamapainubsanon ug sa uban pang mga hiyas nga giuyonan sa Diyos.

Maikagon usab ang Yawa sa pagpahimulos sa kahuyangan sa tawo bahin sa unodnong mga tinguha. Gituyo ni Jehova nga Diyos nga ang tawo malipay sa pagkinabuhi. Sa dihang tagbawon ang maong mga tinguha sumala sa kabubut-on sa Diyos, moresulta kinig tinuod nga kalipay. Apan naningkamot si Satanas sa pagtental sa mga tawo sa pagtagbaw sa ilang mga tinguha diha sa imoral nga mga paagi. (1 Corinto 6:9, 10) Mas maayo pang isentro ang hunahuna sa mga butang nga putli ug dungganon. (Filipos 4:8) Kini motabang kanimo sa pagkontrolar pag-ayo sa imong hunahuna ug mga pagbati.

Padayong Sukli ang Yawa

Magmalamposon ka kaha sa pagsukol sa Yawa? Oo, magmalamposon ka. Ang Bibliya nagpasalig kanato: “Sukli ang Yawa, ug siya mokalagiw gikan kaninyo.” (Santiago 4:7) Bisan pag imong suklan si Satanas, siya dili dayon moundang sa pagsamoksamok kanimo samtang magkuha kag kahibalo bahin sa Diyos. Dili, ang Yawa mosulay na usab sa “laing angay nga higayon.” (Lucas 4:13) Hinunoa, dili ka angayng mahadlok sa Yawa. Kon magpadayon ka sa pagsukol kaniya, siya dili makapatalikod kanimo gikan sa matuod nga Diyos.

Apan, aron masuklan ang Yawa, kinahanglang mahibalo kita kon kinsa siya ug kon sa unsang paagi iyang gilimbongan ang katawhan ug kinahanglang mahibaloan usab nato kon unsaon pagpanalipod ang atong kaugalingon batok sa iyang mga laraw ug pamaagi. Aduna lay usa ka tukmang tuboran sa maong kahibalo—ang Pulong sa Diyos, ang Bibliya. Busa magmadeterminado sa pagtuon sa inspiradong Kasulatan, ug ipadapat sa imong kinabuhi ang imong nakat-onan gikan niana. Ang mga Saksi ni Jehova sa inyong dapit malipayng motabang kanimo nga walay bayad bahin sa maong pagtuon, sa panahon nga kombenyente alang kanimo. Palihog ayaw pagpanuko sa pagkontak kanila o pagsulat sa mga magpapatik niining magasina.

Samtang imong tun-an ang Bibliya, kinahanglan nimong masayran nga mahimong gamiton ni Satanas ang pagsupak o paglutos aron moundang ka sa pagkakat-on sa kamatuoran gikan sa Pulong sa Diyos. Ang pipila sa imong mga minahal masuko tingali kanimo tungod kay ikaw nagtuon sa Bibliya. Mahitabo kini tungod kay wala sila mahibalo niining kahibulongang mga kamatuoran nga imong nakaplagan diha niana. Tingali biaybiayon ka sa uban. Apan mahimuot kaha ang Diyos kon magpadaog ka sa maong mga pagsupak? Gusto sa Yawa nga maluya ka ug moundang sa pagkakat-on bahin sa matuod nga Diyos. Ayaw gayod padag-a si Satanas. (Mateo 10:34-39) Wala kay utang kaniya. Utang nimo kang Jehova ang imong kinabuhi. Nan, magmadeterminado sa pagsukol sa Yawa ug ‘lipaya ang kasingkasing ni Jehova.’—Proverbio 27:11.

[Hulagway sa panid 6]

Kadtong nahimong mga Kristohanon nagsunog sa ilang mga basahon sa espiritismo

[Hulagway sa panid 7]

Paghimog lig-ong desisyon sa pagtuon sa Bibliya