Mga Pangutana Gikan sa mga Magbabasa

Unsay gipasabot ni apostol Pablo sa dihang siya miingon nga ang mga babaye angayng “magpakahilom diha sa mga kongregasyon”?

Si Pablo misulat ngadto sa Kristohanong kongregasyon sa Corinto: “Ingon sa tanang kongregasyon sa mga balaan, ang mga babaye magpakahilom diha sa mga kongregasyon, kay wala itugot kanila nga mosulti.” (1 Corinto 14:33, 34) Aron husto ang atong pagsabot niini, makatabang ang pagkonsiderar sa konteksto sa tambag ni Pablo.

Sa 1 Corinto kapitulo 14, si Pablo naghisgot sa mga butang maylabot sa mga tigom sa Kristohanong kongregasyon. Iyang gihubit kon unsay angayng hisgotan diha sa maong mga tigom ug gihatag ang mga sugyot kon sa unsang paagi kana angayng dumalahon. (1 Corinto 14:1-6, 26-34) Dugang pa, iyang gipasiugda ang tumong sa Kristohanong mga tigom—“aron ang kongregasyon mapalig-on.”—1 Corinto 14:4, 5, 12, 26.

Ang instruksiyon ni Pablo sa ‘pagpakahilom’ tulo ka beses nga mabasa sa 1 Corinto kapitulo 14. Sa matag higayon, kini gitumong ngadto sa lahi nga grupo diha sa kongregasyon, apan kining tanan gihatag sa samang katarongan—nga ‘himoon ang tanang butang nga may kahapsay ug pinaagig kahikayan.’—1 Corinto 14:40.

Una, si Pablo miingon: “Kon adunay magasultig laing pinulongan, limitehan kini sa duha o tulo ang kinadaghanan, ug magturnohay; ug may usa nga mohubad. Apan kon walay maghuhubad, pahiloma na lang siya diha sa kongregasyon ug pasultiha sa iyang kaugalingon ug ngadto sa Diyos.” (1 Corinto 14:27, 28) Kana wala magpasabot nga ang maong tawo wala gayod tugoti sa pagsulti panahon sa mga tigom hinunoa kana nagpasabot nga adunay mga higayon nga siya angayng magpakahilom. Angayng hinumdoman nga ang tumong sa mga tigom—ang paglig-onay sa usag usa—dili makab-ot kon magsulti siya ug pinulongan nga dili masabtan.

Ikaduha, si Pablo nag-ingon: “Pasultiha ang duha o tulo ka manalagna, ug ang uban maoy mosabot sa kahulogan. Apan kon adunay pagpadayag ngadto sa usa samtang nagalingkod didto, pahiloma ang una.” Wala kini magkahulogan nga ang unang manalagna dili na mosulti panahon sa mga tigom, kondili nga siya kinahanglang magpakahilom usahay. Unya ang usa nga may milagrosong pagpadayag makahimo sa pagsulti ngadto  sa kongregasyon, ug ang tumong sa tigom—nga “ang tanan madasig”—mahimong makab-ot.—1 Corinto 14:26, 29-31.

Ikatulo, ang gitumong ni Pablo mao ang Kristohanong mga babaye lamang, nga nag-ingon: “Ang mga babaye magpakahilom diha sa mga kongregasyon, kay wala itugot kanila nga mosulti, apan magpasakop sila.” (1 Corinto 14:34) Nganong gihatag man ni Pablo kini nga sugo ngadto sa mga sister? Aron magpabilin ang kahusay diha sa kongregasyon. Siya nag-ingon: “Nan, kon may buot silang makat-onan, papangutan-a sila sa ilang mga bana sa balay, kay makauulaw alang sa usa ka babaye nga mosulti diha sa kongregasyon.”—1 Corinto 14:35.

Tingali ang pipila ka sister nakiglantugi sa gipanulti diha sa kongregasyon. Ang tambag ni Pablo nakatabang sa mga sister sa paglikay nianang badlonganong espiritu ug mapaubsanong magpasakop sa kahikayan ni Jehova sa pagkaulo, ilabina sa ilang mga bana. (1 Corinto 11:3) Dugang pa, pinaagi sa pagpakahilom, ikapakita sa mga sister nga wala sila mangandoy nga mahimong mga magtutudlo diha sa kongregasyon. Sa dihang nagsulat siya kang Timoteo, gipakita ni Pablo nga dili angay alang sa usa ka babaye nga manudlo diha sa kongregasyon: “Dili ako motugot sa usa ka babaye nga magtudlo, o magbuot sa lalaki, kondili magpakahilom lamang siya.”—1 Timoteo 2:12.

Nagpasabot ba kini nga ang usa ka Kristohanong babaye dili gayod mosulti panahon sa tigom sa kongregasyon? Wala gayod. Sa panahon ni Pablo, may mga higayon sa dihang ang Kristohanong mga babaye, tingali gitukmod sa balaang espiritu, nag-ampo o nanagna diha sa kongregasyon. Nianang mga okasyona, giila nila ang ilang posisyon pinaagi sa pagpandong sa ilang ulo. a (1 Corinto 11:5) Dugang pa, sa adlaw ni Pablo ug karon, giawhag ang mga igsoong babaye ug lalaki sa pagpahayag sa dayag sa ilang paglaom. (Hebreo 10:23-25) Gawas pa sa paghimo niini diha sa ministeryo sa kanataran, ang mga sister nagpahayag sa ilang paglaom ug nagdasig sa uban panahon sa mga tigom sa kongregasyon pinaagi sa paghatag ug maayong-pagkaandam nga mga komento sa dihang sila pakomentohon ug pinaagi sa pagdawat ug mga asaynment sa pagpakigbahin sa mga demonstrasyon o sa mga bahin sa estudyante diha sa Teokratikanhong Tunghaan sa Ministeryo.

Busa, ang Kristohanong mga babaye “magpakahilom” pinaagi sa dili pag-abaga sa papel sa lalaki ug pagpanudlo diha sa kongregasyon. Sila dili magpatunghag mga pangutana nga makahaling ug panaglantugi nga lagmit nagkuwestiyon sa awtoridad niadtong nanudlo diha sa kongregasyon. Pinaagi sa pagtuman sa ilang hustong papel diha sa kongregasyon, ang Kristohanong mga sister dakog ikatabang sa pagpatunghag malinawong atmospera diin “ang tanang butang [diha sa mga tigom sa kongregasyon maoy] alang sa pagpalig-on.”—1 Corinto 14:26, 33.

[Footnote]