Mga Pangutana Gikan sa mga Magbabasa

Kay ang mga Hudiyo gisugo man nga dili magbaton ug “bisan unsa nga may lebadura” panahon sa Paskuwa, nganong migamit man si Jesus ug bino—nga maoy produkto sa permentasyon—sa iyang gisugdan ang Memoryal sa iyang kamatayon?—Exodo 12:20; Lucas 22:7, 8, 14-20.

Ang pagsaulog sa Paskuwa, nga nagtimaan sa Exodo o paggawas sa mga anak sa Israel gikan sa Ehipto, gisugdan niadtong 1513 W.K.P. Sa paghatag ug mga instruksiyon alang sa pagsaulog niini, si Jehova miingon: “Walay bisan unsa nga may lebadura nga inyong pagakan-on. Sa tanan ninyong puloy-anan kamo magakaon sa mga tinapay nga walay igpapatubo.” (Exodo 12:11, 20) Ang maong pagdili sa Diyos aplikado lamang sa matang sa tinapay nga pagakan-on panahon sa Paskuwa. Wala hisgoti ang bino.

Ang pangunang hinungdan nga gidili ang lebadura maoy tungod kay dinalian ang paggawas sa mga Israelinhon gikan sa Ehipto. “Gipangdala sa katawhan ang ilang minasa nga harina sa wala pa kini mabutangi ug lebadura, uban sa ilang masahan nga mga pasong nga pinutos sa ilang mga kupo ibabaw sa ilang abaga,” nagpatin-aw ang Exodo 12:34. Ang pagkawalay lebadura panahon sa misunod nga mga pagsaulog sa Paskuwa magpahinumdom sa umaabot nga mga kaliwatan bahin sa maong hinungdanong hitabo.

Ngadtongadto, ang lebadura kasagarang giisip nga simbolo sa sala o pagkadaotan. Pananglitan, sa pagtumong sa usa ka tawong imoral sulod sa Kristohanong kongregasyon, si apostol Pablo nangutana: “Wala ba kamo mahibalo nga ang diyutayng lebadura magpatubo sa tibuok minasa?” Unya siya miingon: “Kuhaa ang daang lebadura, aron kamo mahimong bag-ong minasa, ingon nga kamo walay igpapatubo. Kay, sa pagkatinuod, si Kristo nga atong inihaw sa paskuwa gihalad na. Tungod niana atong saulogon ang pista, dili pinaagi sa daan nga lebadura, ni pinaagi sa lebadura sa kangil-aran ug pagkadaotan, kondili pinaagi sa mga tinapay nga walay igpapatubo sa katim-os ug sa kamatuoran.” (1 Corinto 5:6-8) Ang tinapay lamang nga walay lebadura ang mahimong gamiton ingong simbolo sa walay-sala nga tawhanong lawas ni Jesus.—Hebreohanon 7:26.

Ang paggamit ug bino panahon sa pagsaulog sa Paskuwa gidugang ra sa ulahi sa mga Hudiyo. Lagmit gidugang kadto sa ilang paghibalik gikan sa pagkadestiyero sa Babilonya. Walay talaan sa Bibliya nga gitutolan ang pagdugang sa bino, ug mao nga si Jesus tukmang makagamit ug bino sa pagpangaon sa Paskuwa. Hinuon, ang kinaiyanhong permentasyon nga nahitabo sa bino sa karaang panahon maoy lahi sa nahitabo maylabot sa tinapay. Sa kahimtang sa minasa, kinahanglan kanang dugangan ug lebadura. Ang bino nga ginama gikan sa ubas wala magkinahanglag lebadura. Ang ubas may mga sangkap na sa permentasyon. Wala nay purong duga sa ubas panahon sa Paskuwa kay moaslom na gayod kini sa maong panahon sa tingpamulak kay kini giani pa man sa tinghunlak.

Busa, ang paggamit ni Jesus ug bino ingong usa ka emblema sa Memoryal wala gayod masupak sa mga instruksiyon sa Paskuwa bahin sa lebadura. Ang bisan unsang pulang bino nga wala butangig pagpatam-is o dugangig alkohol, yerba ug mga pahumot nga lamas maoy haom nga gamiton ingong simbolo sa “bililhong dugo” ni Kristo.”—1 Pedro 1:19.