Pabilhi si Jesus—Ang Dakong David ug ang Dakong Solomon

“Tan-awa! ania ang usa nga labaw pa kay kang Solomon.”—MAT. 12:42.

1, 2. Sa panglantaw sa tawo, nganong katingalahan nga gisugo si Samuel sa pagdihog kang David aron mahimong hari?

 SA PANAN-AW ni manalagnang Samuel, si David mas angayan nga mahimong magbalantay sa karnero inay kay mahimong hari. Dugang pa, si David nagdako sa Betlehem, usa ka lungsod nga gihubit ingong “gamay kaayo aron mahiapil taliwala sa linibo sa Juda.” (Miq. 5:2) Busa wala maghunahuna si Samuel nga ang daw ordinaryong batan-on nga gikan sa usa ka gamayng lungsod maoy gipili ni Jehova nga mahimong hari. Bisan pa niana, si David hapit nang dihogan ni Samuel aron mahimong umaabot nga hari sa Israel.

² Si David, nga maoy kamanghoran sa walo ka anak nga lalaki ni Jese, ang kinaulahiang gipresentar ni Jese kang Samuel. Ug wala gani si David  sa ilang balay sa pag-abot ni Samuel aron dihogan nga mahimong sunod nga hari sa nasod. Apan si David ang gipili ni Jehova, ug kana ang hinungdanon.—1 Sam. 16:1-10.

3. (a) Unsay labing hinungdanon alang kang Jehova sa dihang siya magsusi sa usa ka tawo? (b) Unsay nahitabo human madihogi si David?

³ Nakita ni Jehova ang wala makita ni Samuel. Nasayod si Jehova kon unsay sulod sa kasingkasing ni David, ug kana nakapahimuot Kaniya. Ang hinungdanon sa Diyos mao ang pagkatawo, dili ang panggawas nga hitsura. (Basaha ang 1 Samuel 16:7.) Busa sa dihang nasayran ni Samuel nga si Jehova walay napilian sa pito ka magulang nga anak ni Jese, siya mihangyo nga ipatawag ang kinamanghoran nga didto sa sibsibanan. Ang asoy nag-ingon: “Dihadiha [si Jese] nagpasugo ug nagpapauli [kang David]. Karon siya mapulapula, usa ka batan-ong lalaki nga nindot ug mga mata ug ambongan ang panagway. Unya si Jehova miingon: ‘Barog, dihogi siya, kay mao kini siya!’ Busa gikuha ni Samuel ang sungay nga may lana ug gidihogan siya atubangan sa iyang mga igsoon. Ug ang espiritu ni Jehova milihok diha kang David sukad niadtong adlawa.”—1 Sam. 16:12, 13.

Si David Naghulagway Kang Kristo

4, 5. (a) Unsa ang pipila ka kaamgiran ni David ug ni Jesus? (b) Nganong si Jesus matawag man nga Dakong David?

⁴ Sama kang David, si Jesus natawo sa Betlehem, mga 1,100 ka tuig human matawo si David. Sa panan-aw sa daghan, si Jesus dili usab angayan nga mahimong hari. Sa ato pa, siya dili ang matang sa hari nga gilaoman sa daghang Israelinhon. Apan sama kang David, siya ang gipili ug gihigugma ni Jehova. a (Luc. 3:22) Ug sa dihang gidihogan si Jesus “ang espiritu ni Jehova” milihok usab diha kaniya.

⁵ Daghan pag kaamgiran si David ug si Jesus. Pananglitan, si David giluiban sa iyang magtatambag nga si Ahitopel, ug si Jesus giluiban sa iyang apostol nga si Judas Iskariote. (Sal. 41:9; Juan 13:18) Si David ug si Jesus may dakong kasibot alang sa templo ni Jehova. (Sal. 27:4; 69:9; Juan 2:17) Si Jesus manununod usab ni David. Sa wala pa matawo si Jesus, gisultihan sa usa ka manulonda ang iyang inahan: “Ihatag kaniya ni Jehova nga Diyos ang trono ni David nga iyang amahan.” (Luc. 1:32; Mat. 1:1) Apan tungod kay ang tanang tagna bahin sa Mesiyas matuman man diha kang Jesus, siya labaw kaayo kay kang David. Siya mao ang Dakong David, ang dugay nang gipaabot nga Mesiyanikong Hari.—Juan 7:42.

Sunda ang Hari ug Magbalantay

6. Sa unsang mga paagi si David usa ka maayong magbalantay?

⁶ Si Jesus usa usab ka magbalantay. Unsay mga hiyas sa usa ka maayong magbalantay? Siya makugihon ug maisogong mag-atiman, magpasibsib, ug manalipod sa iyang mga karnero. (Sal. 23:2-4) Ang batan-ong David usa ka maayong magbalantay, ug iyang giatiman pag-ayo ang mga karnero sa iyang amahan. Siya nagmaisogon sa dihang giatake ang mga karnero ug iya pa ganing gipameligro ang iyang kinabuhi aron mapanalipdan kini batok sa usa ka leyon ug sa usa ka oso.—1 Sam. 17:34, 35.

7. (a) Sa unsang paagi nabansay si David alang sa iyang mga katungdanan ingong hari? (b) Sa unsang paagi gipamatud-an ni Jesus nga siya Maayong Magbalantay?

⁷ Ang mga katuigan nga gigugol ni David sa kapatagan ug kabungtoran nga nagbantay sa mga karnero nagbansay kaniya alang sa mas bug-at nga mga responsibilidad sa pag-atiman sa nasod sa Israel. b (Sal. 78:70, 71) Gipakita usab ni Jesus nga siya sulondang magbalantay. Si Jehova naglig-on ug naggiya kaniya sa iyang pag-atiman sa iyang “gamayng panon” ug sa “ubang mga karnero.” (Luc. 12:32; Juan 10:16) Busa, si Jesus mao ang Maayong Magbalantay. Nakaila siya pag-ayo sa iyang panon mao nga iyang masangpit ang ngalan sa matag karnero. Gihigugma niya pag-ayo ang iyang mga karnero nga sa dinhi pa siya sa yuta siya kinabubut-ong nagsakripisyo alang sa ilang  kaayohan. (Juan 10:3, 11, 14, 15) Ingong Maayong Magbalantay, may nahimo si Jesus nga wala gayod mahimo ni David. Tungod sa halad lukat ni Jesus, ang katawhan mahimong maluwas gikan sa kamatayon. Walay bisan unsa nga makapugong kaniya sa paggiya sa iyang “gamayng panon” ngadto sa imortal nga kinabuhi sa langit ug sa iyang “ubang mga karnero” ngadto sa kinabuhing walay kataposan diha sa usa ka matarong nga bag-ong kalibotan nga walay samag-lobo nga mga manunukob.—Basaha ang Juan 10:27-29.

Sunda ang Madaogon nga Hari

8. Sa unsang paagi si David nahimong usa ka madaogon nga hari?

⁸ Ingong hari, si David maoy usa ka maisogon nga manggugubat nga nanalipod sa yuta sa katawhan sa Diyos, ug “si Jehova nagpadayon sa pagluwas kang David bisan diin siya moadto.” Sa iyang pagpanguna, milapad ang teritoryo sa Israel, gikan sa suba sa Ehipto paingon sa suba sa Euprates. (2 Sam. 8:1-14) Sa tabang ni Jehova, siya nahimong gamhanan kaayong magmamando. Ang Bibliya nag-ingon: “Ang kabantog ni David mikaylap sa tanang kayutaan, ug gibutang ni Jehova ang kalisang kaniya sa ibabaw sa tanang kanasoran.”—1 Cron. 14:17.

9. Isaysay kon sa unsang paagi si Jesus nagmadaogon ingong Tinudlo nga Hari.

⁹ Sama ni Haring David, si Jesus usab nagmaisogon samtang dinhi pa siya sa yuta. Ingong Tinudlo nga Hari, siya nagpagulag mga demonyo ug nagpahigawas sa ilang mga biktima gikan sa ilang impluwensiya. (Mar. 5:2, 6-13; Luc. 4:36) Bisan ang pangunang kaaway nga si Satanas nga Yawa wala makaimpluwensiya kaniya. Sa tabang ni Jehova, gidaog ni Jesus ang kalibotan nga nailalom sa gahom ni Satanas.—Juan 14:30; 16:33; 1 Juan 5:19.

10, 11. Unsay papel ni Jesus ingong Manggugubat ug Hari didto sa langit?

¹⁰ Mga 60 ka tuig human mamatay ug mabanhaw si Jesus, si apostol Juan nakakita ug panan-awon bahin kang Jesus ingong Manggugubat ug Hari didto sa langit. Si Juan misulat: “Tan-awa! usa ka puting kabayo; ug ang nagsakay niini may usa ka pana; ug gihatag kaniya ang usa ka korona, ug siya miasdang nga nagapangdaog ug sa pagtapos sa iyang pagpangdaog.” (Pin. 6:2) Ang nagsakay sa puting kabayo mao si Jesus. “Gihatag kaniya ang usa ka korona” niadtong 1914 sa dihang siya gipalingkod ingong Hari sa langitnong Gingharian. Human niana, “siya miasdang nga nagapangdaog.” Oo, sama kang David, si Jesus maoy usa ka madaogon nga hari. Wala madugay human sa iyang pagkaentrono ingong Hari sa Gingharian sa Diyos, siya nakiggubat kang Satanas ug iyang gitambog si Satanas ug ang iyang mga demonyo nganhi sa yuta. (Pin. 12:7-9) Ang iyang pagpangdaog magpadayon hangtod nga bug-os niyang malaglag ang sistema ni Satanas.—Basaha ang Pinadayag 19:11, 19-21.

¹¹ Apan sama kang David, si Jesus maoy mabinationg hari, ug iyang panalipdan ang “dakong panon” latas sa Armagedon. (Pin. 7:9, 14) Dugang pa, ilalom sa pagmando ni Jesus ug sa iyang kaubang mga manununod, ang gibanhaw nga 144,000, aduna unyay “pagkabanhaw sa mga matarong ug sa mga dili-matarong.” (Buh. 24:15) Kadtong pagabanhawon sa yuta may paglaom nga mabuhi sa walay kataposan. Pagkanindot nga kaugmaon ang nagpaabot kanila! Hinaot magpadayon kita sa ‘pagbuhat ug maayo,’ aron kita buhi unya sa dihang ang yuta mapuno nag matarong ug malipayong ginsakpan sa Dakong David.—Sal. 37:27-29.

Gitubag ang Pag-ampo ni Solomon Alang sa Kaalam

12. Unsay giampo ni Solomon?

¹² Ang anak ni David nga si Solomon naghulagway usab kang Jesus. c Sa dihang si Solomon nahimong hari, si Jehova nagpakita kaniya diha sa usa ka damgo ug miingon nga Iyang ihatag kaniya ang bisan unsa nga iyang pangayoon. Makapangayo unta si Solomon ug dugang bahandi, gahom, o taas nga kinabuhi. Apan kay dili man siya hakog, siya nangayo kang Jehova: “Hatagi ako karon ug kaalam ug kahibalo aron ako mogula ug mosulod sa atubangan niini nga katawhan, kay kinsa ang makahukom niining imong dakong katawhan?” (2 Cron. 1:7-10) Gitubag ni Jehova  ang pag-ampo ni Solomon.—Basaha ang 2 Cronicas 1:11, 12.

13. Sa unsang paagi wala hitupngi ang kaalam ni Solomon, ug kinsay Tinubdan niana?

¹³ Samtang si Solomon nagmatinumanon kang Jehova, ang iyang kaalam wala gayod hitupngi sa iyang mga katalirongan. Si Solomon nakasulti ug “tulo ka libo ka panultihon.” (1 Hari 4:30, 32, 34) Daghan niini ang narekord ug gipabilhan gihapon sa mga nagtinguhag kaalam. Ang rayna sa Sheba mibiyaheg mga 2,400 kilometros aron sulayan ang kaalam ni Solomon pinaagi sa pagsuknag “makapalibog nga mga pangutana.” Ang rayna nahingangha sa iyang mga tubag ug sa kamauswagon sa iyang gingharian. (1 Hari 10:1-9) Gipaila sa Bibliya ang Tinubdan sa kaalam ni Solomon sa pag-ingon: “Ang tanang katawhan sa yuta nangita sa nawong ni Solomon aron sa pagpaminaw sa iyang kaalam nga gibutang sa Diyos diha sa iyang kasingkasing.”—1 Hari 10:24.

Sunda ang Maalamong Hari

14. Sa unsang mga paagi si Jesus maoy “labaw pa kay kang Solomon”?

¹⁴ Usa lang ka tawo ang mas maalamon pa kay kang Solomon. Siya si Jesu-Kristo, kinsa naghubit sa iyang kaugalingon ingong “ang usa nga labaw pa kay kang Solomon.” (Mat. 12:42) Si Jesus nagsulti ug “mga pulong mahitungod sa kinabuhing walay kataposan.” (Juan 6:68) Pananglitan, ang Wali sa Bukid naghatag ug dugang detalye bahin sa mga prinsipyo sa pipila ka proverbio ni Solomon. Si Solomon nagbatbat ug daghang butang nga makapalipay sa usa ka magsisimba ni Jehova. (Prov. 3:13; 8:32, 33; 14:21; 16:20) Si Jesus nagpasiugda nga ang tinuod nga kalipay maoy resulta sa mga butang nga nalangkit sa pagsimba kang Jehova ug sa pagkatuman sa mga saad sa Diyos. Siya miingon: “Malipayon kadtong mahunahunaon sa ilang espirituwal nga panginahanglan, sanglit ila ang gingharian sa mga langit.” (Mat. 5:3) Kadtong magpadapat sa mga prinsipyo nga anaa sa mga pagtulon-an ni Jesus mas masuod kang Jehova, “ang tuboran sa kinabuhi.” (Sal. 36:9; Prov. 22:11; Mat. 5:8) Gipasundayag ni Kristo “ang kaalam sa Diyos.” (1 Cor. 1:24, 30) Ingong Mesiyanikong Hari, nabatonan ni Jesu-Kristo “ang espiritu sa kaalam.”—Isa. 11:2.

15. Sa unsang paagi kita makapahimulos sa diyosnong kaalam?

¹⁵ Sa unsang paagi kita, ingong mga sumusunod sa Dakong Solomon, makapahimulos sa diyosnong kaalam? Sanglit ang kaalam ni Jehova gibutyag man diha sa iyang Pulong, angay kitang maningkamot sa pagkaplag niana pinaagi sa makugihong pagtuon sa Bibliya, ilabina sa mga pulong ni Jesus, ug sa pagpamalandong sa atong nakat-onan. (Prov. 2:1-5) Dugang pa, kinahanglan nga kita padayong mangayo sa Diyos ug kaalam. Gipasaligan kita sa Pulong sa Diyos nga kon kita kinasingkasing nga mangayog tabang pinaagi sa pag-ampo, kita pagatubagon gayod. (Sant. 1:5) Sa tabang sa balaang espiritu, atong makaplagan ang mapuslanon kaayong mga prinsipyo diha sa Pulong sa Diyos nga makatabang kanato sa pagsulbad sa mga suliran ug sa paghimog maalamong mga desisyon. (Luc. 11:13) Si Solomon gitawag usab nga “magtitigom” kinsa ‘nagpadayon sa pagtudlo sa katawhan ug kahibalo.’ (Eccl. 12:9, 10) Si Jesus, ingong Ulo sa Kristohanong kongregasyon, maoy magtitigom usab sa iyang katawhan. (Juan 10:16; Col. 1:18) Busa, maningkamot gayod kita sa pagtambong sa mga tigom, diin kita ‘padayong ginatudloan.’

16. Unsay kaamgiran ni Solomon ug ni Jesus?

¹⁶ Daghan kaayo ang nalampos ni Solomon sa iyang pagkahari. Ang tibuok gingharian nakabenepisyo gayod sa iyang giorganisar nga pagpanukod sa tibuok nasod. Siya ang nagdumala sa pagpanukod ug mga palasyo, karsada, sistema sa tubig, siyudad nga tipiganan, siyudad sa mga karo, ug mga siyudad alang sa mga  mangangabayo. (1 Hari 9:17-19) Si Jesus usa usab ka magtutukod. Iyang gitukod ang iyang kongregasyon ibabaw sa “dakong-bato.” (Mat. 16:18) Siya usab ang magdumala sa buluhatong pagpanukod sa bag-ong kalibotan.—Isa. 65:21, 22.

Sunda ang Hari sa Pakigdait

17. (a) Unsay nakapatalagsaon sa pagmando ni Solomon? (b) Unsay dili mahimo ni Solomon?

¹⁷ Ang ngalang Solomon naggikan sa pulong nga nagkahulogan ug “pakigdait.” Si Haring Solomon nagmando gikan sa Jerusalem, ug kini nagkahulogang “Pagpanag-iya sa Duha-ka-Pilong Pakigdait.” Nagmalinawon gayod ang nasod sa Israel sulod sa iyang 40 ka tuig nga pagmando. Maylabot niadtong mga tuiga, ang Bibliya nag-ingon: “Ang Juda ug Israel nagpadayon sa pagpuyo sa kasegurohan, ang matag usa ilalom sa iyang kaugalingong paras ug ilalom sa iyang kaugalingong kahoyng igos, gikan sa Dan ngadto sa Beer-seba, sa tanang adlaw ni Solomon.” (1 Hari 4:25) Apan bisan pa sa kaalam ni Solomon, siya wala makapahigawas sa iyang mga ginsakpan gikan sa pagkaulipon sa sakit, sala, ug kamatayon. Apan ang Dakong Solomon makahimo gayod niana.—Basaha ang Roma 8:19-21.

18. Unsang mga panalangin ang atong ginatagamtam sulod sa Kristohanong kongregasyon?

¹⁸ Bisan karon, kita adunay pakigdait sulod sa Kristohanong kongregasyon. Nagpahimulos gayod kitag tinuod nga espirituwal nga paraiso. Kita adunay pakigdait uban sa Diyos ug sa atong isigkatawo. Matikdi kon unsay gitagna ni Isaias bahin sa mga panalangin nga atong ginatagamtam karon: “Ilang pagasalsalon ang ilang mga espada nga mga punta sa daro ug ang ilang mga bangkaw nga mga galab. Usa ka nasod dili mobakyaw sa espada batok sa usa ka nasod, ni makakat-on pa sila sa gubat.” (Isa. 2:3, 4) Kon kita magpagiya sa espiritu sa Diyos, dako kitag mahimo sa pagpatahom sa espirituwal nga paraiso.

19, 20. Nganong angay kitang magmalipayon?

¹⁹ Apan labaw pa niana ang atong matagamtam sa umaabot. Samtang ang masinugtanong katawhan magpahimulos ug way-ingon nga pakigdait ilalom sa pagmando ni Jesus, anam-anam silang “ipagawas gikan sa pagkaulipon sa pagkadunot” hangtod makab-ot nila ang tawhanong kahingpitan. (Roma 8:21) Human sila makalabang sa kataposang pagsulay inigkatapos sa Usa ka Libo ka Tuig nga Pagmando ni Kristo, “ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” (Sal. 37:11; Pin. 20:7-10) Sa walay duhaduha, ang pagmando ni Kristo labaw gayod kay sa pagmando ni Solomon!

²⁰ Maingon nga ang Israel nagmalipayon ilalom sa pagdumala ni Moises, ni David, ug ni Solomon, labaw pa gayong kalipay ang atong matagamtam ilalom sa pagmando ni Kristo. (1 Hari 8:66) Angay kitang magpasalamat kang Jehova tungod sa pagtagana kanato sa iyang bugtong Anak—ang Dakong Moises, ang Dakong David, ug ang Dakong Solomon!

[Mga footnote]

Makapatin-aw Ka Ba?

• Sa unsang paagi si Jesus nahimong Dakong David?

• Sa unsang paagi si Jesus nahimong Dakong Solomon?

• Unsay imong gipabilhan bahin sa Dakong David, nga mao usab ang Dakong Solomon?

[Mga Pangutana sa Pagtuon]

[Hulagway sa panid 31]

Ang hinatag-sa-Diyos nga kaalam ni Solomon naghulagway sa kaalam sa Dakong Solomon

[Hulagway sa panid 32]

Ang pagmando ni Kristo labaw gayod kay sa pagmando ni Solomon ug ni David!