Makaadto Ka ba sa Macedonia?

SA DUNGGOANANG siyudad sa Troas sa Asia Minor, si apostol Pablo nakakitag panan-awon. Usa ka tawong Macedonianhon ang mihangyo kaniya: “Dali ngari sa Macedonia ug tabangi kami.” Pagkakita ni Pablo sa panan-awon, siya ug ang iyang mga kauban sa panaw “nanghinapos nga ang Diyos nagpatawag [kanila] aron ipahayag ang maayong balita” ngadto sa mga taga-Macedonia. Ang resulta? Sa pangunang siyudad sa Macedonia, ang Filipos, si Lydia ug ang iyang panimalay nahimong mga magtutuo. Ang uban nianang Romanhong probinsiya sa Macedonia nahimo usab nga mga Kristohanon.—Buh. 16:9-15.

Ang susamang masibotong espiritu makita usab taliwala sa mga Saksi ni Jehova karon. Daghan, nga sa ilang kaugalingong gasto, ang kinabubut-ong mibalhin diin mas dako ang panginahanglan alang sa mga magmamantala sa Gingharian. Pananglitan, si Lisa nagtinguha nga hatagag mas dakong pagtagad ang iyang ministeryo. Siya mibalhin gikan sa Canada ngadto sa Kenya. Si Trevor ug Emily, nga taga-Canada usab, miadto sa Malawi sa tuyo nga mapalapad ang ilang ministeryo. Nakita ni Paul ug Maggie, nga taga-Inglaterra, nga ang ilang pagretiro maoy maayong higayon sa paghimo ug labaw pa diha sa pag-alagad kang Jehova ug mibalhin sila sa Sidlakang Aprika. Duna ka bay nagsakripisyo-sa-kaugalingon nga espiritu? Makahimo ka ba sa pagbalhin? Kon mao, unsang mga prinsipyo sa Bibliya ug praktikal nga mga sugyot ang makatabang kanimo nga molampos?

Susiha ang Imong Kaugalingon

Ang usa ka butang nga angay nimong tagdon mao ang imong mga motibo. Ang kinadak-ang sugo, matod pa ni Jesus, mao kini: “Higugmaon  mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” Kinahanglan nga ang rason sa pag-alagad sa langyaw nga teritoryo mao ang gugma alang sa Diyos ug ang tinguha sa pagtuman sa sugo nga maghimog mga tinun-an. Si Jesus nagpadayon: “Ang ikaduha, nga susama niini, mao kini, ‘Higugmaon mo ang imong silingan sama sa imong kaugalingon.’” Ang gugma sa silingan mapasundayag diha sa tiunayng tinguha nga motabang. (Mat. 22:36-39; 28:19, 20) Ang pag-alagad sa langyawng nasod sagad naglangkit ug dakong trabaho ug espiritu sa pagsakripisyo-sa-kaugalingon. Dili lamang kini usa ka bakasyon. Kinahanglang gitukmod ka sa gugma. Si Remco ug Suzanne nga taga-Netherlands ug nag-alagad ­karon sa Namibia, nagsumaryo niana,  “Ang gugma maoy nagtukmod kanamo sa pagpabilin dinhi.”

Si Willie, nga usa ka magtatan-aw sa sirkito sa Namibia, miingon: “Ang mga igsoon nga nakapabilin sa langyawng teritoryo wala magsalig nga atimanon sila sa mga igsoon didto. Ilang tumong nga mag-alagad uban sa lokal nga mga igsoon, nga magtabang kanila diha sa buluhatong pagsangyaw.”

Human masusi ang imong mga motibo, pangutan-a ang imong kaugalingon: ‘Duna ba koy kasinatian nga magamit sa langyawng teritoryo? Ako ba usa ka epektibong ministro? Unsang mga pinulongan ang akong nahibaloan? Andam ba akong mokat-on ug bag-ong pinulongan?’ Hisgoti kana uban sa imong pamilya. Pangayog tambag sa mga ansiyano sa kongregasyon. Ug iampo gayod kana kang Jehova. Ang maong matinud-anong pagsusi-sa-kaugalingon motabang kanimo sa pagtino kon duna ka ba gayoy katakos ug determinasyon sa pag-alagad sa langyawng teritoryo. —Tan-awa ang kahong “Ilha ang Imong Kaugalingon.”

Kon Asa Moalagad

Si Pablo gidapit nga moadto sa Macedonia pinaagig panan-awon. Karong adlawa, si Jehova dili mogamit ug milagro sa pagtultol kanato. Bisan pa niana, pinaagi niining magasina ug sa ubang mga publikasyon, ang katawhan sa Diyos mahibalo kon unsang mga teritoryoha ang nanginahanglan gayod ug tabang. Busa ilista ang maong mga dapit. Kon dili ka andam nga magtuon ug bag-ong pinulongan o temporaryo lang ang imong pag-estar sa langyawng nasod, konsideraha ang pag-alagad sa dapit diin daghan ang nagsulti sa imong pinulongan. Dayon susiha ang mga butang sama sa pagkuhag bisa, transportasyon, seguridad, presyo sa palaliton, ug klima. Makatabang kanimo ang pagpakig-estorya niadtong nakasulay na pagbalhin sa langyawng teritoryo. Iapil kana sa imong pag-ampo. Hinumdomi nga si Pablo ug ang iyang mga kauban “gidid-an sa balaang espiritu nga isulti ang pulong didto sa distrito sa Asia.” Bisag misulay sila pag-adto sa Bitinia, “ang espiritu ni Jesus wala motugot kanila” sa pagbuhat niana. Sa susama, magkinahanglan tingalig panahon aron matino kon asa ka gayod makatabang.—Buh. 16:6-10.

Tingali sa pagkakaron duna ka nay nakita nga pipila ka praktikal nga kapilian. Kon nagplano kang moalagad sa langyawng nasod, pagpadalag sulat ngadto sa sangang buhatan sa mga Saksi ni Jehova sa mga nasod nga imong gikonsiderar. Isulti ang mga pribilehiyo nga imong nabatonan maingon man ang mga butang nga gusto nimong ipangutana, sama sa presyo sa palaliton, matang sa mga sak-anan, pasilidad nga nag-atiman sa panglawas, ug mga kahigayonan sa pagkakaplag ug sekular nga trabaho. Dayon ihatag ang imong sulat ngadto sa komite sa pag-alagad sa imong kongregasyon. Ilang ipataban ang ilang sulat nga rekomendasyon ug ipadala kana ngadto sa mga sangang buhatan nga imong gihisgotan. Ang mga tubag lagmit motabang kanimo sa pagdesisyon kon diin ka mas epektibong makaalagad.

Si Willie, nga gihisgotan ganina, miingon: “Kadtong nagmalamposon sagad mibisita una sa nasod nga giplano nilang alagaran ug nangitag mga dapit nga ilang maangayan. Nakita sa usa ka magtiayon nga malisdan sila sa pagpuyo sa usa ka hilit nga dapit. Busa gipili nila ang usa ka gamayng lungsod diin may panginahanglan apan dili kaayo sila maglisod sa pagpasibo.”

Pag-atubang ug Bag-ong mga Hagit

Sa walay duhaduha, duna gayoy pipila ka hagit nga imong atubangon sa dihang ikaw mobiya sa imong dapit ug mobalhin sa laing nasod. “Lisod kaayong sagubangon ang kamingaw,” matod pa ni Lisa, nga gihisgotan ganina. Unsay nakatabang kaniya? Ang pagpabiling suod sa lokal nga kongregasyon diha sa bag-o niyang teritoryo. Gihimo niyang tumong nga mailhan ang tanan. Aron mahimo kini, sayo siyang moabot sa mga tigom ug dili dayon mouli aron makaestorya ang mga igsoon.  Si Lisa makigpartner sa mga igsoon diha sa ministeryo, magdapit kanila ngadto sa iyang balay, ug makighigala kanila. Siya miingon: “Wala ko magmahay sa akong pagsakripisyo. Si Jehova nagpanalangin gayod kanako.”

Sa dihang dagko na ang ilang mga anak, si Paul ug Maggie mibiya sa ilang balay diin sila nagpuyo sulod sa 30 ka tuig. Si Paul miasoy: “Dili diay lisod ang pagdispatsar sa mga butang. Ang pagbiya sa among pamilya mao ang lisod kaayo, nga labaw pa kay sa among gidahom. Mihilak mi pag-ayo diha sa ayroplano. Dali ra kaayong maghunahuna, ‘Dili namo ni mahimo.’ Apan misalig kami kang Jehova. Ang pagbaton ug bag-ong mga higala makadugang sa imong determinasyon nga magpadayon.”

Si Greg ug Crystal mipili sa pagbalhin gikan sa Canada ngadto sa Namibia tungod kay Iningles usab ang opisyal nga pinulongan sa maong nasod. Apan, sa ulahi ilang nakita nga mapuslanon gayod nga magtuon sa lokal nga pinulongan. “Usahay, mahigawad mi. Hinunoa, sa dihang among nakat-onan ang lokal nga pinulongan amo nang nasabtan ang ilang kultura. Ang pagpakigsuod sa mga igsoon didto nakatabang kanamo sa pagpasibo sa among bag-ong teritoryo.”

Ang maong pagkamapainubsanon ug pagkaandam nga moalagad mahimong aduna usay positibong epekto sa lokal nga mga igsoon. Si Jenny malipayng mahinumdom sa mga pamilya nga namalhin ngadto sa Irlandia, diin siya nagdako. “Sila ang maabiabihon,” siya miingon. “Sila mianhi aron gayod sa pag-alagad, dili aron alagaron. Sila masiboton ug malipayon kaayo, mao nga ako silang gisundog.” Si Jenny nag-alagad karon sa Gambia uban sa iyang bana ingong mga misyonaryo.

Ang Panalangin ni Jehova “Makapadato”

Makapadasig gayod ang kasinatian ni Pablo sa Macedonia! Mga napulo ka tuig sa ulahi, siya misulat ngadto sa mga igsoon sa Filipos: “Nagpasalamat ako kanunay sa akong Diyos sa matag paghandom ko kaninyo.”—Filip. 1:3.

Susama usab niana ang gibati ni Trevor ug Emily, kinsa nag-alagad sa Malawi sa wala pa sila dapita nga moeskuyla sa Watchtower Bible School of Gilead. “Usahay maghunahuna mi kon husto ba ang among gibuhat, bisan pa niana malipayon ra kami. Mas nasuod kami sa usag usa ug gibati namo nga gipanalanginan kami ni Jehova.” Si Greg ug Crystal, nga gihisgotan ganina, miingon, “Mao gyod ni among gustong buhaton.”

Tinuod, dili tanan ang makahimo sa pag-alagad sa langyawng nasod. Mas maayo tingali alang sa pipila nga mobalhin diin mas dako ang panginahanglan diha sa ilang kaugalingong nasod. Mahimong himoon nga tumong sa pipila ang pag-alagad sa ubang mga kongregasyon nga dili layo sa ilang pinuy-anan. Ang importante mao ang pagbuhat sa imong maarangan sa pag-alagad kang Jehova. (Col. 3:23) Sa ingon, ang inspiradong mga pulong matuman diha kanimo: “Ang panalangin ni Jehova—mao kana ang makapadato, ug dili niya kana dugangan ug kasakit.”—Prov. 10:22.

[Kahon/Hulagway sa panid 5]

 Ilha ang Imong Kaugalingon

Aron masusi ang imong kaugalingon kon makaalagad ka ba sa langyawng teritoryo, tagda ang mosunod nga mga pangutana ug matinud-anon ug mainampoong timbangtimbanga kon alang ba kana kanimo. Ang impormasyon gikan sa miaging mga gula sa Ang Bantayanang Torre makatabang kanimo sa pagbuhat niana.

• Ako ba usa ka espirituwal nga tawo?—“Mga Tikang Padulong sa ­Kalipay” (Oktubre 15, 1997, panid 6)

• Ako ba usa ka epektibong ministro?—“Kon Unsaon sa Pagpalampos sa Payunir nga Ministeryo” (Mayo 15, 1989, panid 21)

• Makahimo ba ako sa pagpuyo nga layo sa akong mga ginikanan, mga igsoon, ug mga higala?—“Pagsagubang sa Kamingaw Diha sa ­Pag-alagad sa Diyos” (Mayo 15, 1994, panid 28)

• Makahimo ba ako sa pagtuon ug bag-ong pinulongan?—“Pag-alagad Diha sa Langyawg-Pinulongan nga Kongregasyon” (Marso 15, 2006, panid 17)

• Makasuportar ba ako sa akong kaugalingon nianang dapita?—“Ikaw ba Makaalagad Diha sa Usa ka Langyawng Yuta?” (Oktubre 15, 1999, panid 23)

[Hulagway sa panid 6]

Ang pagkamapainubsanon ug pagkaandam nga moalagad mahimong aduna usay positibong epekto sa lokal nga mga igsoon

[Hulagway sa panid 7]

Kadtong mibalhin aron sa pag-alagad sa mga igsoon mao ang nagmalamposon