Si Jehova Namati sa Pagtuaw sa mga Magul-anon

INGON sa namatikdan sa maalamong hari sa Israel nga si Solomon, “ang panahon ug ang wala damhang panghitabo modangat [kanatong] tanan.” (Eccl. 9:11) Ang usa ka trahedya o masakit nga hitabo makaapektog dako sa atong kinabuhi. Pananglitan, makapaguol kaayo ang kalit nga kamatayon sa usa ka suod nga membro sa pamilya. Mahimong mograbe pa ang maong kaguol paglabay sa pipila ka semana o bulan. Mahimong bation sa usa nga dili na siya takos moduol kang Jehova diha sa pag-ampo.

Sa maong kahimtang, ang usa nagkinahanglag pagdasig, konsiderasyon, ug gugma. Si salmistang David nagpasalig diha sa iyang awit: “Si Jehova nagasapnay sa tanan nga napukan, ug nagabangon sa tanan nga naumod.” (Sal. 145:14) Ang Bibliya nag-ingon nga ang “mga mata [ni Jehova] nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.” (2 Cron. 16:9) Siya ‘uban niadtong nahugno ug mapaubsanon sa espiritu, aron buhion pag-usab ang espiritu sa mga mapainubsanon ug aron buhion pag-usab ang kasingkasing sa mga nangahugno.’ (Isa. 57:15) Sa unsang paagi si Jehova nagtabang ug naghupay niadtong nahugno sa espiritu o nagmagul-anon?

“Usa ka Pulong sa Hustong Panahon”

Ang usa sa mga paagi nga si Jehova naghatag ug tabang sa hustong panahon maoy pinaagi sa Kristohanong kaigsoonan. Ang mga Kristohanon giawhag sa ‘paghupay sa magul-anong mga kalag.’ (1 Tes. 5:14) Ang kabalaka ug gugma nga gipakita sa may-simpatiya nga mga igsoon makapalig-on sa usa nga nagmagul-anon. Ang makapahupayng mga pulong bisan sa kadiyot nga panag-estoryahay makapadasig sa usa nga naluya. Mahimong maggikan kana sa usa nga nakasinatig susamang kahimtang o kaha sa usa ka higala nga daghan nag kasinatian. Pinaagi niini, si Jehova makapalagsik sa mga magul-anon.

Tagda pananglitan ang kahimtang sa bag-ong minyo nga ansiyano nga si Alex, kinsa kalit nga namatyag asawa tungod sa grabeng sakit. Ang usa ka mabination nga nagapanawng magtatan-aw naningkamot sa pagpaambit ug makapahupayng mga pulong kang Alex. Siya usab namatyag asawa apan naminyo pag-usab. Giestorya sa maong magtatan-aw nga grabe kaayo ang iyang kaguol kaniadto. Moarang-arang lang ang iyang pamati sa dihang siya mosangyaw ug motambong sa mga tigom. Apan, sa dihang mosulod na siya sa  iyang lawak, mobati siyag tumang kamingaw. Si Alex miingon: “Nahupayan kaayo ko sa dihang akong nahibaloan nga normal lang diay ang akong gibati ug nga nasinati sab kana sa uban.” Tino nga ang “usa ka pulong sa hustong panahon” makapahupay gayod panahon sa kagul-anan.—Prov. 15:23.

Ang laing ansiyano nga nakaestorya nag mga indibiduwal nga namatyag kapikas nagdasig kang Alex. Uban ang empatiya, iyang gisulti nga nahibalo si Jehova sa atong gibati ug gikinahanglan. “Kon paglabay sa pipila ka bulan o tuig, bation nimo nga nanginahanglan kag kapikas,” miingon ang brader kang Alex, “ang pagminyo pag-usab maoy mahigugmaong tagana ni Jehova.” Siyempre, dili tanang namatyag kapikas nga gustong magminyo pag-usab ang makahimo sa pagminyo. Apan sa pagpamalandong sa giingon sa brader, si Alex miingon, “Ang pahinumdom nga kini maoy tagana ni Jehova magpahigawas sa usa sa paghunahuna nga mahimo siyang dili maunongon sa iyang kapikas o sa kahikayan ni Jehova bahin sa kaminyoon kon magminyo siya pag-usab.”—1 Cor. 7:8, 9, 39.

Ang salmistang si David, kinsa nakasinatig daghang pagsulay ug kalisdanan, miingon: “Ang mga mata ni Jehova gipunting sa mga matarong, ug ang iyang mga igdulungog gikiling sa ilang pagtuaw alang sa tabang.” (Sal. 34:15) Tino gayod nga tubagon ni Jehova sa hustong panahon ang pagtuaw sa mga magul-anon pinaagi sa mahunahunaong mga pulong sa mabination ug hamtong nga mga igsoon. Ang maong tagana maoy bililhon ug praktikal.

Matabangan Pinaagi sa mga Tigom

Ang magul-anong tawo sagad dali rang madala sa negatibong panghunahuna nga mahimong magtukmod kaniya sa paglain sa iyang kaugalingon. Apan, ang Proverbio 18:1 nagpasidaan: “Ang nagalain sa iyang kaugalingon mangita sa iyang hakog nga tinguha; siya mobatok sa tanang praktikal nga kaalam.” Si Alex miangkon: “Sa dihang mamatyan kag kapikas, daghang negatibong butang ang mosantop sa imong hunahuna.” Dihay higayon nga nakapangutana siya sa iyang kaugalingon: “‘Duna ba koy daotang nahimo? Dili ba kaayo  ko masinabtanon ug mahunahunaon sa uban?’ Dili ko gustong mag-inusara. Apan, lisod kaayo nga wad-on ni sa akong hunahuna kay matag adlaw ako nag-inusara.”

Ang mga magul-anon mas nagkinahanglag makapalipayng panag-ubanay. Makaplagan kini diha sa mga tigom sa kongregasyon. Diha niana, atong madunggan ang positibo ug makapalig-ong panghunahuna sa Diyos.

Ang mga tigom motabang nato sa pagbatog balanseng panglantaw sa atong kahimtang. Samtang atong paminawon ug palandongon ang mga teksto sa Bibliya, masentro nato ang atong hunahuna sa duha ka labing hinungdanong isyu—ang pagbindikar sa pagkasoberano ni Jehova ug ang pagbalaan sa iyang ngalan—dili lang sa atong pag-antos. Dugang pa, panahon sa mga tigom, kita mapalig-on sa pagkahibalo nga bisag wala masayod ang uban sa atong pag-antos o makasabot sa atong gibati, si Jehova nahibalo gayod niana. Siya nasayod nga “tungod sa kasakit sa kasingkasing adunay nahugnong espiritu.” (Prov. 15:13) Ang matuod nga Diyos buot motabang kanato, ug kini maghatag kanatog kadasig ug kalig-on sa pagpadayon.—Sal. 27:14.

Sa dihang si Haring David nakasinatig grabeng pagpit-os sa iyang mga kaaway, siya mituaw sa Diyos: “Ang akong espiritu naluya sa sulod nako; sa sulod nako ang akong kasingkasing naminhod.” (Sal. 143:4) Ang mga kalisdanan sagad makapaluya sa usa ka tawo sa pisikal ug emosyonal, nga makapabinhod pa gani sa kasingkasing. Kita mahimong mag-antos tungod sa sakit o grabeng balatian. Makalaom kita nga si Jehova motabang kanato nga makalahutay. (Sal. 41:1-3) Bisan tuod ang Diyos dili milagrosong mag-ayo sa mga masakiton karon, siya naghatag kanilag kaalam ug kaisog aron makalahutay. Hinumdomi nga sa dihang si David nabug-atan sa mga pagsulay, siya midangop kang Jehova. “Ako nahinumdom sa kanhing mga adlaw,” siya miawit. “Ako nagpalandong sa tanan mong kalihokan; kinabubut-on kong gihunahuna kanunay ang mga buhat sa imong mga kamot.”—Sal. 143:5.

Sanglit ang maong mga sentimento narekord sa Pulong sa Diyos, kana nagpakita nga si Jehova nakasabot sa atong gibati. Ang maong mga pulong nagpasalig nga siya mamati sa atong mga hangyo. Kon atong dawaton ang tabang ni Jehova, ‘siya magasapnay kanato.’—Sal. 55:22.

“Pag-ampo nga Walay-Hunong”

Ang Santiago 4:8 nag-ingon: “Duol sa Diyos, ug siya moduol kaninyo.” Ang usa ka paagi nga makaduol sa Diyos mao ang pag-ampo. Si apostol Pablo nag-awhag kanato sa “pag-ampo nga walay-hunong.” (1 Tes. 5:17) Bisag malisdan kita sa pagsulti sa atong gibati, “ang espiritu mangamuyo alang kanato uban ang mga pag-agulong wala mabungat.” (Roma 8:26, 27) Si Jehova nakasabot gayod sa atong gibati.

Si Monika, nga dunay suod nga relasyon kang Jehova, miingon: “Pinaagi sa pag-ampo, pagbasag Bibliya, ug personal nga pagtuon, akong gibati nga nahimo nakong kinasuorang Higala si Jehova. Tinuod gayod siya alang kanako nga akong gibati nga kanunay ko niyang gitabangan. Nahupayan ko sa pagkahibalo nga bisag dili nako masulti ang akong gibati, siya nakasabot kanako. Nahibalo ko nga ang iyang kaayo ug panalangin walay kinutbanan.”

Nan, atong dawaton ang mahigugmaon ug makapahupayng mga pulong sa atong mga igsoon, ipadapat ang malulotong tambag ug makapalig-on-sa-pagtuo nga mga pahinumdom diha sa mga tigom, ug ibubo kang Jehova ang atong kasingkasing diha sa pag-ampo. Pinaagi niini nga mga tagana, gipakita ni Jehova nga siya nagmahal kanato. Si Alex miingon, “Kon atong pahimuslan ang mga tagana ni Jehova aron mapalig-on kita sa espirituwal, kita makabatog ‘gahom nga labaw sa kasarangan’ aron makalahutay sa mga pagsulay nga atong masinati.”—2 Cor. 4:7.

[Kahon/Hulagway sa panid 18]

Kahupayan Alang sa mga Magul-anon

Ang mga salmo naundan ug daghang pahayag sa kagul-anan uban ang balikbalik nga pasalig nga si Jehova namati sa pagtuaw sa mga magul-anon. Tagda ang mosunod:

“Sa akong kasakitan ako nagpadayon sa pagsangpit kang Jehova, ug sa akong Diyos ako nagpadayon sa pagtuaw alang sa tabang. Gikan sa iyang templo iyang gidungog ang akong tingog, ug ang pagtuaw ko sa iyang atubangan alang sa tabang karon midangat sa iyang mga igdulungog.”—Sal. 18:6.

“Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”—Sal. 34:18.

“Siya [si Jehova] nagaayo sa mga may gun-ob nga kasingkasing, ug nagabugkos sa ilang masakit nga mga bahin.”—Sal. 147:3.

[Hulagway sa panid 17]

Makapahupay gayod sa mga magul-anon ang “usa ka pulong sa hustong panahon”!