‘Dangop sa Ngalan ni Jehova’
‘Dangop sa Ngalan ni Jehova’
“Ipabilin ko gayod . . . ang usa ka katawhan nga mapainubsanon ug maaghop, ug sila modangop sa ngalan ni Jehova.”—SOF. 3:12.
1, 2. Unsa ang simbolikong bagyo nga hapit nang mohapak sa katawhan?
NAKADANGOP o nakapasilong ka na ba sukad sa usa ka payag kay mibunok ang ulan? Tingali ang usa ka payag makapanalipod kanimo panahon sa kusog nga ulan, pero lagmit dili kana makahatag ug igong proteksiyon panahon sa kusog nga bagyo.
2 Ang laing matang sa bagyo nagsingabot—nga makapameligro sa paglungtad mismo sa katawhan. Kini maoy simbolikong “adlaw sa bagyo.” Ang tanang tawo maapektohan niining “dakong adlaw ni Jehova.” Apan, duna kitay dangpanan. (Basaha ang Sofonias 1:14-18.) Sa unsang paagi makaplagan nato kini sa taliabot nga “adlaw sa mabangis nga kasuko ni Jehova”?
Mga Adlaw sa Bagyo Panahon sa Bibliya
3. Unsang “inubanan-ug-dalugdog nga bagyo” ang midangat sa napulo-ka-tribo nga gingharian sa Israel?
3 Ang adlaw ni Jehova magsugod sa dihang laglagon ang tanang bakak nga relihiyon sa yuta. Aron makaplagan ang dangpanan, atong susihon ang kasaysayan sa karaang katawhan sa Diyos. Si Isaias nabuhi sa ikawalong siglo W.K.P., ug iyang gipakasama ang paghukom ni Jehova sa apostatang napulo-ka-tribo nga gingharian sa Israel ngadto sa “inubanan-ug-dalugdog nga bagyo,” nga walay makapugong. (Basaha ang Isaias 28:1, 2.) Kana nga tagna unang natuman sa 740 W.K.P. sa dihang gipukan sa Asirya ang maong mga tribo, nga ang Epraim maoy labing inila.
4. Sa unsang paagi ang “dakong adlaw ni Jehova” mihapak sa Jerusalem sa 607 W.K.P.?
4 Ang paghukom batok sa di-maunongong Israel gisundan sa usa ka “dakong adlaw ni Jehova” batok sa Jerusalem ug sa gingharian sa Juda sa 607 W.K.P. Kadto nahitabo kay ang katawhan sa Juda nag-apostata usab. Ang mga Babilonyanhon ilalom ni Nabukodonosor naghulga sa Juda ug sa kaulohan niini, ang Jerusalem. Ang mga Hudiyo midangop sa “dalangpanan nga bakak”—ang pagpakig-alyansa sa Ehipto. Apan sama sa bagyo, gipayhag sa Babilonyanhon ang maong “dalangpanan.”—Isa. 28:14, 17.
5. Unsay mahitabo sa katawhan sa Diyos ingong usa ka grupo sa dihang laglagon ang tanang bakak nga relihiyon?
5 Ang dakong adlaw ni Jehova nga mihapak sa Jerusalem naghulagway sa paghukom nga modangat sa apostatang Kakristiyanohan sa atong adlaw. Dugang pa, ang nahibiling bahin sa “Dakong Babilonya,” ang imperyo sa bakak nga relihiyon, pagalaglagon. Human niana, ang nahibiling bahin sa daotang sistema ni Satanas hanawon sa bug-os. Apan, ang katawhan sa Diyos ingong usa ka grupo maluwas kay sila midangop kang Jehova.—Pin. 7:14; 18:2, 8; 19:19-21.
Espirituwal ug Pisikal nga Dangpanan
6. Sa unsang paagi ang katawhan ni Jehova makakaplag ug dangpanan?
6 Sa unsang paagi ang katawhan sa Diyos makakaplag ug dangpanan bisan karon niining panahon sa kataposan? Atong makaplagan ang espirituwal nga dangpanan pinaagi sa halalom nga ‘pagpamalandong sa ngalan sa Diyos’ ug pag-alagad kaniya nga masiboton. (Basaha ang Malaquias 3:16-18.) Apan, dili igo ang pagpamalandong sa iyang ngalan. Atong mabasa: “Ang matag usa nga magatawag sa ngalan ni Jehova maluwas.” (Roma 10:13) Ang pagtawag sa ngalan ni Jehova nalangkit sa atong kaluwasan. Ug mailhan sa daghang sinserong tawo ang kalainan tali sa matuod nga mga Kristohanon, kinsa dulot nga ‘namalandong sa iyang ngalan’ ug nag-alagad nga iyang mga Saksi, ug niadtong wala mag-alagad kaniya.
7, 8. Sa unsang paagi ang unang-siglong mga Kristohanon nakasinatig pisikal nga kaluwasan? Unsay kaamgiran niana karon?
7 Dili lamang espirituwal nga kaluwasan ang mabatonan. Ang Diyos nagsaad sa iyang katawhan ug pisikal nga kaluwasan. Kini gipasundayag sa nahitabo sa 66 K.P. human moatake sa Jerusalem ang Romanong kasundalohan ilalom ni Cestius Gallus. Si Jesus nagtagna nga ang mga adlaw sa maong kasakitan “pagapamub-on.” (Mat. 24:15, 16, 21, 22) Kana nahitabo sa dihang ang Romanong kasundalohan kalit mibiya sa paglikos sa siyudad, mao nga ‘naluwas’ ang pipila ka “unod,” ang matuod nga mga Kristohanon. Sila nakakalagiw gikan sa siyudad ug sa kasikbit niini. Ang uban mitabok sa suba sa Jordan ug midangop sa kabukiran sa sidlakang bahin niini.
8 May kaamgiran ang unang-siglong mga Kristohanon ug ang katawhan sa Diyos karon. Kaniadto, sila nangitag dangpanan, mao man usab ang mga alagad sa Diyos karon. Apan sa atong panahon, wala kini magpasabot nga mokalagiw ngadto sa usa ka literal nga dapit kay ang matuod nga mga Kristohanon anaa sa lainlaing bahin sa yuta. Bisan pa niana, pinaagi sa pagdangop kang Jehova ug sa iyang samag-bukid nga organisasyon, ang “mga pinili” ug ang ilang maunongong mga kauban ingong usa ka katawhan, literal nga maluwas sa dihang laglagon ang apostatang Kakristiyanohan.
9. Kinsay nagsulay pagwagtang sa ngalan ni Jehova? Paghatag ug pananglitan.
9 Sa laing bahin, ang Kakristiyanohan angayng laglagon kay ang mga lider niini wala magtudlo sa ilang mga sakop sa kamatuoran bahin sa Diyos ug sa iyang mga prinsipyo, ug sila wala mogamit sa ngalan sa Diyos. Sa Edad Medya, ang ngalan sa Diyos kaylap nga nailhan sa Uropa. Ang maong ngalan, nga girepresentahan sa upat ka Hebreohanong letra nga gitawag ug Tetragrammaton ug sagad gihubad nga YHWH (o JHVH), makita diha sa mga sensilyo, atubangan sa mga balay, sa daghang libro ug Bibliya, ug bisan sa pipila ka simbahan sa Katoliko ug Protestante. Apan niining ulahing mga tuig, ang ngalan sa Diyos dili na makita diha sa mga hubad sa Bibliya ug sa ubang butang. Usa ka pamatuod niini mao ang Sulat alang sa mga Obispo bahin sa ‘Ngalan sa Diyos,’ nga penetsahag Hunyo 29, 2008 nga giisyu sa Congregation for Divine Worship ug sa Discipline of the Sacraments. Sa maong sulat, ang Romano Katolikong Simbahan nagsugo nga ang lainlaing hubad sa Tetragrammaton ilisan ug “Ginoo.” Ang Batikano nagsugo nga ang ngalan sa Diyos angayng dili gamiton o litokon diha sa mga awit ug pangadyi panahon sa relihiyosong mga serbisyo sa Katoliko. Ug ang mga lider sa ubang relihiyon sa sulod ug gawas sa Kakristiyanohan wala usab magpaila sa ngalan sa matuod nga Diyos sa minilyong magsisimba.
Proteksiyon sa mga Nagbalaan sa Ngalan sa Diyos
10. Sa unsang paagi ang ngalan sa Diyos gipasidunggan karon?
10 Kasukwahi sa gihimo sa ubang relihiyon, ang mga Saksi ni Jehova nagpasidungog ug naghimaya sa ngalan sa Diyos. Gibalaan nila kini pinaagi sa matinahorong paggamit niini. Si Jehova malipay niadtong mosalig kaniya, ug iyang himoon kon unsay gikinahanglan aron panalanginan ug proteksiyonan ang iyang katawhan. “Siya makaila kanila nga modangop kaniya.”—Nah. 1:7; Buh. 15:14.
11, 12. Kinsay nagpabiling matinumanon kang Jehova sa karaang Juda, ug kinsa usab sa atong modernong adlaw?
11 Bisag ang kadaghanan sa karaang Juda nag-apostata, ang pipila ‘midangop sa ngalan ni Jehova.’ (Basaha ang Sofonias 3:12, 13.) Oo, sa dihang gisilotan sa Diyos ang way-pagtuo nga katawhan sa Juda pinaagi sa pagtugot nga mapukan ug mabihag sila sa mga Babilonyanhon, may pipila nga naluwas, sama kang Jeremias, Baruk, ug Ebed-melek. Sila nagpuyo “taliwala” sa apostatang katawhan. Ang uban nagmatinumanon samtang binihag. Pagka-539 W.K.P., ang Babilonya gipildi sa Media ug Persia ilalom ni Ciro. Wala madugay, si Ciro nagpagawas ug sugo nga ang mga Hudiyong binihag papaulion sa ilang yutang natawhan.
12 Bahin niadtong makapahimulos sa pagpasig-uli sa matuod nga pagsimba, si Sofonias nagtagna nga si Jehova magluwas kanila ug magmaya tungod kanila. (Basaha ang Sofonias 3:14-17.) Kini tinuod usab karon. Human matukod ang Gingharian sa Diyos sa langit, giluwas ni Jehova ang matinumanong nanghibilin sa mga dinihogan gikan sa espirituwal nga pagkabihag sa Dakong Babilonya. Ug siya nagmaya tungod kanila hangtod karon.
13. Unsang kagawasan ang ginapahimuslan sa katawhan sa tanang kanasoran?
13 Kadtong may paglaom nga mabuhi sa walay kataposan dinhi sa yuta nanggawas usab sa Dakong Babilonya ug nagpahimulos sa espirituwal nga kagawasan gikan sa bakak nga mga pagtulon-an. (Pin. 18:4) Busa, ang Sofonias 2:3 may dakong katumanan karon: “Pangitaa ninyo si Jehova, kamong tanang maaghop sa yuta.” Ang mga maaghop sa tanang kanasoran, bisan sila may langitnon o yutan-ong paglaom, nagadangop karon sa ngalan ni Jehova.
Ang Ngalan sa Diyos Dili Anting-anting
14, 15. (a) Unsay gigamit sa pipila ingong mga anting-anting? (b) Unsay dili angayng gamiton ingong usa ka anting-anting?
14 Ang pipila ka Israelinhon nag-isip nga ang templo makapanalipod kanila batok sa mga kaaway. (Jer. 7:1-4) Sayo niana, giisip sa mga Israelinhon nga ang arka sa pakigsaad makapanalipod kanila sa panggubatan. (1 Sam. 4:3, 10, 11) Si Constantino nga Bantogan nagpintal sa Gregong mga letra nga khi ug rho, ang unang duha ka letra sa titulong “Kristo,” diha sa mga taming sa iyang mga sundalo sa pagtuo nga kana makapanalipod kanila sa panggubatan. Ug si Haring Gustav Adolph II sa Sweden, kinsa nakigsangka sa Trayenta ka Tuig nga Gubat sa Uropa, gituohan nga nagsul-ob sa armadura nga gipakita sa panid 7. Matikdi nga ang ngalang Iehova dayag nga nasulat niana.
15 Ang pipila ka alagad sa Diyos nga giatake sa mga demonyo naproteksiyonan pinaagi sa pagtawag nga kusog sa ngalan ni Jehova. Bisan pa niana, ang butang nga may ngalan sa Diyos dili angayng isipon nga usa ka anting-anting o habak nga makahatag konog proteksiyon. Dili kana ang gipasabot sa pagdangop sa ngalan ni Jehova.
Ang Pagdangop Karon
16. Sa unsang paagi atong makaplagan ang espirituwal nga dangpanan karon?
16 Atong makaplagan ang dangpanan karon diha sa espirituwal nga kasegurohan nga natagamtam sa katawhan sa Diyos. (Sal. 91:1) Pinaagi sa “matinumanon ug maalamong ulipon” ug sa mga ansiyano sa kongregasyon, kita gipasidan-an bahin sa mga uso sa kalibotan nga makapameligro sa maong kasegurohan. (Mat. 24:45-47; Isa. 32:1, 2) Hunahunaa kon unsa ka subsob kita gipasidan-an bahin sa materyalismo, ug nga kana nanalipod gayod kanato batok sa espirituwal nga kadaot. Komosta kon atong maugmad ang tinamdan nga magparelaks-relaks lang, nga moresulta sa pagkadi-aktibo sa pag-alagad kang Jehova? Ang Pulong sa Diyos nag-ingon: “Ang walay pagpakabana sa mga hungog mao ang molaglag kanila. Kon bahin sa nagapatalinghog kanako, siya magapuyo sa kasegurohan ug dili matugaw sa kalisang sa katalagman.” (Prov. 1:32, 33) Ang pagpabiling hinlo sa moral makatabang usab kanato nga mahuptan ang espirituwal nga kasegurohan.
17, 18. Unsay nakatabang sa minilyon sa pagdangop sa ngalan ni Jehova karon?
17 Hunahunaa usab ang pagdasig gikan sa matinumanong ulipon nga tumanon ang sugo ni Jesus nga isangyaw ang maayong balita sa Gingharian sa tanang kayutaan. (Mat. 24:14; 28:19, 20) Si Sofonias naghisgot ug kausaban nga makatabang sa mga tawo sa pagdangop sa ngalan sa Diyos. Atong mabasa: “Nianang panahona ihatag ko sa mga katawhan ang kausaban ngadto sa putli nga pinulongan, aron silang tanan magatawag sa ngalan ni Jehova, aron magaalagad kaniya abaga sa abaga.”—Sof. 3:9.
18 Unsa kining putli nga pinulongan? Kini ang kamatuoran bahin kang Jehova nga Diyos ug sa iyang mga katuyoan nga anaa sa iyang inspiradong Pulong. Samag nagagamit ka sa maong pinulongan sa dihang imong isulti sa uban kon unsa ang Gingharian sa Diyos ug kon unsaon niini pagbalaan ang iyang ngalan, sa dihang imong ipasiugda ang pagbindikar sa pagkasoberano sa Diyos, ug sa dihang imong hisgotan ang walay kataposang mga panalangin nga matagamtam sa matinumanong katawhan. Tungod kay daghan kaayo ang nagsulti niining simbolikong pinulongan, nagkadaghan ang ‘nagtawag sa ngalan ni Jehova’ ug ‘nag-alagad kaniya abaga sa abaga.’ Oo, minilyon karon sa tibuok yuta ang nagadangop kang Jehova.—Sal. 1:1, 3.
19, 20. Sa unsang paagi ang pagsalig sa “dalangpanan nga bakak” napakyas sa panahon sa Bibliya?
19 Ang mga tawo sa kalibotan nagsagubang ug bug-at kaayong mga problema. Kay gusto kaayo nilang masulbad kana, daghan ang modangop sa dili-hingpit nga mga tawo. O naglaom silag mga solusyon gikan sa politikanhong mga organisasyon, sama nga ang karaang Israel usahay midangop sa silingang mga nasod alang sa tabang, nga nakig-alyansa kanila. Apan, nahibalo ka nga kadto wala makatabang sa Israel. Ug walay gobyerno karon, ni ang Hiniusang Kanasoran, ang bug-os makasulbad sa mga problema sa katawhan. Busa nganong isipon nga dangpanan ang politikanhong mga organisasyon ug mga alyansa? Ang Bibliya matagnaong nagtawag kanila nga “dalangpanan nga bakak.” Matawag sila sa ingon kay ang tanang tawo nga naglaom kanila mapakyas gayod.—Basaha ang Isaias 28:15, 17.
20 Sa dili madugay, ang simbolikong bagyo sa adlaw ni Jehova mohapak sa yuta. Ang tawhanong mga organisasyon dili makahatag ug proteksiyon; ni ang gigama nga mga tagoanan alang sa gubat nukleyar ni ang bahandi. Ang Isaias 28:17 nag-ingon: “Ang ulan nga yelo magapapha sa dalangpanan nga bakak, ug ang mga tubig mismo mobaha sa mismong tagoanang dapit.”
21. Unsay atong matagamtam kon sundon ang tinuig nga teksto sa 2011?
21 Karon ug sa umaabot nga adlaw ni Jehova, ang katawhan sa Diyos makakaplag ug tinuod nga kasegurohan diha sa ilang Diyos, si Jehova. Ang ngalan ni Sofonias, nga nagkahulogang “Si Jehova Nagtipig,” nagtumong niining tinuod nga dangpanan. Sa katukma, ang atong tinuig nga teksto sa 2011 maoy maalamong tambag: ‘Dangop sa ngalan ni Jehova.’ (Sof. 3:12) Bisan karon kita makadangop ug angayng modangop sa ngalan ni Jehova, nga bug-os mosalig kaniya. (Sal. 9:10) Hinumdoman nato matag adlaw kining inspiradong pasalig: “Ang ngalan ni Jehova usa ka malig-ong torre. Nganha niana ang matarong modagan ug mahatagan sa panalipod.”—Prov. 18:10.
Nahinumdom Ka Ba?
• Unsaon nato pagdangop sa ngalan ni Jehova karon?
• Nganong dili kita angayng mosalig sa “dalangpanan nga bakak”?
• Unsang dangpanan ang gipasalig kanato sa umaabot?
[Mga Pangutana sa Pagtuon]
[Blurb sa panid 6]
Tinuig nga teksto sa 2011: ‘Dangop sa ngalan ni Jehova.’ —Sofonias 3:12.
[Picture Credit Line sa panid 7]
Thüringer Landesmuseum Heidecksburg Rudolstadt, Waffensammlung “Schwarzburger Zeughaus”