Gihatagag Gahom sa Pagsagubang sa Tentasyon ug Kahigawad

“Kamo magadawat ug gahom sa dihang ang balaang espiritu mokunsad kaninyo.”—BUH. 1:8.

1, 2. Unsang tabang ang gisaad ni Jesus sa iyang mga tinun-an, ug nganong gikinahanglan nila kadto?

SI Jesus nahibalo nga ang iyang mga tinun-an dili makatuman sa tanan niyang sugo sa kaugalingon nilang kusog. Tungod sa pagkadako sa buluhaton sa pagwali, pagkakusganon sa mga magsusupak, ug pagkaluya sa tawhanong lawas, sila nagkinahanglag labaw-tawhanong gahom. Busa, sa wala pa si Jesus mokayab sa langit, gipasaligan niya ang iyang mga tinun-an: “Kamo magadawat ug gahom sa dihang ang balaang espiritu mokunsad kaninyo, ug kamo mahimong akong mga saksi sa Jerusalem ug sa tibuok Judea ug Samaria ug hangtod sa kinalay-ang dapit sa yuta.”—Buh. 1:8.

² Ang maong saad unang natuman sa Pentekostes 33 K.P. sa dihang nadawat sa mga sumusunod ni Jesu-Kristo ang balaang espiritu aron makawali sila sa tibuok Jerusalem. Ang pagsupak wala makapugong sa buluhaton. (Buh. 4:20) “Sa tanang adlaw hangtod sa kataposan sa sistema sa mga butang,” ang matinumanong mga sumusunod ni Jesus, apil kita, nagkinahanglan gayod sa maong gahom nga gikan sa Diyos.—Mat. 28:20.

3. (a) Ipatin-aw ang kalainan tali sa balaang espiritu ug sa gahom. (b) Unsay atong mahimo tungod sa gahom nga gikan ni Jehova?

³ Si Jesus misaad sa iyang mga tinun-an nga ‘sila magadawat ug gahom sa dihang ang balaang espiritu mokunsad kanila.’ Magkalahi ang kahulogan sa terminong “gahom” ug “espiritu.” Ang espiritu sa Diyos, ang iyang aktibong puwersa, nagpasabot sa enerhiya nga ihatag nganha sa mga tawo o sa mga butang aron matuman ang kabubut-on sa Diyos. Apan, ang gahom mahubit ingong “katakos sa paglihok o pagpatunghag epekto.” Kini mahimong anaa ra sa usa ka tawo o butang ug sa dihang gamiton, kini mopatunghag resulta. Busa, ang balaang espiritu ikatandi sa koryente nga ikarga sa rechargeable nga baterya, samtang ang gahom nahisama sa enerhiya nga napondo diha sa baterya. Ang gahom nga ihatag ni Jehova sa iyang mga alagad pinaagi sa balaang espiritu mohatag kanatog katakos sa pagtuman sa atong pahinungod ug, kon gikinahanglan, sa pagbuntog sa kababagan nga atong maatubang.—Basaha ang Miqueas 3:8; Colosas 1:29.

4. Unsay hisgotan niining artikuloha, ug ngano?

⁴ Sa unsang paagi madayag ang gahom nga gihatag kanato sa balaang espiritu? Sa unsang paagi ang balaang espiritu magtukmod kanato sa paglihok o pagsanong sa lainlaing kahimtang? Sa atong pagpaningkamot nga magmatinumanon sa Diyos, makaatubang kitag daghang babag—nga ipahinabo ni Satanas, sa iyang sistema sa mga butang, o sa atong dili-hingpit nga unod. Importante nga atong mabuntog ang maong mga babag aron makalahutay kita, regular nga makigbahin sa ministeryo, ug mahuptan ang maayong relasyon kang Jehova. Atong hisgotan kon sa unsang paagi ang balaang espiritu motabang kanato  sa pagbuntog sa tentasyon ug sa pagsagubang sa kakapoy ug kahigawad.

Pagsukol sa Tentasyon

5. Sa unsang paagi ang pag-ampo makatabang kanato?

⁵ Si Jesus nagtudlo sa iyang mga sumusunod sa pag-ampo: “Ayaw kami dad-a ngadto sa tentasyon, apan luwasa kami gikan sa usa nga daotan.” (Mat. 6:13) Si Jehova dili mobiya sa iyang matinumanong mga alagad nga mangayo niini. Sa laing higayon, si Jesus miingon nga ang “Amahan sa langit mohatag ug balaang espiritu niadtong nagapangayo kaniya.” (Luc. 11:13) Makapalig-on nga si Jehova nagsaad nga mohatag kanato sa iyang espiritu—nga dakong tabang sa pagbuhat kon unsay matarong. Siyempre, wala kini magpasabot nga pugngan ni Jehova nga kita tentalon. (1 Cor. 10:13) Apan sa dihang makasinatig tentasyon, kanay panahon nga kita mag-ampo nga mas tim-os.—Mat. 26:42.

6. Diin gibase ni Jesus ang iyang mga tubag sa mga tentasyon ni Satanas?

⁶ Sa pagtubag sa mga tentasyon sa Yawa, si Jesus mikutlo sa Kasulatan. Ang Pulong sa Diyos tin-aw sa hunahuna ni Jesus sa mitubag siya: “Kini nahisulat . . . Kini nahisulat usab . . . Pahilayo, Satanas! Kay kini nahisulat, ‘Si Jehova nga imong Diyos ang imong pagasimbahon, ug siya lamang ang imong pagahatagan ug sagradong pag-alagad.’” Ang gugma kang Jehova ug sa iyang Pulong maoy nagtukmod kang Jesus sa pagsalikway sa mga tentasyon nga gipahamtang sa Maninental. (Mat. 4:1-10) Human sa subsob nga pagsalikway ni Jesus sa tentasyon, si Satanas mibiya.

7. Sa unsang paagi ang Bibliya motabang kanato sa pagsukol sa tentasyon?

⁷ Sanglit si Jesus misalig sa Kasulatan sa pagsukol sa mga tentasyon sa Yawa, labi na gayod kita! Sa pagkatinuod, aron makasukol kita sa Yawa, kinahanglang mahibalo una kita sa mga sukdanan sa Diyos ug bug-os mosunod niana. Daghan ang nadasig sa pagsunod sa mga sukdanan sa Bibliya sa dihang sila nagtuon sa Kasulatan ug nasabtan ang bili sa kaalam ug pagkamatarong sa Diyos. Gani, “ang pulong sa Diyos” gamhanan nga makaila sa “mga hunahuna ug mga tuyo sa kasingkasing.” (Heb. 4:12) Sa dihang ang usa kanunayng magbasa ug mamalandong sa Kasulatan, siya mas makabatog ‘hait nga salabotan sa kamatinud-anon ni Jehova.’ (Dan. 9:13) Busa, maayong mamalandong kita sa mga teksto nga may kalangkitan sa atong kahuyangan.

8. Sa unsang mga paagi atong madawat ang balaang espiritu?

⁸ Si Jesus nakasukol sa tentasyon kay siya may kahibalo sa Kasulatan ug “puno [usab] sa balaang espiritu.” (Luc. 4:1) Aron makasukol usab sa tentasyon, kita kinahanglang makigsuod kang Jehova pinaagi sa pagpahimulos sa tanan niyang tagana aron kita mapuno sa iyang espiritu. (Sant. 4:7, 8) Kini naglakip sa pagtuon sa Bibliya, pag-ampo, ug pagpakig-uban sa isigkamagtutuo. Daghan usab ang nakabenepisyo sa pagkahimong puliki sa Kristohanong kalihokan, nga makatabang kanato sa pagsentro sa atong hunahuna sa espirituwal nga mga butang.

9, 10. (a) Unsang mga tentasyon ang kasagarang maatubang sa mga Kristohanon? (b) Sa unsang paagi ang pagpamalandong ug pag-ampo makatabang sa pagsukol sa tentasyon bisag ikaw gikapoy?

⁹ Unsang mga tentasyon ang kinahanglan nimong suklan? Natental ka ba sa pagbirigbirig sa dili nimo kapikas? Kon ikaw dalaga o ulitawo, may panahon ba nga gusto nimong makigdeyt sa dili-magtutuo? Sa dihang magtan-awg TV o mag-Internet, ang mga Kristohanon mahimong matental sa pagtan-aw ug law-ay nga talan-awon. Kon kana nahitabo kanimo, unsay imong reaksiyon? Maalamong palandongon nga ang usa ka sayop nga tikang mahimong motultol sa laing sayop ug unya sa pagbuhat ug seryosong sala. (Sant. 1:14, 15) Hunahunaa ang kaguol nga bation ni Jehova, sa kongregasyon, ug sa imong pamilya tungod sa usa ka seryosong sala. Sa laing bahin, kon  ang usa magmaunongon sa mga prinsipyo sa Diyos, moresulta kana sa hinlo nga konsensiya. (Basaha ang Salmo 119:37; Proverbio 22:3.) Sa dihang makaatubang ka sa maong mga tentasyon, kinahanglan kang moampo nga hatagan kag kusog sa pagsukol niana.

¹⁰ May laing butang nga angayng hinumdoman bahin sa mga panental sa Yawa. Si Satanas miduol kang Jesus human sa Iyang 40 ka adlaw nga pagpuasa sa kamingawan. Ang Yawa naghunahuna gayod nga kadto ang “angay nga higayon” aron sulayan ang integridad ni Jesus. (Luc. 4:13) Si Satanas mangitag angay nga mga higayon aron sulayan usab ang atong integridad. Busa, kinahanglang lig-on kita kanunay sa espirituwal. Si Satanas sagad moatake sa dihang makita niya nga huyang ang iyang puntirya. Busa kon kita gikapoy o nahigawad, mas angay kitang moampo kang Jehova alang sa iyang panalipod ug balaang espiritu.—2 Cor. 12:8-10.

Pagsagubang sa Kakapoy ug Kahigawad

11, 12. (a) Nganong daghan ang nahigawad karon? (b) Unsay makatabang kanato sa pagsagubang sa kahigawad?

¹¹ Kay dili hingpit, kita mahigawad matag karon ug unya. Tinuod kini kay kita nagkinabuhi sa malisod nga panahon, nga tingali maoy kinalisdang panahon nga nasinati sa tawo. (2 Tim. 3:1-5) Samtang nagsingabot ang Armagedon, mosamot pa ang kapit-os sa ekonomiya, emosyon, ug uban pa. Busa, dili kita matingala nga ang uban naglisod sa pagbuhi sa ilang pamilya. Sila gikapoy, nabug-atan, naluya, ug nakasinati pag depresyon. Kon kanay imong kahimtang, unsaon nimo pagsagubang niana?

¹² Hinumdomi, si Jesus nagpasalig sa iyang mga tinun-an nga siya mohatag kanilag magtatabang—ang balaang espiritu sa Diyos. (Basaha ang Juan 14:16, 17.) Kini ang labing gamhanang puwersa sa uniberso. Pinaagi niini, si Jehova makataganag “hilabihan kamadagayaon” nga kusog nga atong gikinahanglan aron maantos ang mga pagsulay. (Efe. 3:20) Sumala ni apostol Pablo, kon mosalig kita niini, atong madawat ang “gahom nga labaw sa kasarangan,” bisan pag kita “ginapiit sa tanang paagi.” (2 Cor. 4:7, 8) Si Jehova wala magsaad nga iyang wad-on karon ang kapit-osan, apan siya nagpasalig nga pinaagi sa iyang espiritu, siya mohatag kanatog kusog sa pagsagubang niini.—Filip. 4:13.

13. (a) Sa unsang paagi ang usa ka batan-on natabangan sa pagsagubang sa lisod nga situwasyon? (b) May nasayran ka bang susamang mga kasinatian?

¹³ Tagda ang pananglitan ni Stephanie,  19-anyos nga regular payunir. Sa nag-edad siyag 12, siya naestrok ug nadayagnos nga may tumor sa utok. Sukad niadto, siya naoperahag kaduha, nakaagig radyasyon, ug naestrok pag kaduha, mao nga naparalisar ang walang bahin sa iyang lawas ug siya nahalap. Kinahanglang ireserba ni Stephanie ang iyang kusog alang sa mas hinungdanong mga butang, sama sa pagtambong sa tigom ug pagsangyaw. Bisan pa niana, iyang gibati nga ang espiritu ni Jehova nagtabang kaniya sa paglahutay. Ang mga eksperyensiya diha sa atong mga publikasyon nakadasig kaniya sa dihang siya masulob-on. Ang mga igsoon nagpalig-on kaniya pinaagig mga sulat o pagpakig-estorya kaniya diha sa mga tigom. Ang mga interesado nag-apresyar usab sa ginatudlo ni Stephanie kanila mao nga sila ang moadto sa iyang balay aron magtuon sa Bibliya. Si Stephanie mapasalamaton kaayo kang Jehova niining tanan. Ang iyang paboritong teksto mao ang Salmo 41:3, kay iya kanang nasinati mismo.

14. Unsay angayng likayan sa dihang kita mahigawad, ug ngano?

¹⁴ Kon kita gikapoy o mibatig kapit-os, dili nato hunahunaon nga masagubang kana pinaagi sa pagkunhod sa panahon alang sa espirituwal nga kalihokan. Dili gayod kana maalamon. Ngano? Kay pinaagi sa personal ug pamilyahanong pagtuon sa Bibliya, pagsangyaw, ug pagtambong sa tigom, atong madawat ang balaang espiritu. Ang maong mga kalihokan kanunay nga makapalagsik. (Basaha ang Mateo 11:28, 29.) Daghang igsoon ang moabot sa tigom nga gikapoy, apan human sa tigom sila malagsik, samag baterya nga na-recharged.

15. (a) Nagsaad ba si Jehova nga mahimong sayon ang kinabuhi sa usa ka Kristohanon? Isaysay gamit ang Kasulatan. (b) Unsay gisaad sa Diyos kanato, nga motultol sa unsang pangutana?

¹⁵ Siyempre, wala kini magpasabot nga sayon ang pagkatinun-an ni Kristo. Nagkinahanglag paningkamot aron magmatinumanon ang usa ka Kristohanon. (Mat. 16:24-26; Luc. 13:24) Apan si Jehova makahatag ug kusog sa gikapoy pinaagi sa balaang espiritu. Si propeta Isaias misulat: “Kadtong naglaom kang Jehova maulian sa kusog. Sila manglupad pataas pinaagig mga pako nga sama sa mga agila. Sila managan ug dili maluya; sila manglakaw ug dili kapoyon.” (Isa. 40:29-31) Busa, maayong mangutana, Unsay tinuod nga hinungdan sa espirituwal nga kakapoy?

16. Unsay atong mahimo aron dili kita maluya?

¹⁶ Ang Pulong ni Jehova nag-awhag kanato sa ‘pagtino sa mas hinungdanong mga butang.’ (Filip. 1:10) Gitandi ni apostol Pablo ang Kristohanong pagkinabuhi sa usa ka lumba, ug siya may inspiradong sugyot: “Tangtangon usab nato ang tanang kabug-at . . . , ug daganon nato nga malahutayon ang lumba nga gibutang sa atong atubangan.” (Heb. 12:1) Siya nagpasabot nga atong likayan ang way-hinungdang mga buluhaton ug kabug-at nga makapaluya kanato. Tingali ang pipila daghan ra kaayog ginabuhat. Busa kon pirme kang kapoyon ug mobatig kapit-os, makatabang ang pagsusi kon unsa ka daghang oras ang imong gigugol sa trabaho, pagbiyahe alang sa lulinghayaw, esports o ubang kalingawan. Kon kita makataronganon ug makasaranganon, masayran nato ang atong mga limitasyon ug mamenosan ang wala-kinahanglanang mga kalihokan.

17. Nganong ang pipila nahigawad, apan unsay gipasalig ni Jehova?

¹⁷ Tingali ang pipila kanato nahigawad usab kay wala pa moabot ang gidahom nga  kataposan niining sistema sa mga butang. (Prov. 13:12) Apan kadtong mibati niini madasig sa mga pulong sa Habacuc 2:3: “Ang panan-awon alang pa sa tinudlong panahon, ug kini nagadali paingon sa kataposan, ug kini dili magbakak. Bisan pa kon kini malangan, padayon sa pagpaabot niini; kay kini matuman gayod. Kini dili maulahi.” Si Jehova nagpasalig kanato nga moabot gayod ang kataposan niining sistema sa mga butang sumala sa iyang gitakdang panahon!

18. (a) Unsang mga saad ang makapalig-on kanimo? (b) Sa unsang paagi kita makabenepisyo sa sunod artikulo?

¹⁸ Tinuod, ang tanang matinumanong alagad ni Jehova nangandoy sa panahon nga wala nay kakapoy ug kahigawad, sa dihang ang tanan makatagamtam sa ‘kabaskog sa pagkabatan-on.’ (Job 33:25) Bisan karon, kita mahimong kusganon pinaagi sa balaang espiritu samtang nakigbahin sa espirituwal nga mga kalihokan. (2 Cor. 4:16; Efe. 3:16) Ayawg itugot nga ang kakapoy maghikaw kanimo sa way-kataposang mga panalangin. Ang tanang pagsulay—tungod sa tentasyon, kakapoy, o kahigawad—mahanaw, kon dili dihadiha, nan sa bag-ong kalibotan sa Diyos. Sa sunod artikulo, atong susihon kon sa unsang paagi ang balaang espiritu nagtabang sa mga Kristohanon sa pagsagubang sa paglutos, pagsukol sa pagpamit-os sa isigkaingon, ug sa pag-antos sa ubang kalisdanan.

Unsay Imong Tubag?

• Sa unsang paagi ang pagbasa sa Bibliya makatabang kanato?

• Sa unsang paagi ang pag-ampo ug pagpamalandong makatabang kanato?

• Unsay imong mahimo aron dili ka mahigawad?

[Mga Pangutana sa Pagtuon]

[Hulagway sa panid 24]

Ang mga tigom makapalagsik kanato sa espirituwal