Tan-awa ang Ngalan Diha sa Walog

ST. MORITZ. Pamilyar ba ang maong ngalan? Lagmit, kay kini usa ka bakasyonanan sa Engadine Valley sa Switzerland nga ilado sa tibuok kalibotan. Apan ang St. Moritz usa lang sa mga dapit sa maong nindot nga walog nga nakadanig daghang tawo sulod sa daghang katuigan. Kini nahimutang taliwala sa punog-yelo nga mga taluktok sa Alps sa habagatan-sidlakang bahin sa Switzerland duol sa utlanan sa Italya. Ania usab dinhi ang Swiss National Park, diin ang matahom ug nagkalainlaing tanom ug hayop nagadayeg sa atong Dakong Maglalalang, si Jehova. (Sal. 148:7-10) Ingon man usab ang mga timaan sa tradisyon nga gisunod sa tungatunga sa ika-17ng siglo.

Lagmit imong mamatikdan ang talagsaong marka nga makita sa daghang balay dinhi. Kasagaran makita ang ngalan sa Diyos nga gisulat  atubangan sa balay, sama sa ibabaw sa pultahan. Kasiglohan kanhi, tradisyon dinhi ang pagbutang ug sinulat nga dekorasyon sa gawas sa balay, mahimong gipintal, gisulat sa plaster, o gikulit sa bato. Imong makita ang sinulat diha sa usa ka balay sa baryo sa Bever. Kini ang hubad: “Tuig 1715. Si Jehova ang sinugdanan, ug si Jehova ang kataposan. Walay malampos kon wala ang Diyos.” Oo, duha ka beses mabasa ang ngalan sa Diyos sa maong karaang sinulat.

Imong makita ang mas karaang sinulat sa baryo sa Madulain. Kini nag-ingon: “Salmo 127. Gawas nga si Jehova ang magtukod sa balay, kawang lamang ang paghago sa mga magtutukod niini. Lucius Rumedius. Tuig 1654.”

Nganong gidispley man ang ngalan sa Diyos diha sa maong walog? Panahon sa Repormasyon, ang Bibliya gipatik sa Romansh, binase-sa-Latin nga pinulongan nga gigamit sa Engadine. Gani, kana ang unang libro nga gihubad sa maong pinulongan. Kay natandog sa nabasa sa Pulong sa Diyos, daghan ang nagsulat dili lang sa ilang ngalan kondili sa mga teksto usab sa Bibliya nga may ngalan sa Diyos diha sa gawas sa ilang balay.

Oo, hangtod karon, kini nga mga sinulat nagpahayag sa ngalan ni Jehova ug nagdayeg kaniya, bisag kasiglohan na ang milabay sukad sa pagsulat niini. Ang mga bisita ug mga molupyo sa maong walog gidapit sa pagkat-on ug dugang bahin sa talagsaong Diyos, si Jehova, pinaagi sa pagduaw sa laing bilding nga nagdala sa iyang ngalan—ang Kingdom Hall sa mga Saksi ni Jehova sa Bever.

[Picture Credit Line sa panid 7]

© Stähli Rolf A/age fotostock