Dawata ang Espiritu sa Diyos, Dili ang sa Kalibotan
Dawata ang Espiritu sa Diyos, Dili ang sa Kalibotan
“Atong nadawat, dili ang espiritu sa kalibotan, kondili ang espiritu nga gikan sa Diyos, aron kita mahibalo sa mga butang nga malulotong gihatag kanato sa Diyos.”—1 COR. 2:12.
1, 2. (a) Sa unsang diwa nakiggubat ang matuod nga mga Kristohanon? (b) Unsang mga pangutana ang pagatagdon?
ANG matuod nga mga Kristohanon adunay pakiggubat! Ang atong kaaway gamhanan, malinglahon, ug batid sa pagpakigbugno. Siya may hinagiban nga kusganon kaayo nga kini nakaimpluwensiya sa kadaghanan. Pero dili kita angayng mobati nga way katakos sa pagsukol niini. (Isa. 41:10) Duna kitay magamit nga depensa nga dili madutlan ug dili mapukan.
2 Ang atong pagpakiggubat maoy espirituwal, dili literal. Ang atong kaaway mao si Satanas nga Yawa, ug ang iyang pangunang hinagiban mao ang “ang espiritu sa kalibotan.” (1 Cor. 2:12) Ang atong pangunang depensa batok sa iyang pag-atake mao ang espiritu sa Diyos. Aron makadaog sa maong gubat ug makapabiling suod sa Diyos, kinahanglan kitang mangayo sa espiritu sa Diyos ug magpasundayag sa bunga niini diha sa atong kinabuhi. (Gal. 5:22, 23) Apan, unsa ang espiritu sa kalibotan, ug sa unsang paagi kini nakaimpluwensiya sa kadaghanan? Unsaon nato pagkahibalo nga ang espiritu sa kalibotan nag-impluwensiya kanato? Ug unsay atong makat-onan kang Jesus bahin sa pagdawat sa espiritu sa Diyos ug sa pagsukol sa espiritu sa kalibotan?
Nganong Kaylap Kaayo ang Espiritu sa Kalibotan?
3. Unsa ang espiritu sa kalibotan?
3 Ang espiritu sa kalibotan naggikan kang Satanas, “ang magmamando niining kalibotana,” ug kini supak sa balaang espiritu sa Diyos. (Juan 12:31; 14:30; 1 Juan 5:19) Ang maong espiritu kaylap kaayo sa kalibotan, ug kini nagtukmod sa katawhan sa pagsupak sa kabubut-on ug katuyoan sa Diyos.
4, 5. Sa unsang paagi mikaylap pag-ayo ang espiritu nga gipasiugda ni Satanas?
4 Nganong mikaylap pag-ayo ang espiritu nga gipasiugda ni Satanas? Una, gilimbongan ni Satanas si Eva sa tanaman sa Eden. Gikombinsir niya si Eva nga kon siya mag-independente gikan sa Diyos, mas maayo ang iyang kinabuhi. (Gen. 3:13) Pagkabakakon! (Juan 8:44) Dayon, gigamit niya ang babaye sa pagdani kang Adan sa pagsupak kang Jehova. Tungod sa desisyon ni Adan, ang katawhan nailalom sa sala ug nakapanunod sa tendensiya nga maimpluwensiyahan sa masupakong espiritu ni Satanas.—Basaha ang Efeso 2:1-3.
5 Giimpluwensiyahan usab ni Satanas ang daghang manulonda, nga nahimong mga demonyo. (Pin. 12:3, 4) Ang ilang pagtalikod sa Diyos nahitabo sa wala pa ang Lunop sa adlaw ni Noe. Ang maong mga manulonda nagtuo nga mas maayo ang ilang kahimtang kon biyaan nila ang ilang posisyon sa langit ug tagbawon ang ilang dili-kinaiyanhong mga tinguha sa yuta. (Jud. 6) Uban sa mga demonyo nga nahibalik sa pagkaespiritu, si Satanas “nagpahisalaag sa tibuok gipuy-ang yuta.” (Pin. 12:9) Ikasubo nga kadaghanan sa katawhan nagpabiling walay alamag bahin sa impluwensiya sa mga demonyo.—2 Cor. 4:4.
Nagpaimpluwensiya Ka ba sa Espiritu sa Kalibotan?
6. Sa unsang paagi lamang nga kita maimpluwensiyahan sa espiritu sa kalibotan?
6 Daghan ang wala mahibalo sa impluwensiya ni Satanas, apan ang matuod nga mga Kristohanon nahibalo sa iyang mga taktika. (2 Cor. 2:11) Sa pagkatinuod, dili kita maimpluwensiyahan sa espiritu sa kalibotan kon dili nato kini tugotan. Atong susihon ang upat ka pangutana nga magpadayag kon kita ba nagpaimpluwensiya sa espiritu sa Diyos o sa kalibotan.
7. Unsay usa ka paagi nga si Satanas naningkamot sa pagpahilayo kanato gikan kang Jehova?
7 Unsay gipadayag sa akong gipiling kalingawan bahin kanako? (Basaha ang Santiago 3:14-18.) Si Satanas naningkamot nga ipahilayo kita sa Diyos pinaagi sa pag-ugmad sa gugma sa kapintasan diha sa atong kasingkasing. Ang Yawa nahibalo nga si Jehova nagdumot niadtong nahigugma sa kapintasan. (Sal. 11:5) Busa, gigamit ni Satanas ang mga basahon, pelikula, musika, ug elektronikong dula aron pukawon ang unodnong mga tinguha sama sa imoralidad ug kapintasan. Malipay si Satanas nga mabahin ang atong kasingkasing sa paghigugma sa pagkamatarong ug sa pagkadaotan.—Sal. 97:10.
8, 9. Unsang mga pangutana bahin sa kalingawan ang angayng isukna sa kaugalingon?
8 Sa laing bahin, ang espiritu sa Diyos magtukmod niadtong nakadawat niini nga mahimong putli, makigdaiton, ug maluluy-on. Pangutan-a ang kaugalingon: ‘Ang gipili ba nakong kalingawan nagdasig kanako sa pag-ugmad ug maayong mga hiyas?’ Ang kaalam nga gikan sa itaas “dili salingkapaw.” Kadtong nagpaimpluwensiya sa espiritu sa Diyos dili angayng magsangyaw bahin sa kaputli ug kalinaw ug sa samang higayon malingaw sa pagtan-awg kapintasan ug imoralidad sa pribado.
9 Si Jehova nangayog eksklusibong debosyon. Apan, si Satanas mahimuot na sa usa lamang ka buhat sa pagsimba, sama sa iyang giagda nga buhaton ni Jesus. (Luc. 4:7, 8) Lagmit makapangutana kita: ‘Ang ako bang kalingawan nakatabang nako sa paghatag ug eksklusibong debosyon sa Diyos? Kini ba nakapalisod o nakatabang nako sa pagsukol sa espiritu sa kalibotan? Angay ba nakong ilisan ang akong mga kalingawan?’
10, 11. (a) Unsang tinamdan bahin sa materyal nga mga butang ang gipasiugda sa espiritu sa kalibotan? (b) Unsang tinamdan ang gidasig sa Pulong sa Diyos?
10 Unsay akong tinamdan bahin sa materyal nga mga butang? (Basaha ang Lucas 18:24-30.) Ang espiritu sa kalibotan nagpasiugda sa “tinguha sa mga mata” pinaagi sa pagdasig sa kahakog ug materyalismo. (1 Juan 2:16) Nagtukmod kini sa daghan nga magpadato. (1 Tim. 6:9, 10) Ang maong espiritu magpahunahuna kanato nga ang pagtigom ug daghang bahandi mohatag ug dumalayong kasegurohan. (Prov. 18:11) Apan, kon kita mas mahigugma sa salapi kay sa Diyos, magmadaogon si Satanas. Pangutan-a ang kaugalingon, ‘Ang ako bang kinabuhi nasentro sa pagpangagpas sa materyal nga mga butang ug sa kalingawan?’
11 Sa kasukwahi, ang inspirado-sa-espiritu nga Pulong sa Diyos nagdasig kanato sa pagbaton ug balanseng panglantaw sa salapi ug sa pagkugi aron matagana ang atong materyal nga panginahanglan ug sa pamilya. (1 Tim. 5:8) Ang espiritu sa Diyos motabang niadtong nakadawat niini sa pagsundog sa pagkamahinatagon ni Jehova. Nailhan sila nga tighatag, dili tigdawat. Mas gipabilhan nila ang mga tawo kay sa mga butang ug sila malipayng mohatag kutob sa ilang maarangan. (Prov. 3:27, 28) Ug dili gayod nila tugotan nga unahon ang pagpangagpas sa salapi kay sa pag-alagad sa Diyos.
12, 13. Sukwahi sa espiritu sa kalibotan, unsay maayong epekto sa espiritu sa Diyos diha kanato?
12 Unsang espiritu ang akong gipasundayag? (Basaha ang Colosas 3:8-10, 13.) Ang espiritu sa kalibotan nagdasig sa mga buhat sa unod. (Gal. 5:19-21) Masayran kon unsang espiritu ang nag-impluwensiya kanato sa dihang motungha ang dili maayong kahimtang—kon ang usa ka igsoon sa pagtuo dili managad, makapasuko, o makasala kanato. Dugang pa, sulod sa atong panimalay, mahimong madayag kon unsang espiritu ang nag-impluwensiya kanato. Mahimong susihon nato ang atong kaugalingon, ‘Sa miaging unom ka bulan, mas nasundog ba nako ang personalidad ni Kristo o nahibalik ba ang akong ngil-ad nga sinultihan ug panggawi?’
13 Ang espiritu sa Diyos makatabang kanato sa ‘paghukas sa daang pagkatawo uban ang mga buhat niini’ ug pagsul-ob sa “bag-ong pagkatawo.” Kana motabang kanato nga mahimong mas mahigugmaon ug maluloton. Kita mahimong mapinasayloon sa usag usa, bisag may katarongan kitang moreklamo. Bisan pa sa mga inhustisya, dili na mosilaob ang atong “mapangdaot nga kayugot ug kasuko ug kapungot ug sininggitay ug mapasipalahong sinultihan.” Hinunoa, maningkamot kita nga “magmalumo uban ang pagkamabination.”—Efe. 4:31, 32.
14. Unsay panglantaw sa kadaghanan bahin sa Pulong sa Diyos?
14 Ako bang gitahod ug gihigugma ang moral nga mga sukdanan sa Bibliya? (Basaha ang Proverbio 3:5, 6.) Ang espiritu sa kalibotan nagsabwag ug pagkamasupakon sa Pulong sa Diyos. Kadtong naimpluwensiyahan sa maong espiritu wala magsunod sa mga bahin sa Bibliya nga giisip nilang lisod tumanon, nga nagpalabi hinuon sa tawhanong mga tradisyon ug pilosopiya. (2 Tim. 4:3, 4) Ang uban bug-os nga nagsalikway sa Pulong sa Diyos. Ilang gikuwestiyon ang pagkapraktikal ug pagkakasaligan sa Bibliya, nga nagmaalamon sa kaugalingon. Gipaubos nila ang hataas nga mga sukdanan bahin sa panapaw, homoseksuwalidad, ug diborsiyo. Sila nagtudlo nga ang “maayo maoy daotan ug ang daotan maoy maayo.” (Isa. 5:20) Naapektohan ba kita sa maong espiritu? Sa dihang mag-atubang ug mga problema, mosalig ba kita sa tawhanong kaalam, apil sa atong kaugalingong mga ideya? O maningkamot kita sa pagsunod sa tambag sa Bibliya?
15. Inay mosalig sa kaugalingong kaalam, unsay angay natong buhaton?
15 Pinaagi sa espiritu sa Diyos, atong maugmad ang pagtahod sa Bibliya. Sama sa salmista, atong giisip ang Pulong sa Diyos ingong lampara sa atong tiil ug kahayag sa atong alagianan. (Sal. 119:105) Inay mosalig sa kaugalingong kaalam, kita mosalig sa Bibliya sa pag-ila sa maayo ug sa daotan. Kita nakakat-on dili lamang sa pagtahod sa Bibliya kondili sa paghigugma usab sa balaod sa Diyos.—Sal. 119:97.
Pagkat-on sa Ehemplo ni Jesus
16. Unsay nalangkit sa pagbaton sa “panghunahuna ni Kristo”?
16 Aron madawat ang espiritu sa Diyos, kinahanglan natong ugmaron ang “panghunahuna ni Kristo.” (1 Cor. 2:16) Kinahanglan natong mahibaloan ang iyang panghunahuna ug panggawi ug dayon sundogon siya aron mabatonan ang “samang tinamdan sa pangisip nga nabatonan ni Kristo Jesus.” (Roma 15:5; 1 Ped. 2:21) Tagda ang pipila ka paagi nga mahimo kini.
17, 18. (a) Unsay atong makat-onan kang Jesus bahin sa pag-ampo? (b) Nganong angay nga ‘magpadayon kita sa pagpangayo’?
17 Pag-ampo alang sa espiritu sa Diyos. Sa wala pa moatubang ug mga pagsulay, si Jesus nag-ampo alang sa tabang sa espiritu sa Diyos. (Luc. 22:40, 41) Kita usab kinahanglang mangayo sa balaang espiritu sa Diyos. Si Jehova madagayaong mohatag kon pangayoon kini uban ang pagtuo. (Luc. 11:13) Si Jesus miingon: “Padayon sa pagpangayo, ug igahatag kini kaninyo; padayon sa pagpangita, ug kamo makakaplag; padayon sa pagpanuktok, ug pagabuksan kini kaninyo. Kay ang matag usa nga nagapangayo magadawat, ug ang matag usa nga nagapangita makakaplag, ug sa matag usa nga nagapanuktok kini pagabuksan.”—Mat. 7:7, 8.
18 Sa dihang mangayo sa espiritu ug tabang ni Jehova, ayaw dayon ug hunong. Basin kinahanglan kitang mas subsob ug dili magdalidali sa pag-ampo. Usahay, tugotan ni Jehova nga ipasundayag niadtong nangamuyo kaniya ang ilang dakong kabalaka ug tim-os nga pagtuo una niya tubagon ang ilang mga pag-ampo. *
19. Unsa ang kanunayng gibuhat ni Jesus, ug nganong angay nato siyang sundogon?
19 Sunda si Jehova sa bug-os. Si Jesus kanunayng nagbuhat sa mga butang nga makapahimuot sa iyang Amahan. Sa usa ka higayon, gusto ni Jesus nga atubangon ang usa ka situwasyon sa paagi nga lahi sa iyang Amahan. Apan, may pagsalig siyang miingon sa iyang Amahan: “Matuman unta dili ang akong kabubut-on, kondili ang imoha.” (Luc. 22:42) Pangutan-a ang kaugalingon, ‘Ginasunod ko ba ang Diyos bisag lisod ang pagbuhat niana?’ Ang pagkamasinundanon sa Diyos gikinahanglan aron kita mabuhi. Angay kitang magmasinugtanon kaniya sa bug-os kay siya ang atong Magbubuhat, ang Tuboran ug Tigsustento sa atong kinabuhi. (Sal. 95:6, 7) Bililhon gayod ang pagkamasinundanon aron atong maangkon ang pag-uyon sa Diyos.
20. Diin nasentro ang kinabuhi ni Jesus? Sa unsang paagi nato siya masundog?
20 Tun-i pag-ayo ang Bibliya. Si Jesus mikutlo sa Kasulatan sa pagsukol sa mga panental ni Satanas. (Luc. 4:1-13) Sa dihang giatubang ni Jesus ang relihiyosong mga magsusupak, siya nangatarongan pinasukad sa Pulong sa Diyos. (Mat. 15:3-6) Ang tibuok kinabuhi ni Jesus nasentro sa pagkat-on ug pagtuman sa balaod sa Diyos. (Mat. 5:17) Buot usab natong tun-an kanunay ang makapalig-on sa pagtuo nga Pulong sa Diyos. (Filip. 4:8, 9) Ang uban tingali malisdan sa pagpangitag panahon alang sa personal ug pamilyahanong pagtuon. Imbes mangitag panahon, kinahanglang mogahin kitag panahon.—Efe. 5:15-17.
21. Unsang kahikayan ang makatabang kanato nga mas masinati sa Pulong sa Diyos ug magpadapat niana?
21 “Ang matinumanon ug maalamong ulipon” nagtabang kanato sa pagbatog panahon alang sa personal ug pamilyahanong pagtuon pinaagi sa paghikay ug usa ka gabii kada semana alang sa Pamilyahanong Pagsimba. (Mat. 24:45) Ginasunod ba ninyo ang maong kahikayan? Aron mabatonan ang panghunahuna ni Kristo, mahimo ninyong ilakip sa pagtuon ang gusto ninyong mga ulohan nga gitudlo ni Jesus. Mahimo ninyong gamiton ang Watch Tower Publications Index aron makita ang impormasyon bahin sa ulohan nga inyong gipili. Pananglitan, gikan sa 2008 hangtod sa 2010, ang publikong edisyon niining magasina may 12 ka artikulo nga nag-ulohang “Kon Unsay Atong Makat-onan Kang Jesus.” Basin gusto ninyong gamiton kini sa inyong pagtuon. Sugod sa 2006, ang Pagmata! may seksiyong “Unsay Imong Tubag?” Kini gidisenyo aron mouswag ug molalom ang inyong kahibalo sa Pulong sa Diyos. Nganong dili ninyo kini ilakip sa inyong Pamilyahanong Pagsimba matag karon ug unya?
Atong Madaog ang Kalibotan
22, 23. Unsay kinahanglan natong buhaton aron madaog ang kalibotan?
22 Aron magiyahan sa espiritu sa Diyos, kinahanglang suklan nato ang espiritu sa kalibotan. Dili kini sayon kay kini mahimong usa ka pagpakigbugno. (Jud. 3) Apan makadaog kita niana! Si Jesus miingon sa iyang mga tinun-an: “Sa kalibotan kamo adunay kasakitan, apan magmaisogon! Gidaog ko na ang kalibotan.”—Juan 16:33.
23 Madaog usab nato ang kalibotan kon atong suklan ang espiritu niini ug buhaton ang maarangan aron madawat ang espiritu sa Diyos. Sa pagkatinuod, “kon ang Diyos dapig kanato, kinsa ang batok kanato?” (Roma 8:31) Pinaagi sa pagdawat sa espiritu sa Diyos ug pagsunod sa giya niini nga gipadayag sa Bibliya, atong matagamtam ang katagbawan, kalinaw, kalipay, ug ang gisaad nga kinabuhing walay kataposan sa haduol nang bag-ong kalibotan.
[Footnote]
^ par. 18 Alang sa dugang impormasyon, tan-awa ang panid 170-173 sa librong Unsay Tinuod nga Gitudlo sa Bibliya?
Nahinumdom Ka Ba?
• Nganong kaylap kaayo ang espiritu sa kalibotan?
• Unsa ang upat ka pangutana nga angayng isukna sa kaugalingon?
• Unsa ang tulo ka butang nga atong makat-onan kang Jesus bahin sa pagdawat sa espiritu sa Diyos?
[Mga Pangutana sa Pagtuon]
[Hulagway sa panid 8]
Sa unsang paagi nahimong mga demonyo ang ubang manulonda?
[Hulagway sa panid 10]
Gigamit ni Satanas ang espiritu sa kalibotan sa pagkontrolar sa mga tawo, apan makalingkawas kita sa impluwensiya niini
