Mga Pangutana Gikan sa mga Magbabasa

Unsay ipasabot sa impormasyon diha sa tinuig nga taho sa pag-alagad?

Matag tuig, kita naghinamhinam nga makabasa sa taho sa pag-alagad diha sa atong Tinuig nga Basahon. Makapalipay gayod ang pagkahibalo sa nalampos sa katawhan ni Jehova sa buluhatong pagsangyaw ug pagpanudlo. Aron makabenepisyo sa taho, kinahanglang masabtan nato kon unsay gitumong sa mga titulo ug numero diha niana. Tagda ang pipila ka pananglitan.

Tuig sa pag-alagad. Kini magsugod sa Septiyembre sa usa ka tuig ug matapos sa Agosto pagkasunod tuig. Ang Tinuig nga Basahon naundan sa taho sa miaging tuig sa pag-alagad. Busa, ang 2011 Tinuig nga Basahon naundan sa taho sa 2010 nga tuig sa pag-alagad, nga nagsugod sa Septiyembre 1, 2009, ug natapos sa Agosto 31, 2010.

Kinatas-ang ihap sa magmamantala ug aberids nga magmamantala. Ang “mga magmamantala” naglakip sa bawtismadong mga Saksi ni Jehova ug sa mga di-bawtismado nga kuwalipikado na sa pagsangyaw. Ang “kinatas-ang ihap sa magmamantala” gibase sa bulan nga labing daghan ang nagtaho. Kini mahimong naglakip sa naulahing mga taho nga wala maapil sa miaging bulan. Sa ingon, ang pipila ka magmamantala kaduha maihap. Hinunoa, ang “kinatas-ang ihap” wala maglakip sa mga magmamantala nga nagsangyaw apan nalimot sa pagtaho. Kini nagpakita nga hinungdanon gayod nga ang matag magmamantala mohatag dayon sa ilang taho kada bulan. Ang “aberids nga magmamantala” mao ang kasagarang gidaghanon niadtong nagtaho sa ilang oras sa pagsangyaw matag bulan.

Total nga oras. Sumala sa 2011 Tinuig nga Basahon, ang mga Saksi ni Jehova migugol ug kapig 1.6 bilyong oras sa pagsangyaw. Apan kini nga total wala magtumong sa tanang oras nga atong gigugol sa pagsimba, kay wala malakip niana ang panahong gigugol sa mga ansiyano sa pag-atiman sa panon, atong pagtambong sa tigom, personal nga pagtuon sa Bibliya, ug pagpamalandong sa natun-an.

Nagastong salapi. Sa 2010 nga tuig sa pag-alagad, ang mga Saksi ni Jehova migasto ug kapig $155 milyones sa pagsuportar sa mga espesyal payunir, misyonaryo, ug nagapanawng magtatan-aw. Apan kini wala maglakip sa gigasto sa pag-imprentag Bibliya, literatura, ug sa pagsuportar sa kapig 20,000 ka boluntaryo sa Bethel sa tibuok kalibotan.

Miambit sa Memoryal. Kini ang gidaghanon sa bawtismadong mga Saksi nga miambit sa mga emblema sa Memoryal sa tibuok kalibotan. Kini ba nagtumong sa gidaghanon sa mga dinihogang nia pa sa yuta? Dili sa tanang higayon, kay ang uban sayop nga nagtuo nga sila maoy dinihogan tungod sa pipila ka hinungdan—sama sa nangaging relihiyon, mental o emosyonal nga problema. Busa dili gyod nato mahibaloan ang eksaktong gidaghanon sa mga dinihogang nia pa sa yuta; ni kinahanglang mahibalo kita niana. Ang Nagamandong Lawas wala maglista sa ngalan sa tanang miambit sa mga emblema. *

Hinuon, kita nahibalo nga aduna unyay pipila ka dinihogang “mga ulipon sa atong Diyos” nga nia pa sa yuta sa dihang buhian ang malaglagong mga hangin sa dakong kasakitan. (Pin. 7:1-3) Sa kasamtangan, ang mga dinihogan nagdumala sa kinadak-ang buluhaton sa pagsangyaw ug pagpanudlo sa kasaysayan nga ginarekord diha sa atong tinuig nga taho sa pag-alagad.

[Footnote]