Mga Pangutana Gikan sa mga Magbabasa

Unsay akong buhaton kon may pangutana ko sa akong nabasahan sa Bibliya o kon nanginahanglan kog tambag sa akong problema?

Ang Proverbio 2:1-5 nag-awhag nato sa ‘pagpadayon sa pagpangita’ sa pagsabot ug sa katakos sa pag-ila nga samag nangita kitag “tinagong mga bahandi.” Kini nagpasabot nga magkugi kita sa pagpangita sa mga tubag sa atong mga pangutana sa Bibliya ug sa solusyon sa atong mga problema. Sa unsang paagi?

Ang librong Pahimusli ang Edukasyon sa Teokratikanhong Tunghaan sa Ministeryo, panid 33 hangtod sa 38, naghisgot sa “Kon Unsaon Paghimo ang Panukiduki” gamit ang mga publikasyon sa “matinumanon ug maalamong ulipon.” (Mat. 24:45) Gipatin-aw sa panid 36 kon unsaon paggamit ang Watch Tower Publications Index. Kini may listahan sa mga ulohan ug mga teksto. Busa kon may pangutana kita bahin sa usa ka pulong o teksto sa Bibliya, pwede nato kanang pangitaon diha sa Index, ug makakita kitag daghang reperensiya nga lagmit magtubag sa atong pangutana. Magmapailobon lang sa pagpangita sa tubag. Hinumdomi nga nangita kag “tinagong mga bahandi,” busa nagkinahanglan kinig panahon ug paningkamot.

Siyempre, may mga ulohan ug mga teksto nga wala hisgoti sa atong mga publikasyon. Usahay, nahisgotan na tingali kini apan wala kini magtubag sa imong pangutana. Dugang pa, mahimong duna kitay mga pangutana sa pipila ka asoy sa Bibliya kay wala kini maghatag sa tanang detalye. Busa dili nato dahomon nga makita dayon ang tubag sa matag pangutana. Kon kini ang kahimtang, dili kita managhap sa tubag, kay basig moresulta lang kinig panaglantugi sa “mga pangutana nga tukionon inay kay sa pagpang-apod-apod sa bisan unsang butang sa Diyos maylabot sa pagtuo.” (1 Tim. 1:4; 2 Tim. 2:23; Tito 3:9) Dili obligado ang sangang buhatan o ang hedkuwarter sa pag-analisar ug pagtubag sa tanang pangutana nga wala pa mahisgoti sa atong mga publikasyon. Apan makasalig kita nga ang Bibliya naghatag ug igong impormasyon sa paggiya kanato. Ug ang mga butang nga wala pa nato masabti maghatag kanatog kahigayonan sa pagpasundayag sa atong lig-ong pagtuo sa Diyos ug sa iyang Pulong.—Tan-awa ang panid 185-186 sa librong Pakigsuod Kang Jehova.

Komosta kon nakapanukiduki ka nag maayo bahin sa imong problema apan wala gihapon nimo makita ang giya o solusyon niini? Ayaw pagpanuko sa pagduol sa usa ka hamtong nga igsoon, tingali sa usa sa inyong mga ansiyano. Sila may igong kahibalo sa Bibliya ug kasinatian sa Kristohanong pagkinabuhi. Makatabang sila ilabina kon nanginahanglan kag tambag bahin sa usa ka problema o desisyon. Sila anaa ra sa duol ug sila nakaila nimo ug nahibalo sa imong kahimtang. Ug ayaw kalimot sa pag-ampo kang Jehova ug espesipikong isulti kaniya ang imong problema. Hangyoa siya sa paggiya kanimo pinaagi sa iyang balaang espiritu, ug siya maghatag kanimog ‘kaalam ug katakos sa pag-ila.’—Prov. 2:6; Luc. 11:13.