Sila Kinabubut-ong Nagtanyag sa Ilang Kaugalingon—Sa Ecuador

USA ka batan-ong brader sa Italy nga si Bruno ang kinahanglang mohimog importanteng desisyon. Bag-o lang siyang migraduwar sa hayskul ug siya ang kinatas-ag grado sa ilang klase. Gusto sa iyang mga paryente ug magtutudlo nga moeskuyla siya sa kolehiyo. Apan pipila ka tuig una pa niana, gidedikar ni Bruno ang iyang kaugalingon kang Jehova ug nanaad nga unahon ang pagbuhat sa kabubut-on sa Diyos. Unsay iyang desisyon? Siya miingon: “Nag-ampo ko kang Jehova nga akong tumanon ang akong panaad nga unahon siya. Pero miingon pod ko nga dili ko gustog laay nga kinabuhi. Gusto kong mapuliki sa lainlaing buluhaton sa pag-alagad kaniya.”

 Pipila ka tuig sa ulahi, si Bruno miadto sa Ecuador, South America. Siya miingon: “Gitubag ni Jehova ang akong pag-ampo, ug gani labaw pa sa akong gidahom.” Pag-abot niya sa Ecuador, wala siya magtuo nga daghang batan-on sab diay ang namalhin didto aron mas bug-os pang makaalagad kang Jehova.

MGA BATAN-ON NGA MIDAWAT SA PAGDAPIT NI JEHOVA

Sama sa libolibong batan-on sa tibuok kalibotan, gidawat ni Bruno ang pagdapit ni Jehova: “Sulayi ako, palihog, . . . kon dili ko ba buksan nganha kaninyo ang mga ganghaan sa tubig sa kalangitan ug magbubo nganha kaninyo sa panalangin.” (Mal. 3:10) Tungod sa ilang gugma sa Diyos, ilang ‘gisulayan si Jehova’ pinaagi sa paggamit sa ilang panahon, kusog, ug kahinguhaan aron makaalagad sa mga dapit nga may dakong panginahanglan sa mga magmamantala sa Gingharian.

Wala madugay human makaabot sa ilang bag-ong teritoryo, nakita nila nga “dako ang alanihon, apan diyutay ra ang mga mamumuo.” (Mat. 9:37) Pananglitan, si Jaqueline nga taga-Germany misulat sa Bethel sa Ecuador: “Kapig duha ka tuig pa lang kong nag-alagad sa Ecuador, ug duna na koy 13 ka Bible study, ug 4 kanila tigtambongan na sa mga tigom. Nalipay kaayo ko niini.” Si Chantal nga taga-Canada miingon: “Sa 2008, mibalhin ko  sa usa ka dapit sa kabaybayonan sa Ecuador diin usa ray kongregasyon. Karon tulo nay kongregasyon didto ug kapig 30 ang payunir. Makapalipay kaayong makita ang daghang bag-ohan nga miuswag sa kamatuoran!” Siya midugang: “Di pa dugay, mibalhin ko sa usa ka siyudad sa Andes Mountains nga may gihabogong 2,743 metros. Kini may kapig 75,000 ka molupyo apan usa ray kongregasyon. Mabungahon kaayo kini nga teritoryo! Lingaw kaayo ko sa akong ministeryo.”

MGA HAGIT NGA GIATUBANG

Siyempre dili sayon ang pag-alagad sa langyawng nasod. Gani pipila sa mga batan-on ang nakaatubang ug mga hagit una pa mibalhin. Si Kayla nga taga-United States miingon: “Makapaluya ang negatibong reaksiyon sa ubang igsoon. Wala sila makasabot kon nganong gusto kong magpayunir sa laing nasod. Usahay makahunahuna ko, ‘Husto kaha ning akong desisyon?’” Pero mibalhin gihapon si Kayla. Siya miingon: “Pinaagi sa kanunay nakong pag-ampo kang Jehova ug pagpakig-estorya sa hamtong nga mga igsoon, akong nakita nga panalanginan gyod ni Jehova kadtong andam moalagad kaniya.”

Daghan usab ang nalisdan sa pagtuon ug bag-ong pinulongan. Si Siobhan nga taga-Ireland nahinumdom: “Nalisdan ko kay dili ko makapahayag sa gusto nakong isulti. Kinahanglan kong magpailob, magkugig tuon sa bag-ong pinulongan, ug dili dayon maluya kon masayop.” Si Anna nga taga-Estonia miingon usab: “Ang kainit sa klima, kaabog sa dalan, ug kabugnaw sa tubig inig maligo balewala ra kon itandi sa pagtuon ug Kinatsila. Usahay gusto na kong moundang. Apan kinahanglang magpokus ko sa akong pag-uswag, dili sa akong mga sayop.”

Hagit usab nga mabulag sa pamilya. Si Jonathan nga taga-United States miadmitir: “Sa bag-o pa kong abot dinhi, naluya ko kay gimingaw ko pag-ayo sa akong pamilya ug mga higala. Apan nabuntog ko kana pinaagi sa pagpokus sa akong hunahuna sa personal nga pagtuon sa Bibliya ug sa ministeryo. Dayon, ang nindot nga mga kasinatian sa pagsangyaw ug ang bag-ong mga higala sa kongregasyon nakatabang nga mabalik ang akong kalipay.”

 Dili usab sayon ang pagpuyo sa laing lugar. Lagmit lahi kini sa imong naandan. Si Beau nga taga-Canada miingon: “Sa amoa naanad ko nga naay koryente ug tubig kanunay. Pero dinhi dili kini permanente.” Diha sa daghang nasod, lisod ang transportasyon ug daghan ang kabos ug dili makamaong mobasa ug mosulat. Si Ines nga taga-Austria nakalahutay sa maong mga kahimtang pinaagi sa pagpokus sa positibong mga hiyas sa mga tawo. “Maabiabihon, malumo, matinabangon, ug mapainubsanon kaayo sila,” matod niya. “Ug labaw sa tanan, interesado kaayo silang makakat-on bahin sa Diyos.”

‘GIPANALANGINAN HANGTOD NGA WALA NAY PANGINAHANGLAN’

Samtang nag-alagad sila sa Ecuador, gitagana gayod ni Jehova ang tanan nilang panginahanglan nga labaw pa gani sa ilang gidahom. (Efe. 3:20) Gani, mibati silang ‘gipanalanginan hangtod nga wala nay panginahanglan.’ (Mal. 3:10) Kini ang ilang gisulti bahin sa ilang ministeryo:

Bruno: “Ang una nakong teritoryo sa Ecuador mao ang nindot kaayong rehiyon sa Amazon. Sa ulahi, miboluntaryo ko sa konstruksiyon dihang gipadak-an ang sangang buhatan sa Ecuador, ug karon nag-alagad ko sa Bethel. Sa didto pa ko sa Italy, akong gipili nga unahon si Jehova, ug iya gyong gihatag ang akong gihangyo nga masulayan ang lainlaing buluhaton sa pag-alagad kaniya.”

Beau: “Mas nasuod ko kang Jehova tungod kay sa Ecuador akong magamit ang tanan nakong panahon sa espirituwal nga kalihokan. Nakaadto pa gyod ko sa nindot nga mga lugar nga dugay na nakong gustong adtoan.”

Anna: “Kay dalaga man, nagtuo ko nga dili nako kaya ang pagkinabuhi nga samag misyonaryo. Apan kaya ra man diay. Tungod sa panalangin ni Jehova, malipayon kaayo ko sa paghimog mga tinun-an, sa pagtukod ug mga Kingdom Hall, ug sa pagbatog bag-ong mga higala.”

Elke: “Sa amoa sa Austria, pirme kong mag-ampo kang Jehova nga makabatog bisag usa lang ka Bible study. Dinhi, 15 ang akong Bible study! Makapatagbaw kaayong makita sila nga malipayong nagtuon bahin kang Jehova.”

Joel: “Nindot kaayong kasinatian ang pag-alagad sa langyawng dapit. Makakat-on ka nga mas mosalig kang Jehova, ug malipay nga makita nga gipanalanginan niya ang imong mga paningkamot! Sa una nakong tuig dinhi gikan sa United States, ang 6 ka magmamantala sa grupo nga akong gialagaran miabot nag 21, ug 110 ang mitambong sa Memoryal.”

UNSAY IMONG PLANO?

Mga batan-on, motugot ba ang inyong kahimtang sa pag-alagad sa dapit nga may dakong panginahanglan sa mga magmamantala sa Gingharian? Siyempre, kinahanglan kang magplano pag-ayo sa dili ka pa modesisyon. Apan labaw sa tanan, kinahanglang duna kay dakong gugma kang Jehova ug sa mga tawo. Kon duna ka niini ug makahimo ka sa pagbalhin, iampo kini kang Jehova. Ipakigsulti usab sa imong mga ginikanan ug sa mga ansiyano sa inyong kongregasyon ang imong tinguha. Tingali makadesisyon ka nga makigbahin usab niining makaiikag ug makapatagbaw nga matang sa pag-alagad kang Jehova.

[Blurb sa panid 3]

“Pinaagi sa kanunay nakong pag-ampo kang Jehova ug pagpakig-estorya sa hamtong nga mga igsoon, akong nakita nga panalanginan gyod ni Jehova kadtong andam moalagad kaniya.”—Kayla, taga-United States

[Kahon/Hulagway sa panid 6]

Kon sa unsang paagi makapangandam ka sa pag-alagad sa laing nasod

• Himoang regular ang personal nga pagtuon

• Basaha ang Agosto 2011 nga Atong Ministeryo sa Gingharian, panid 4-6

• Pakigsulti sa uban nga nakaalagad sa laing nasod

• Sayra ang kultura ug kasaysayan sa nasod

• Tun-i ang pinulongan

[Kahon/Hulagway sa panid 6]

Para sa ilang pinansiyal nga panginahanglan, ang pipila . . .

• mouli sa ilang kaugalingong nasod aron motrabahog pipila ka bulan

• nagpaabang sa ilang balay o apartment

• dunay negosyo nga gipadumala sa uban

• nagtrabaho pinaagi sa Internet

[Mga hulagway sa panid 4, 5]

1 Jaqueline, taga-Germany

2 Bruno, taga-Italy

3 Beau, taga-Canada

4 Siobhan, taga-Ireland

5 Joel, taga-United States

6 Jonathan, taga-United States

7 Anna, taga-Estonia

8 Elke, taga-Austria

9 Chantal, taga-Canada

10 Ines, taga-Austria