Ang Diyos ba Usa ka Persona?
Ang Diyos ba Usa ka Persona?
Kasagarang tubag:
◼ “Siya anaa sa tanang dapit ug sa tanang butang. Siya sama sa hangin.”
◼ “Siya dili usa ka persona kondili usa ka intelihente ug gamhanan nga puwersa.”
Unsay tubag ni Jesus?
◼ “Sa balay sa akong Amahan adunay daghang puloy-anan.” (Juan 14:2) Si Jesus nag-ingon nga ang Diyos, sa simbolikong paagi, adunay balay o puy-anan.
◼ “Ako naggikan sa Amahan ug mianhi sa kalibotan. Dugang pa, ako mobiya sa kalibotan ug moadto sa Amahan.” (Juan 16:28) Si Jesus nahibalo nga ang Diyos usa gayod ka Persona nga nagpuyo sa usa ka dapit.
SI Jesus wala gayod mag-ingon nga ang Diyos usa lamang ka puwersa. Hinunoa, siya nakigsulti ug nag-ampo sa Diyos. Siya sagad motawag sa Diyos nga iyang langitnong Amahan, ug kini nagpaila nga siya suod kaayo sa Diyos.—Juan 8:19, 38, 54.
Tinuod nga “walay tawo nga nakakita sa Diyos sa bisan unsang panahon” ug “ang Diyos maoy Espiritu.” (Juan 1:18; 4:24) Apan kana wala magpasabot nga siya walay lawas. Ang Bibliya nag-ingon: “Kon adunay lawas nga pisikal, adunay espirituhanon usab.” (1 Corinto 15:44) Busa, aduna bay espirituhanong lawas ang Diyos?
Oo. Sa dihang gibanhaw si Jesus, siya “misulod . . . sa langit mismo, aron moatubang sa persona sa Diyos alang kanato.” (Hebreohanon 9:24) Kini nagtudlo kanatog duha ka hinungdanong butang bahin sa Diyos. Una, siya adunay puy-anan. Ikaduha, siya usa ka Persona, dili usa ka puwersa nga anaa sa tanang dapit.
Kon mao, nganong makontrolar man sa Diyos ang mga butang sa tanang dapit? Kay ang Diyos makahimo sa pagpadala sa iyang balaang espiritu bisan asa sa uniberso. Sama sa usa ka amahan nga nagtuy-od sa iyang kamot aron hupayon ug tabangan ang iyang mga anak, ang Diyos naggamit sa iyang balaang espiritu aron tumanon ang iyang katuyoan.—Salmo 104:30; 139:7.
Tungod kay ang Diyos usa ka Persona, siya usab adunay personalidad. Siya adunay gusto o dili gusto ug aduna usab siyay pagbati. Ang Bibliya nag-ingon nga siya nahigugma sa iyang katawhan, nalipay sa iyang mga buhat, nagdumot sa pagsimbag diyosdiyos, ug nasakitan sa pagkadaotan. (Genesis 6:6; Deuteronomio 16:22; 1 Hari 10:9; Salmo 104:31) Sa 1 Timoteo 1:11, siya gitawag nga “malipayong Diyos.” Busa, si Jesus miingon nga kita makahimo sa paghigugma sa Diyos sa tibuok natong kasingkasing!—Marcos 12:30. a
[Footnote]
a Alang sa dugang impormasyon bahin niini nga ulohan, tan-awa ang kapitulo 1 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.
[Blurb sa panid 5]
Sama sa usa ka amahan nga nagtuy-od sa iyang kamot, ang Diyos naggamit sa iyang balaang espiritu aron tumanon ang iyang katuyoan