Mga Magbabasa Nangutana . . .

Duna bay sinugdanan ang Diyos?

▪ Sumala sa Bibliya, ang Diyos walay sinugdanan. Siya kanunayng naglungtad. Lisod kanang tugkaron, apan wala kana magpasabot nga dili kana tinuod.

Masabtan ba gayod nato ang tanang butang bahin sa Diyos? Dili gayod. Si apostol Pablo miingon: “Oh pagkalawom sa bahandi ug sa kaalam ug sa kahibalo sa Diyos! Pagkadili-matukib sa iyang mga paghukom ug pagkadili-masubay sa iyang mga dalan!” (Roma 11:33) Dili nato matugkad ang kalawom sa kaalam ug kahibalo sa Diyos sama nga ang usa ka bata dili makatugkad sa hunahuna sa iyang ginikanan. Bisan tuod ang inspiradong mga pulong ni Pablo pangunang naghisgot sa pagkatalagsaon sa kaalam ug kaluoy sa Diyos, atong masabtan niana nga dunay mga butang bahin sa Diyos ug sa iyang mga buhat nga dili gayod nato matugkad. Usa niana mao ang ideya nga ang Diyos walay sinugdanan. Apan kita makasalig gayod sa giingon sa Bibliya bahin sa Diyos. Si Jesus miingon bahin sa sagradong mga sinulat: “Ang imong pulong maoy kamatuoran.”—Juan 17:17.

Si Moises miampo kang Jehova: “Gikan sa walay kataposan ngadto sa walay kataposan ikaw mao ang Diyos.” (Salmo 90:2, Ang Biblia—Bag-ong Hubad nga Binisaya) Dinhi, gihubit ni Moises nga walay kataposan ang paglungtad sa Diyos sa duha ka direksiyon. Ang usa maoy paabante. Si Jehova “buhi hangtod sa kahangtoran.” (Pinadayag 4:10) Busa ang paglungtad sa Diyos magpadayon hangtod sa walay kataposan. Ang laing direksiyon maoy paatras. Kini nagpasabot nga ang Diyos wala lalanga. Ang iyang paglungtad walay sinugdanan.

Adunay mga konsepto nga lisod tugkaron apan atong gidawat. Ang usa ka pananglitan mao ang numero. Kon imo kining iphon pataas o paubos, kini walay kinutbanan. Dili ba ingon usab niana kon bahin sa paglungtad sa atong Maglalalang?

Busa ang Diyos lamang ang gitawag ug “Hari nga walay kataposan.” (1 Timoteo 1:17) Hunahunaa kini: Si Jesu-Kristo, ang mga manulonda sa langit, ug ang mga tawo sa yuta adunay sinugdanan kay sila gilalang man. (Colosas 1:15, 16) Apan lahi ang Diyos. Kon iinsistir sa usa nga dunay naglalang sa Diyos, kini walay kapuslanan tungod kay magpatungha kanag laing pangutana nga dili gayod matubag sama sa: Kinsay naglalang sa Maglalalang? Si Jehova lamang ang naglungtad “gikan sa walay kataposan ngadto sa walay kataposan.” (Salmo 90:2, Ang Biblia—Bag-ong Hubad nga Binisaya) Sa laing pagkasulti, si Jehova naglungtad na “sa wala pa ang tanang kapanahonan.”—Judas 25, Ang Biblia—Bag-ong Hubad nga Binisaya.

Matikdi nga ang kamatuoran bahin sa paglungtad sa Diyos dakog kahulogan alang kanato. Kon atong susihon pag-ayo ang pag-ampo ni Moises, kini nagpadayag nga ang walay kataposang paglungtad sa Diyos naggarantiya sa iyang saad nga kita mabuhi sa walay kataposan. Ang kinabuhi karon sa tawo mubo kaayo, apan ang Diyos gihubit nga ‘usa ka tinuod nga puloy-anan alang kanato sulod sa sunodsunod nga mga kaliwatan.’ Isip usa ka mahigugmaong Amahan, si Jehova nagtabang sa iyang katawhan kaniadto, karon, ug sa walay kataposan. Hinaot nga madasig ka sa maong kamatuoran!—Salmo 90:1.