Iyang Ginatan-aw Kon Unsay Maayo Diha Kanato
Pakigsuod sa Diyos
Iyang Ginatan-aw Kon Unsay Maayo Diha Kanato
“ANG tanang kasingkasing ginasusi ni Jehova, ug ang matag kiling sa hunahuna iyang ginaila.” (1 Cronicas 28:9) Tabangan kita niining mga pulonga nga maapresyar ang lalom nga interes ni Jehova kanato. Bisan kita makasasala, iyang gitan-aw kon unsay maayo diha sa atong kasingkasing. Mao kanay atong makat-onan sa gisulti ni Jehova bahin kang Abias diha sa 1 Hari 14:13.
Si Abias nagpuyo diha sa usa ka daotang panimalay. Ang iyang amahan nga si Jeroboam mao ang hari sa usa ka gingharian nga mitalikod sa matuod nga Diyos. a Si Jehova mihukom nga laglagon ang panimalay ni Jeroboam, sama “sa usa nga magahinlo sa kinalibang.” (1 Hari 14:10) Apan Siya nagsugo nga usa lang ka sakop sa panimalay ni Jeroboam ang hatagag desenteng lubong—si Abias, kinsa may grabeng sakit. b Ngano? Ang Diyos may ‘nakaplagan nga maayo diha kaniya.’ (1 Hari 14:1, 12, 13) Unsay gipakita niini bahin kang Abias?
Ang Bibliya wala mag-ingon nga si Abias usa ka matinumanong alagad sa Diyos. Bisan pa niana, dihay maayo nga nakita kaniya. Lagmit may kalabotan kini sa pagsimba kang Jehova. Sumala sa Hudiyong mga magtutudlo, si Abias lagmit miadto sa Jerusalem aron mosimba diha sa templo o kaha iyang gipapahawa ang mga guwardiya sa iyang amahan nga nagbabag sa mga Israelitas sa pag-adto sa Jerusalem.
Kon unsa man ugaling ang maayo nga gibuhat ni Abias, kana dalayegon gayod. Una sa tanan, kini tiunay. Ang maong pagkamaayo nakita “diha kaniya”—buot ingnon, diha sa iyang kasingkasing. Ikaduha, kini talagsaon. Nahuptan ni Abias ang maong kaayo bisan siya anaa “sa balay ni Jeroboam.” Usa ka eskolar miingon: “Dalayegon gayod nga mahuptan sa usa ka tawo ang iyang kaayo taliwala sa daotang palibot ug pamilya.” Ang laing eskolar nag-ingon nga ang kaayo ni Abias “nadayag gayod . . . , sama nga ang mga bituon klaro kaayo kon ngitngit ang kalangitan, ug sama nga ang kahoyng sedro mas nindot tan-awon kon ang mga kahoy sa palibot niini wala nay dahon.”
Labaw sa tanan, ang 1 Hari 14:13 nagtudlo kanato bahin sa personalidad ni Jehova ug kon unsay iyang ginatan-aw diha kanato. Matikdi nga Siya may “nakaplagan” nga maayo diha kang Abias. Nagpakita kana nga gisusi pag-ayo ni Jehova ang kasingkasing ni Abias hangtod nga may nakita siyang maayo diha kaniya. Sumala sa usa ka eskolar, kon itandi si Abias sa iyang pamilya, siya samag usa ka perlas “diha sa kabatoan.” Gipabilhan ug gigantihan ni Jehova ang pagkamaayo ni Abias, kay siya gipakitaag kaluoy.
Dili ba makapadasig ang pagkasayod nga si Jehova nagtan-aw kon unsay maayo diha kanato ug nag-apresyar niini bisan pa sa atong pagkadili-hingpit? (Salmo 130:3) Kini angayng magpalihok kanato nga makigsuod pa gayod kang Jehova, ang Diyos nga nagasusi sa atong kasingkasing ug nangita sa bisan unsa ka gamayng kaayo nga anaa kanato.
[Mga footnote]
a Gipasiugda ni Jeroboam diha sa napulo ka tribong gingharian sa amihanang Israel ang pagsimba sa nating baka aron ang mga tawo dili na moadto sa templo sa Jerusalem sa pagsimba kang Jehova.
b Sa kapanahonan sa Bibliya, kon ang usa ka tawo dili hatagan ug desenteng lubong, kana nagpakita nga ang Diyos walay pag-uyon kaniya.—Jeremias 25:32, 33.