Nakaila Ka ba sa Ngalan sa Diyos?

Dako gayong kadungganan kon ingnan ka sa tawong taas ug posisyon nga gusto niyang tawgon nimo siya sa iyang ngalan. Ang mga kadagkoan sagad tawgon sa mga titulo sama sa “Mahal nga Presidente” o “Your Honor.” Busa kon sultihan ka sa maong mga tawo nga, “Tawga lang ko sa akong ngalan,” isipon gayod nimo kana nga usa ka pribilehiyo.

ANG matuod nga Diyos nag-ingon diha sa Bibliya: “Ako mao si Jehova. Kana ang akong ngalan.” (Isaias 42:8) Bisan tuod daghan siyag titulo, sama sa “Maglalalang,” “Labing Gamhanan,” ug “Soberanong Ginoo,” iyang gihatagag pribilehiyo ang iyang maunongong mga alagad nga tawgon siya sa iyang ngalan.

Pananglitan, ang propetang si Moises miingon sa Diyos: “Pasayloa ako, Jehova.” (Exodo 4:10) Sa dihang gipahinungod ang templo sa Jerusalem, gisugdan ni Haring Solomon ang iyang pag-ampo pinaagi sa pag-ingon: “Oh Jehova.” (1 Hari 8:22, 23) Ug sa dihang si propetang Isaias miampo sa Diyos alang sa mga Israelitas, siya miingon: “Ikaw, Oh Jehova, ang among Amahan.” (Isaias 63:16) Dayag nga gusto sa atong langitnong Amahan nga tawgon siya sa iyang ngalan.

Ang pagtawag sa ngalan sa Diyos hinungdanon, apan ang pagkaila kaniya naglangkit ug labaw pa. Bahin sa mga tawong nahigugma ug nagsalig kang Jehova, siya misaad: “Panalipdan ko siya tungod kay nakaila siya sa akong ngalan.” (Salmo 91:14) Dayag nga dako ang nalangkit sa pagkaila sa ngalan sa Diyos sanglit hinungdanon kini aron kita iyang panalipdan. Nan, unsay kinahanglan nimong buhaton aron ikaw makaila kang Jehova?