NABALITAAN ni Jesus nga ang iyang suod nga higalang si Lazaro grabeng nasakit. Ang mensahero nga gisugo sa mga igsoon ni Lazaro nga si Maria ug Marta maoy nagpahibalo niana kaniya. Ang mensahero naggikan pa sa Betania, diin nagpuyo si Lazaro ug ang iyang mga igsoon. Si Maria ug Marta kombinsido nga si Jesus makahimo sa pag-ayo sa ilang igsoon bisan pag siya atua sa layo, sa tabok sa Suba sa Jordan. Nahibalo sila nga kaniadto si Jesus nakaayog mga tawong masakiton bisag siya atua sa layo.—Mateo 8:5-13; Juan 11:1-3.

Apan, sa dihang ang mensahero miabot ug misulti kang Jesus sa makaguol nga balita, si Jesus wala ray gihimo. Ang Bibliya miingon: “Nagpabilin pa siya ug duha ka adlaw sa dapit diin didto siya.” (Juan 11:6) Nahibalo ka ba kon nganong wala magdali si Jesus sa pagtabang kang Lazaro?— a Atong tan-awon.

Si Jesus nahibalo nga namatay na si Lazaro tungod sa iyang sakit. Busa, iyang gisultihan ang mga apostoles: “Mangadto na usab kita sa Judea.” Sila mitubag: “Dili pa lang dugay ang mga Judeanhon nagtinguha sa pagbato kanimo, ug moadto ka na usab didto?” Si Jesus miingon: “Si Lazaro nga atong higala nagpahulay, apan moadto ako didto aron pukawon siya gikan sa pagkatulog.”

“Ginoo, kon nagpahulay siya, mamaayo ra siya,” mitubag ang mga apostoles. Si Jesus mipatin-aw: “Namatay si Lazaro.” Dayon diha siyay giingon nga lagmit nakapakurat kanila: “Ako nagmaya tungod kaninyo nga wala ako didto . . . Apan mangadto kita kaniya.”

Si Tomas way kokahadlok nga miingon: ‘Mangadto usab kita, aron mamatay kita uban kang Jesus.’ Siya nahibalo nga ang mga kaaway mosulay na usab sa pagpatay kang Jesus, ug basig patyon usab ang mga apostoles. Apan sila nangadto gihapon. Human sa mga duha ka adlaw, sila miabot sa Betania, ang lungsod ni Lazaro. Kini mga tulo ka kilometro gikan sa Jerusalem.—Juan 11:7-18.

Nahibalo ka ba kon nganong mapasalamaton si Jesus nga wala dayon siya moadto?— Buweno, si Jesus nakabanhaw nag mga patay, apan kadtong mga tawhana pipila ka oras pa lang nga namatay sa dihang sila gibanhaw. (Lucas 7:11-17, 22; 8:49-56) Apan si Lazaro pipila na ka adlaw diha sa lubnganan. Busa ang tanan kombinsido nga patay na gyod siya!

Sa dihang nasayran sa igsoon ni Lazaro nga si Marta nga duol na si Jesus sa Betania, siya midagan sa pagtagbo kaniya: “Ginoo, kon dinhi ka pa ang akong igsoon dili unta mamatay,” siya miingon. Siya gipasaligan ni Jesus: “Mobangon ang imong igsoon.” Si Marta midagan pauli ug sekretong  miingon sa iyang igsoong si Maria: “Ania ang Magtutudlo ug gipatawag ka niya.”

Si Maria midalidali sa pag-adto kang Jesus. Apan ang mga tawo nagtuo nga moadto siya sa lubnganan busa sila misunod kaniya. Sa pagkakita ni Jesus kang Maria ug sa mga tawo nga naghilak, siya usab “mihilak.” Wala madugay silang tanan nakaabot sa lubnganan, nga gitak-opan ug dakong bato. Si Jesus nagsugo: “Kuhaa ninyo ang bato.” Apan si Marta miingon: “Ginoo, baho na siya sa pagkakaron, kay ikaupat na man ka adlaw.”

Ang mga tawo mituman sa giingon ni Jesus ug ilang gikuha ang bato. Dayon siya nag-ampo, nga nagpasalamat sa gahom nga ihatag sa Diyos kaniya sa pagbanhaw kang Lazaro. Unya “siya misinggit sa makusog nga tingog: ‘Lazaro, gula ngari!’” Ug si Lazaro migula nga naputos ug panapton. Busa miingon si Jesus: “Badbari siya ug palakta siya.”—Juan 11:19-44.

Imo na bang nasabtan kon nganong wala magdali si Jesus?— Nahibalo siya nga pinaagi niini makahatag siyag mas dakong pamatuod bahin sa iyang Amahan, si Jehova. Tungod kay naghulat siya ug maayong kahigayonan, daghan ang nagpakitag pagtuo sa Diyos. (Juan 11:45) Unsay imong nakat-onan sa panig-ingnan ni Jesus?—

Mahimo usab kang mangitag maayong kahigayonan aron masulti sa uban ang maayong mga butang nga nahimo ug pagahimoon sa Diyos. Tingali imong iestorya kana sa imong mga klasmet ug magtutudlo. Bisan panahon sa klase, ang ubang batan-on nagpahimulos sa kahigayonan nga isulti ang kahibulongang mga panalangin nga itagana sa Gingharian sa Diyos ngadto sa katawhan. Tinuod, dili ka makabanhaw ug patay, apan mahimo nimong tabangan ang uban nga makaila sa Diyos, kinsa makabanhaw sa atong mga minahal.