Nahibalo Ka Ba?

Duna bay paryente si Jesus sa iyang 12 ka apostoles?

▪ Ang Kasulatan wala maghatag ug tinong tubag. Apan sumala sa mga ebidensiya ug sa gituohan sa mga Hudiyo, ang pipila sa 12 ka apostoles lagmit paryente ni Jesus.

Ang mga magsusulat sa Ebanghelyo naghisgot sa ngalan sa mga babaye nga presente samtang si Jesus himalatyon diha sa estaka. Ang upat kanila gihisgotan diha sa Juan 19:25: “Ang iyang inahan [si Maria] ug ang igsoong babaye sa iyang inahan; si Maria nga asawa ni Clopas, ug si Maria Magdalena.” Kon itandi kini nga teksto sa asoy ni Mateo ug Marcos sa maong panghitabo, kita makahinapos nga ang igsoon sa inahan ni Jesus mao si Salome. Lagmit si Salome ang inahan sa mga anak ni Zebedeo. (Mateo 27:55, 56; Marcos 15:40) Sa ingon, ang duha ka anak ni Salome nga si Santiago ug Juan maoy mga ig-agaw ni Jesus. Silang duha, kinsa mga mangingisda, gidapit ni Jesus nga mahimong iyang mga tinun-an.—Mateo 4:21, 22.

Ang ubang sekular reperensiya nag-ingon nga si Clopas, o Alfeo, nga bana sa usa sa mga babayeng gihisgotan sa Juan 19:25, maoy igsoon ni Jose nga ama-ama ni Jesus. Kon tinuod kini, nan si Santiago nga anak ni Alfeo, nga usa sa 12 ka apostoles, ig-agaw usab ni Jesus.—Mateo 10:3.

Ig-unsa ni Jesus si Juan Bawtista?

▪ Daghan ang nagtuo nga silang duha ig-agaw nga tagurha. Kana nga pagtuo gibase sa dili-tukma nga paghubad sa Lucas 1:36. Pananglitan, ang King James Version nag-ingon nga mag-agaw ang inahan ni Juan nga si Elisabet ug ang inahan ni Jesus nga si Maria.

Apan sa pagkatinuod, ang orihinal nga Gregong pulong niini nga teksto nagkahulogan ug paryente, dili ig-agaw. Ang The Interpreter’s Dictionary of the Bible nag-ingon: “Ang terminong gigamit dili espesipiko mao nga dili matino kon ig-unsa gayod sila.” Kon mao, diin gikan ang ideya nga si Jesus ug Juan mag-agaw? Ang Catholic Encyclopedia nag-ingon: “Ang tanan namong nahibaloan bahin . . . sa ginikanan ni Maria . . . naggikan sa apokripal nga mga basahon.”

Busa dili tino kon sila ba ig-agaw nga tagurha, apan kita makaingon nga si Jesus ug Juan paryente.