Mga Magbabasa Nangutana . . .

Nganong Migamit si Satanas ug Halas sa Pagpakigsulti Kang Eva?

▪ Tingali mouyon ka nga sumala sa nahisgotan sa panid 8, si Satanas mao ang nagpaluyo sa halas nga nakigsulti kang Eva. Tin-awng gitudlo kini sa Bibliya. Apan, tingali ikaw mangutana, ‘Nganong gimaniobra sa gamhanang espiritu ang usa ka halas sama sa usa ka ekspertong mogamit ug kikokiko?’

Gihubit sa Bibliya ang mga taktika ni Satanas ingong “mga malipatlipatong kaugdahan,” ug kini nga panghitabo magpamatuod niini. (Efeso 6:11) Nakita nato nga ang asoy sa Eden dili usa ka sugilambong bahin sa hayop nga mosulti. Usa kini ka pananglitan sa malimbongong taktika aron ipahilayo ang mga tawo gikan sa Diyos. Sa unsang paagi?

Gipili pag-ayo ni Satanas ang iyang biktimahonon. Si Eva mao ang labing batan-on nga intelihenteng linalang sa uniberso. Aron pahimuslan ang iyang pagkawalay kasinatian, naglaraw siya sa paglingla kaniya. Sa pagtago sa likod sa halas, nga mabinantayon kaayo nga linalang, gililong ni Satanas ang iyang mapangahason ug ambisyosong mga laraw. (Genesis 3:1) Tagda usab kon unsay iyang nalampos sa pagpasulti kunohay sa halas.

Una, nakuha ni Satanas ang atensiyon ni Eva. Si Eva nahibalo nga ang halas dili makasulti, kay ang iyang bana mao man ang nagngalan sa tanang hayop, lakip ang halas, lagmit human sa makuti nga pagtuon. (Genesis 2:19) Walay duhaduhang naobserbahan usab ni Eva kini nga linalang. Busa ang taktika ni Satanas nakadani kang Eva, ug tungod niini nasentro ang iyang pagtagad sa bugtong butang nga gidili taliwala sa tanaman. Ikaduha, kon ang halas nagtago diha sa mga sanga sa gidiling kahoy, unsa kahay mahunahunaan ni Eva? Dili ba kaha siya makaingon nga kining ordinaryong halas nga dili makasulti mikaon mismo sa bunga, mao nga kini makasulti na? Kon ang bunga nakabenepisyo gayod sa halas, unsay benepisyong ikahatag niini kaniya? Wala kita masayod kon unsa gayoy gihunahuna ni Eva o kon ang halas mikaon ba sa maong bunga, apan kita nahibalo nga sa dihang giingnan si Eva nga siya “mahisama sa Diyos” kon siya mokaon sa bunga, siya mituo sa bakak.

Epektibo usab kaayo ang gigamit nga mga pulong ni Satanas. Iyang gipahinabong magduhaduha si Eva, ug gipahunahuna kaniya nga ang Diyos naghikaw ug butang nga maayo alang kaniya ug nagpig-ot sa iyang kagawasan. Ang kalamposan sa laraw ni Satanas nagdepende kon palabihon ni Eva ang iyang kahakog kay sa iyang gugma sa Diyos nga naghatag kaniya sa tanang butang. (Genesis 3:4, 5) Ikasubo, ang estratehiya ni Satanas misaler, kay wala maugmad ni Adan ug Eva ang gugma ug pagpabili nga angay kang Jehova. Dili ba mao man usab kanang matanga sa kahakog nga gipasiugda ni Satanas karon?

Komosta ang motibo ni Satanas? Unsay iyang giapas? Sa Eden, siya naningkamot nga itago ang iyang kaugalingon ug ang iyang motibo. Apan sa ulahi siya nagpaila na. Sa iyang gitental si Jesus, siya nasayod nga way silbi ang iyang pagtakoban. Busa, siya direktang nag-awhag kang Jesus: ‘Hapa ug himoa ang usa ka buhat sa pagsimba kanako.’ (Mateo 4:9) Dayag, si Satanas dugay nang nasina sa pagsimba nga iya lamang kang Jehova nga Diyos. Buhaton niya kutob sa mahimo aron ipahisalaag ang uban sa pagsimba. Determinado siya sa pagbungkag sa atong integridad sa Diyos.

Oo, gibutyag sa Bibliya nga si Satanas maoy makuyaw nga kaaway nga eksperto sa pag-atake kanato. Apan, dili kita angayng malimbongan sama kang Eva, “kay kita nasayod na man sa iyang mga laraw.”—2 Corinto 2:11, Ang Biblia, Philippine Bible Society.