Tinuod Bang Nahingawa ang Diyos Kanimo?

GIBATI mo bang may nagmahal kanimo? O usahay imong bation nga walay nagtagad nimo? Niining puliki, dili matinagdanong kalibotan, daw dali ra tang makaingon nga kita walay bili. Ingong katumanan sa tagna sa Bibliya, daghan karon ang nalinga pag-ayo sa ilang kaugalingon nga tungod niana komon na ang kawalay pagtagad sa uban.—2 Timoteo 3:1, 2.

Bisag unsay edad, kultura, pinulongan, o rasa, ang tanang tawo may kinaiyanhong tinguha nga mahigugma ug higugmaon sa uban. Sumala sa pipila ka pagtuon, ang atong nervous system gidisenyo aron mobatig gugma ug pagmahal. Si Jehova nga Diyos, ang naglalang kanato, mas labawng nasayod sa atong panginahanglan nga higugmaon ug pabilhan. Unsay imong bation kon siya mopasalig kanimo nga ikaw bililhon kaniya? Wala nay molabaw niini nga dungog. Makatino ba gayod kita nga si Jehova may pagtagad sa dili hingpit nga mga tawo? Siya ba nahingawa sa matag usa kanato? Kon mao, sa unsang paagi kita mahimong tilinguhaon kaniya?

Si Jehova Tinuod nga Nahingawa

Mga 3,000 ka tuig kanhi, ang mahinadlokon sa Diyos nga salmista nahingangha gayod sa pagsud-ong sa halangdong kabituonan sa kagabhion. Walay duhaduhang gipalandong niya ang dili matukib nga kahalangdon sa Usa nga naglalang sa daghan kaayong kabituonan. Sa pagpamalandong sa pagkagamhanan ni Jehova ug sa pagkagamay sa tawo, nakadayeg ang salmista sa kahingawa ni Jehova: “Sa dihang makakita ako sa imong mga langit, ang mga buhat sa imong mga tudlo, sa bulan ug sa mga bituon nga imong giandam, unsa ba ang may-kamatayong tawo nga ikaw nagahunahuna man kaniya, ug ang anak sa yutan-ong tawo nga ikaw nagaatiman man kaniya?” (Salmo 8:3, 4) Tingali ang usa makaingon nga ang Diyos halayo kaayo o wala magtagad sa dili-hingpit nga mga tawo. Apan, ang salmista nasayod nga bisan pa sa kagamay ug kamubog kinabuhi sa tawo, kini bililhon gayod sa Diyos.

Ang laing salmista nagpahayag niini nga pasalig: “Si Jehova nagakalipay niadtong nahadlok kaniya, niadtong nagahulat sa iyang mahigugmaong-kalulot.” (Salmo 147:11) Makatandog gayod ang diwa niining duha ka salmo. Si Jehova, bisan sa iyang kahalangdon,  dili kay nahibalo lamang sa mga tawo. Hinunoa, siya ‘nag-atiman kanila’ ug ‘nalipay kanila.’

Kini dugang gipasiugda sa usa ka tagna sa Bibliya nga naghubit sa mga panghitabo sa atong panahon. Pinaagi sa manalagnang si Haggeo, gipakita ni Jehova nga igasangyaw ang maayong balita sa Gingharian sa Diyos sa tibuok kalibotan. Unsa ang resulta? Matikdi ang usa niini: “Ang tilinguhaong mga butang sa tanang kanasoran manulod; ug pun-on ko kining balaya sa himaya.”—Haggeo 2:7.

Unsa kining “tilinguhaong mga butang” nga gitigom gikan sa tanang kanasoran? Dili gayod kini materyal nga mga bahandi. (Haggeo 2:8) Dili plata ug bulawan ang tinuod nga makapalipay sa kasingkasing ni Jehova. Siya malipay sa mga tawo nga, bisan tuod dili mga hingpit, mosimba kaniya tungod sa gugma. (Proverbio 27:11) Sila mao “ang tilinguhaong mga butang” nga naghimaya kaniya, ug siya nagpabili sa ilang bug-os ug masiboton nga pag-alagad. Ikaw ba usa kanila?

Daw dili katuohan nga ang dili hingpit nga mga tawo mahimong tilinguhaon sa Dakong Maglalalang sa uniberso. Sa pagkatinuod, kini makadasig gayod kanato sa pagdawat sa mainitong pagdapit nga makigsuod kaniya.—Isaias 55:6; Santiago 4:8.

“Ikaw Tilinguhaon Kaayo”

Usa ka gabii niana, may kahibulongang panghitabo nga nasinatian sa tigulang nang si Daniel. Samtang siya nag-ampo, usa ka dungganong bisita ang kalit nga miabot. Ang iyang ngalan maoy Gabriel. Kaniadto nakita na kini ni Daniel ug siya nasayod nga kini manulonda ni Jehova. Gisulti ni Gabriel ang hinungdan sa iyang kalit nga pagpakita: “Oh Daniel, ako karon mianhi aron makabaton ka ug hait nga salabotan . . . tungod kay ikaw tilinguhaon kaayo.”—Daniel 9:21-23.

Sa laing higayon, usa sa mga manulonda ni Jehova nagtawag kang Daniel, nga nag-ingon: “Oh Daniel, ikaw nga tawong tilinguhaon kaayo.” Dayon, aron palig-onon si Daniel, kini miingon: “Ayaw kahadlok, Oh tawo nga tilinguhaon kaayo. Hinaot nga ikaw may kalinaw.” (Daniel 10:11, 19) Busa, tulo ka higayon nga si Daniel gihubit ingong “tilinguhaon kaayo.” Kini nga ekspresyon mahimong magkahulogan usab nga “hinigugma kaayo,” “tinamod kaayo,” ug “usa nga pinalabi.”

Dayag nga si Daniel mibati na nga suod sa iyang Diyos, ug iya gayong nakita nga giuyonan ni Jehova ang iyang tim-os nga pag-alagad. Apan ang gipahayag sa mga manulonda bahin sa dakong pagmahal sa Diyos kaniya nakadasig gayod kaniya. Busa mitubag si Daniel: “Gilig-on mo ako.”—Daniel 10:19.

Ang makapadasig nga asoy sa pagmahal ni Jehova sa iyang  matinumanong manalagna girekord sa Bibliya alang sa atong kaayohan. (Roma 15:4) Kon atong palandongon ang panig-ingnan ni Daniel, kita mahibalo kon sa unsang paagi kita mahimong tilinguhaon sa atong mahigugmaong langitnong Amahan.

Tun-i Kanunay ang Pulong sa Diyos

Si Daniel makugihong nagtuon sa Kasulatan. Kita nasayod niini kay siya mismo misulat: “Ako . . .pinaagi sa mga basahon nakasabot sa gidaghanon sa mga tuig . . . aron sa pagtuman sa pagpayhag sa Jerusalem.” (Daniel 9:2) Lakip sa mga basahon nga iyang mabasa nianang panahona tingali mao ang inspiradong mga sinulat ni Moises, David, Solomon, Isaias, Jeremias, Ezequiel, ug sa uban pang mga manalagna. Atong mahanduraw nga gilibotan si Daniel ug daghang linukot nga mga basahon, ug makugihong nagbasa ug nagtandi sa mga tagna maylabot sa pagpasig-uli sa matuod nga pagsimba sa Jerusalem. Kay walay disturbo, lagmit didto sa iyang lawak-sa-atop, siya namalandong gayod sa kahulogan sa maong mga asoy. Ang iyang makugihong pagtuon nakapalig-on sa iyang pagtuo ug nakapasuod kaniya kang Jehova.

Ang pagtuon sa Pulong sa Diyos nakaumol sa personalidad ni Daniel ug nakaapektar sa iyang pagkinabuhi. Ang Kasulatanhong instruksiyon nga iyang nadawat sa bata pa siya nakatabang gayod kaniya nga bug-os sundon nianang panahona ang Balaod sa Diyos bahin sa pagkaon. (Daniel 1:8) Sa ulahi, siya maisogong nagpahayag sa mensahe sa Diyos ngadto sa mga magmamando sa Babilonya. (Proverbio 29:25; Daniel 4:19-25; 5:22-28) Nailhan siya sa iyang kakugi, pagkamatinud-anon, ug pagkakasaligan. (Daniel 6:4) Labaw sa tanan, inay mokompromiso aron luwason ang iyang kinabuhi, si Daniel bug-os misalig kang Jehova. (Proverbio 3:5, 6; Daniel 6:23) Walay duhaduhang siya “tilinguhaon kaayo” sa panan-aw sa Diyos!

Ang pagtuon sa Bibliya mas sayon alang kanato karon kay sa panahon ni Daniel. Ang dili kombenyenteng mga linukot giilisan ug kombenyenteng mga libro. Kita karon duna nay kompletong Bibliya, lakip ang rekord kon sa unsang paagi natuman ang uban sa mga tagna ni Daniel. Ug duna kitay daghang tabang ug galamiton sa pagtuon ug panukiduki sa Bibliya. * Gigamit mo ba kini? Duna ka bay regular nga eskedyul sa pagbasa sa Bibliya ug sa pagpamalandong? Nan ikaw makabenepisyo gayod sama kang Daniel. Molig-on ang imong pagtuo ug molalom ang imong relasyon kang Jehova. Ang Bibliya magagiya gayod sa imong kinabuhi ug maghatag kanimog pasalig sa iyang pagmahal.

Lahutay sa Pag-ampo

Mainampoon si Daniel. Haom ang iyang mga hangyo sa Diyos. Sa batan-on pa siya, nameligro ang iyang kinabuhi kon dili niya mahubad ang damgo ni Haring Nabucodonosor sa Babilonya. Sa walay pagpanuko, nangaliya si Daniel kang Jehova nga siya tabangan ug panalipdan. (Daniel 2:17, 18) Katuigan sa ulahi, ang matinumanong manalagna, nga miila sa iyang pagkadili-hingpit, nagsugid sa iyang sala ug sa sala sa iyang katawhan ug nangamuyo kang Jehova alang sa pasaylo. (Daniel 9:3-6, 20) Sa dihang wala masabti ni Daniel ang mga butang nga iyang nakita sa panan-awon, siya nangayog tabang sa Diyos. Kas-a, ang manulonda nga miduaw pag-usab kang Daniel aron hatagan siyag dugang pagsabot nagpasalig: “Ang imong mga pulong gidungog.”—Daniel 10:12.

Apan dili lang pangaliya sa Diyos ang gihimo sa matinumanong si Daniel. Ang Daniel 6:10 nag-ingon: “Sa makatulo sa usa ka adlaw siya . . . nag-ampo ug naghatag ug pagdayeg sa atubangan sa iyang Diyos, ingon sa iyang ginahimo.” Daghag katarongan si Daniel nga magpasalamat ug magdayeg kang Jehova. Ug iya kanang gibuhat kanunay. Oo, ang pag-ampo maoy hinungdanong bahin sa iyang pagsimba, gani wala siya mohunong niini bisag nameligro ang iyang kinabuhi. Tungod sa iyang pagkamatinumanon, siya gihigugma ni Jehova.

 Pagkatalagsaong pribilehiyo ang pag-ampo! Ayaw gayod tugoting molabay ang adlaw nga dili ka makaampo sa imong langitnong Amahan. Hinumdomi ang pagpasalamat ug pagdayeg sa tanan niyang kaayo. Ayaw pagpanuko sa pagpahungaw sa imong mga kabalaka. Palandonga kon giunsa pagtubag ang imong mga hangyo ug pangamuyo, ug pasalamati kini. Ayaw pagdalidali sa pag-ampo. Sa dihang kinasingkasing kitang moampo kang Jehova, bation natong siya nahigugma gayod kanato. Pagkamaayo gayod nga ‘molahutay sa pag-ampo’!—Roma 12:12.

Himayaa ang Ngalan ni Jehova

Dili motunhay ang panaghigalaay kon ang usa naghunahuna lamang sa kaugalingon. Ingon usab niana ang atong relasyon kang Jehova. Nasayod si Daniel niana. Dako gayod ang iyang tinguha nga mahimaya ang ngalan ni Jehova.

Sa dihang gitubag sa Diyos ang iyang pag-ampo pinaagi sa pagbutyag kaniya sa damgo ni Nabucodonosor ug sa hubad niini, si Daniel miingon: “Dalayegon ang ngalan sa Diyos sukad sa panahong walay tino bisan hangtod sa panahong walay tino, tungod sa kaalam ug pagkagamhanan—kay kini iya man.” Sa ulahi, sa gibutyag kang Nabucodonosor ang damgo ug ang kahulogan niini, si Daniel kadaghan magpasidungog kang Jehova, nga nagpasiugdang Siya lamang ang “Tigpadayag sa mga tinago.” Sa dihang nangamuyo alang sa pasaylo ug kaluwasan, si Daniel usab miampo: “Oh akong Diyos, . . . ang imong siyudad ug ang imong katawhan ginatawag sa imong ngalan.”—Daniel 2:20, 28; 9:19.

Daghan kitag kahigayonan nga masundog si Daniel. Kon kita moampo, ikapahayag nato ang atong tinguha nga ‘mabalaan ang ngalan’ sa Diyos. (Mateo 6:9, 10) Dili gayod nato buot mapakaulawan ang balaang ngalan ni Jehova tungod sa atong panggawi. Hinunoa, kanunay natong himayaon si Jehova pinaagi sa pagsangyaw sa uban bahin sa maayong balita sa iyang Gingharian.

Bisan tuod nga ang kalibotan sa atong palibot walay gugma ug kahingawa sa uban, kita madasig gayod sa pagkasayod nga si Jehova tinuod nga nahingawa sa tagsatagsa niya ka magsisimba. Ingon sa gipahayag sa salmista: “Si Jehova nagakalipay sa iyang katawhan. Siya nagapatahom sa mga maaghop uban sa kaluwasan.”—Salmo 149:4.

[Footnote]

[Blurb sa panid 21]

Gipahayag sa Diyos ang iyang pagmahal kang Daniel pinaagi sa pagpadala sa manulondang si Gabriel aron palig-onon siya

[Blurb sa panid 23]

Ang pagkamakugihon ni Daniel sa pagtuon ug pag-ampo naglunsay sa iyang personalidad ug nakapasuod kaniya sa Diyos