Pagkat-on Gikan sa Pulong sa Diyos

Unsay Katuyoan sa Diyos Alang sa Yuta?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Unsay katuyoan sa Diyos alang sa yuta?

Ang yuta maoy pinuy-anan sa tawo. Human lalanga ang mga manulonda aron magpuyo sa langit, ang Diyos naglalang sa tawo aron magpuyo sa yuta. (Job 38:4, 7) Busa, gibutang ni Jehova ang unang tawo sa matahom nga paraiso nga gitawag ug Eden ug gihatag kaniya ug sa iyang umaabot nga mga kaliwat ang paglaom nga mabuhing walay kataposan sa yuta.—Genesis 2:15-17; basaha ang Salmo 115:16.

Ang tanaman sa Eden nahimutang sa usa lamang ka bahin sa yuta. Ang unang magtiayon, si Adan ug Eva, kinahanglang manganak. Samtang modaghan ang tawhanong pamilya, ilang ugmaron ang yuta ug himoon kini nga usa ka paraiso. (Genesis 1:28) Ang yuta dili gayod malaglag.—Basaha ang Salmo 104:5.

2. Nganong ang yuta dili paraiso karon?

Si Adan ug Eva misupak sa Diyos, busa sila gipapahawa sa Eden. Ang paraiso nawala, ug walay tawo nga milampos sa pagpasig-uli niini. Ang Bibliya nag-ingon: “Ang yuta gikatugyan ngadto sa kamot sa daotan.”—Job 9:24; basaha ang Genesis 3:23, 24.

Apan wala kalimti ni Jehova ang iyang orihinal nga katuyoan sa tawo, ni siya mapakyas sa pagtuman niini. (Isaias 45:18) Iyang ipasig-uli sa tawhanong kaliwat kon unsay katuyoan niya alang niini.—Basaha ang Salmo 37:11.

3. Unsaon pagpasig-uli sa Diyos ang kalinaw sa yuta?

Aron ang katawhan magmalinawon, kinahanglang hanawon una sa Diyos ang mga tawong daotan. Sa Armagedon, ang mga manulonda sa Diyos maglaglag sa tanan nga mosupak Kaniya. Si Satanas bilanggoon sulod sa 1,000 ka tuig, apan ang mga tawo nga nahigugma sa Diyos maluwas aron mabuhi sa usa ka bag-ong sistema sa mga butang ibabaw sa yuta.—Basaha ang Pinadayag 16:14, 16; 20:1-3; 21:3, 4.

  4. Kanus-a matapos ang pag-antos?

Sulod sa 1,000 ka tuig, si Jesus nga atua sa langit magmando sa yuta ug magpasig-uli niini ingong paraiso. Siya usab magpala sa mga sala niadtong nahigugma sa Diyos. Busa, mahanaw na ang mga sakit, pagkatigulang, ug kamatayon.—Basaha ang Isaias 11:9; 25:8; 33:24; 35:1.

Kanus-a laglagon sa Diyos ang daotan sa yuta? Si Jesus naghatag ug “ilhanan” nga magpailang haduol na ang kataposan. Ang mga kahimtang sa kalibotan karon nagpameligro sa kinabuhi sa tawo ug nagpakita nga kita nagkinabuhi karon “sa kataposan sa sistema sa mga butang.”—Basaha ang Mateo 24:3, 7-14, 21, 22; 2 Timoteo 3:1-5.

5. Kinsa ang mopuyo sa umaabot nga Paraiso?

Gisugo ni Jesus ang iyang mga sumusunod sa paghimog mga tinun-an ug sa pagtudlo kanila sa paghigugma ingon sa gipakita sa Diyos. (Mateo 28:19, 20) Sa tibuok kalibotan, giandam ni Jehova ang minilyong mga tawo alang sa kinabuhi sa bag-ong sistema sa mga butang sa yuta. (Sofonias 2:3) Sa mga Kingdom Hall sa mga Saksi ni Jehova, ang mga tawo nakakat-on nga mahimong mas maayong mga bana ug amahan, ug mas maayong mga asawa ug inahan. Ang mga anak ug ginikanan managsamang nakakat-on sa pasukaranan sa pagtuo sa mas maayong kaugmaon.—Basaha ang Miqueas 4:1-4.

Sa Kingdom Hall, imong mahibalag ang mga tawo nga nahigugma sa Diyos ug gustong makapahimuot kaniya.—Basaha ang Hebreohanon 10:24, 25.

Alang sa dugang impormasyon, tan-awa ang kapitulo 3 niini nga basahon, Unsay Tinuod nga Gitudlo sa Bibliya?, nga gipatik sa mga Saksi ni Jehova.