Ang Diyos ba Adunay Organisasyon?

ANG kahusay madayag diha sa tanang kalalangan sa Diyos. Pananglitan, katingalahan kaayo ang pagkaorganisado sa usa ka “simpleng” selula sa yeast. Ang gidaghanon sa mga sangkap niini halos susama nianang sa Boeing 777 nga jetliner. Apan, ang tanang bahin niini nahimutang sa tinong dapit diin ang gidak-on may lima lamang ka micron * ang dayametro. Dili sama sa mga jetliner, ang mga selula sa yeast makapadaghan sa ilang kaugalingon. Pagkakatingalahan ug pagkaorganisado!—1 Corinto 14:33.

Ang pagkaorganisado dili lamang madayag diha sa pisikal nga kalalangan. Gipakita sa Bibliya nga ang espirituhanong mga linalang organisado usab kaayo, sumala sa katuyoan sa Maglalalang. Nakita ni manalagnang Daniel sa usa ka panan-awon ang dakong panon sa mga manulonda diha sa langitnong korte sa Diyos: “Dihay kaliboan ka libo nga nag-alagad kaniya, ug napulo ka libo ka napulo ka libo nga nagbarog diha sa iyang atubangan.” (Daniel 7:9, 10) Hunahunaa kon giunsa pag-organisar kining daghan kaayong manulonda—kapin sa usa ka gatos ka milyon—aron mamati ug mobuhat sa sugo sa Diyos alang sa iyang mga alagad dinhi sa yuta!—Salmo 91:11.

Bisan tuod ang Maglalalang, si Jehova nga Diyos, mao ang Kinatas-ang Organisador, siya dili kay dili-mabination o sobra ka estriktong tigpatuman sa balaod. Hinunoa, siya maoy usa ka mabination, malipayong Diyos nga nahingawa sa tanan niyang linalang. (1 Timoteo 1:11; 1 Pedro 5:7) Makita kini sa iyang pagpakiglabot sa karaang nasod sa Israel ug sa mga Kristohanon sa unang siglo.

Ang Karaang Israel—Organisado Kaayo nga Nasod

Gigamit ni Jehova nga Diyos si Moises sa pag-organisar sa mga Israelinhon alang sa matuod nga pagsimba. Palandonga lamang ang mga kahikayan sa ilang pagkampo sa dihang sila namuyo sa kamingawan sa Sinai. Magkagubot gyod tingali kon ang matag pamilya mao ray magbuot kon asa sila magtolda. Si Jehova naghatag kanilag espesipikong mga instruksiyon kon asa sila magkampo. (Numeros 2:1-34) Gilatid usab sa Balaod ni Moises ang espesipikong mga regulasyon bahin sa panglawas ug kahinlo—pananglitan, ang paghipos sa hugaw sa tawo.—Deuteronomio 23:12, 13.

Sa dihang ang mga Israelinhon misulod sa Yutang Saad, sila hilabihan ka organisadong nasod. Ang nasod gibahin sa 12 ka tribo, ug ang matag tribo gihatagag tinong pahat nga yuta. Ang Balaod nga gihatag ni Jehova sa nasod pinaagi ni Moises naglangkob sa matag bahin sa kinabuhi sa katawhan—pagsimba, kaminyoon, pamilya, edukasyon, negosyo, pagkaon, pag-uma, pag-atiman sa mga hayop, ug uban pa. * Bisan tuod espesipiko ug detalyado ang pipila ka balaod, gipakita niini nga si Jehova nag-atiman sa iyang katawhan ug nakaamot kini sa ilang kalipay. Sa pagsunod niini nga mga kahikayan, natagamtam sa mga Israelinhon ang talagsaong pag-uyon ni Jehova.—Salmo 147:19, 20.

Bisan tuod si Moises usa ka intelihenteng lider, ang kalamposan o kapakyasan wala magdepende sa iyang kabatid sa pagpanguna, kondili sa iyang pagkamaunongon sa organisasyon sa Diyos. Pananglitan, giunsa pagdesidir ni Moises kon unsang rutaha ang ilang subayon latas sa  kamingawan? Si Jehova naggiya pinaagi sa usa ka haliging panganod sa maadlaw ug usa ka haliging kalayo sa magabii. (Exodo 13:21, 22) Bisag gigamit ni Jehova ang mga tawo, Siya mismo ang nag-organisar ug naggiya sa iyang katawhan. Ingon usab niini sa unang siglo.

Ang Unang mga Kristohanon Organisado Kaayo

Tungod sa masibotong pagsangyaw sa mga apostoles ug mga tinun-an, natukod ang Kristohanong mga kongregasyon sa daghang dapit sa Asia ug Uropa sa unang siglo. Bisan nagkalagyo kini nga mga kongregasyon, sila dili bulag ug independenteng mga grupo. Hinunoa, sila organisado kaayo ug nakabenepisyo sa mahigugmaong pagdumala sa mga apostoles. Pananglitan, si Tito gisugo ni apostol Pablo ngadto sa Creta “aron maorganisar ang tanan didto.” (Tito 1:5, The Jerusalem Bible) Ug si Pablo misulat sa kongregasyon sa Corinto nga ang ubang mga igsoon adunay “mga katakos sa pag-organisar,” o “mga organisador.” (1 Corinto 12:28, The New Testament in Modern Speech; The Bible in Contemporary Language) Apan kinsay nag-organisar kanila? Miingon si Pablo nga “ang Diyos naglangkob,” o “nag-organisar,” sa kongregasyon.—1 Corinto 12:24; The Riverside New Testament.

Ang tinudlong mga magtatan-aw sa Kristohanong kongregasyon dili mga agalon sa ilang isigkamagtutuo. Hinunoa, sila “mga isigkamagbubuhat” nga misunod sa giya sa espiritu sa Diyos, ug sila gidahom nga mahimong “mga panig-ingnan alang sa panon.” (2 Corinto 1:24; 1 Pedro 5:2, 3) Ang “ulo sa kongregasyon” mao ang binanhawng si Jesu-Kristo, dili ang usa lang ka yanong tawo o grupo sa dili-hingpit nga mga tawo.”—Efeso 5:23.

Sa dihang ang kongregasyon sa Corinto milihok nga sukwahi kaayo sa paagi sa ubang mga kongregasyon, si Pablo misulat: “Unsa? Diha ba kaninyo naggikan ang pulong sa Diyos, o diha ba lamang kaninyo kini midangat?” (1 Corinto 14:36) Gigamit ni Pablo kini nga pangutana aron sa pagtul-id sa ilang hunahuna ug aron sila makasabot nga sila kinahanglang dili mag-independente. Ang mga kongregasyon miuswag ug milambo sa dihang ilang gisunod ang paggiya sa mga apostoles.—Buhat 16:4, 5.

Kapahayagan sa Gugma sa Diyos

Komosta karon? Magpanuko tingali ang uban nga makig-anib sa usa ka relihiyosong organisasyon. Apan gipakita sa Bibliya nga kanunayng gigamit sa Diyos ang iyang organisasyon sa pagpalampos sa iyang katuyoan. Iyang giorganisar ang iyang mga magsisimba sa karaang Israel, ug iya usab nga giorganisar ang unang mga Kristohanon sa ilang pagsimba.

Busa, dili ba makataronganong ikaingon nga si Jehova nga Diyos naggiya gihapon sa iyang katawhan karon sama kaniadto? Oo, ang pagkaorganisar o pagkahiusa sa iyang mga magsisimba maoy kapahayagan sa iyang mahigugmaong pag-atiman kanila. Karon, gigamit ni Jehova ang iyang organisasyon sa pagpalampos sa iyang katuyoan sa katawhan. Sa unsang paagi mailhan ang iyang organisasyon? Tagda kining mosunod nga mga sukdanan.

▪ Ang matuod nga mga Kristohanon giorganisar aron malampos ang usa ka buluhaton. (Mateo 24:14; 1 Timoteo 2:3, 4) Gisugo ni Jesus ang iyang mga sumusunod nga isangyaw ang maayong balita sa Gingharian ngadto sa tanang kanasoran, usa ka buluhatong dili mahimo kon walay internasyonal nga organisasyon. Sa pag-ilustrar, sayon rang pakan-on ang usa ka tawo bisag ikaw rang usa ang mohimo niini, apan kon ang imong pakan-on maoy linibo, o kaha minilyon, gikinahanglan nimo ang maayong pagkaorganisar nga grupo sa mga tawo. Sa pagtuman sa ilang buluhaton, ang matuod nga mga Kristohanon nag-alagad “abaga sa abaga,” o “nagtambayayongay sa pag-alagad [sa Diyos].” (Sofonias 3:9; Byington) Molampos ba kaha ang usa ka internasyonal nga buluhaton kon walay nahiusang organisasyon? Siyempre, dili gayod.

▪ Ang matuod nga mga Kristohanon giorganisar sa pagtabang ug pagdasig sa usag usa. Ang usa ka nag-inusarang tigkatkat sa bukid makabuot kon asa siya gustong moadto, ug dili na siya kinahanglang mag-atiman pa sa dili kaayo eksperyensiyadong mga kaubanan. Apan, kon siya maaksidente o magkaproblema, siya mameligro  gayod kay wala may makatabang kaniya. Dili gayod maayong mag-inusara. (Proverbio 18:1) Aron matuman sa mga Kristohanon ang sugo ni Jesus, sila kinahanglang magtinabangay sa usag usa. (Mateo 28:19, 20) Ang Kristohanong kongregasyon nagtaganag hinungdanon kaayong Biblikanhong instruksiyon, pagbansay, ug pagdasig aron ang tanan makalahutay. Asa man ang usa moadto aron siya mosimba ug matudloan sa mga paagi ni Jehova kon walay naorganisar nga Kristohanong mga tigom?—Hebreohanon 10:24, 25.

▪ Ang matuod nga mga Kristohanon nahiusang giorganisar sa pag-alagad sa Diyos. Ingong mga karnero ni Jesus nga nagpatalinghog sa iyang tingog, sila nahimong “usa ka panon” ubos sa iyang pagpanguna. (Juan 10:16) Sila wala magkabulagbulag taliwala sa independenteng mga simbahan ug grupo; ni nabahinbahin sila tungod sa mga doktrina. Hinunoa, silang tanan ‘nagasulti nga may panagkauyon.’ (1 Corinto 1:10) Aron magkahiusa, gikinahanglan ang kahikayan, ug ang kahikayan nagkinahanglag organisasyon. Kadtong nagkahiusa mao lamang ang panalanginan sa Diyos.—Salmo 133:1, 3.

Ang tiunayng gugma sa Diyos ug sa kamatuoran sa Bibliya nakadani sa minilyon aron makig-anib sa usa ka organisasyon nga nagpadapat niini ug sa uban pang mga sukdanan sa Bibliya. Ingong organisado ug nahiusang katawhan, ang mga Saksi ni Jehova sa tibuok kalibotan naningkamot sa pagbuhat sa kabubut-on sa Diyos. Sila gipasaligan niini nga saad: “Ako mopuyo sa ilang taliwala ug molakaw sa ilang taliwala, ug ako mahimong ilang Diyos, ug sila mahimong akong katawhan.” (2 Corinto 6:16) Maimo usab kini nga panalangin kon ikaw mosimba kang Jehova nga Diyos uban sa iyang organisasyon.

[Mga footnote]

[Hulagway sa panid 13]

Ang pagkampo sa mga Israelinhon organisado kaayo

[Mga hulagway sa panid 14, 15]

Aron molampos ang internasyonal nga buluhatong pagsangyaw gikinahanglan ang usa ka organisasyon

Pagpamalaybalay

Pagtabang panahon sa katalagman

Mga asembliya

Pagtukod ug mga tigomanan sa pagsimba