Mga Magbabasa Nangutana . . .

Ang Tanan Bang Matinumanong mga Kristohanon Moadto sa Langit?

▪ Daghan ang nakabasa sa makapadasig nga mga pulong ni Jesus: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Gipasabot ba ni Jesus nga ang tanang matinumanong magsisimba sa iyang Amahan, si Jehova nga Diyos, moadto sa langit aron mabuhing walay kataposan uban ang hingpit nga kalipay?

Matikdi ang makaiikag nga pahayag ni Jesus: “Walay tawo nga nakasaka sa langit gawas kaniya nga nanaog gikan sa langit, ang Anak sa tawo.” (Juan 3:13) Kini nagpasabot nga ang matinumanong mga magsisimba sa nangagi, sama kang Noe, Abraham, Moises, ug David, wala makaadto sa langit. (Buhat 2:34) Nan, diin man sila miadto? Sa laktod: Kini sila anaa sa lubnganan, natulog sa kamatayon, walay kalibotan, nga nagpaabot sa pagkabanhaw.—Ecclesiastes 9:5, 6; Buhat 24:15.

Ang unang paghisgot sa Bibliya bahin sa langitnong kinabuhi human sa kamatayon gipamulong usab ni Jesus. Giingnan niya ang iyang mga apostoles nga siya mag-andam ug dapit alang kanila didto sa langit. (Juan 14:2, 3) Bag-o kini alang sa katawhan sa Diyos. Sa ulahi gipatin-aw ni Pablo nga human mamatay si Jesus ug gibanhaw ngadto sa langit, iyang ‘gisugdan pagpatuman alang sa iyang mga tinun-an ang usa ka bag-o ug buhing dalan’—usa ka dalan nga wala pa sukad maagii ni bisan kinsang tawo.—Hebreohanon 10:19, 20.

Nagpasabot ba kini nga sukad niadto ang tanang matinumanon moadto sa langit? Dili, kay ang langitnong pagkabanhaw alang lamang sa pipila nga hatagag asaynment. Sa iyang kataposang gabii uban kanila, giingnan ni Jesus ang iyang mga apostoles nga sila “magalingkod sa mga trono aron sa paghukom” didto sa iyang langitnong Gingharian. Busa, ang ilang asaynment mao ang pagmando didto sa langit uban kang Jesus.—Lucas 22:28-30.

Gawas sa mga apostoles, ang uban hatagan usab niining talagsaong asaynment. Sa panan-awon, nakita ni Juan si Jesus uban sa pundok sa mga binanhaw didto sa langit nga gihubit ingong ‘usa ka gingharian ug mga saserdote nga magmando ibabaw sa yuta.’ (Pinadayag 3:21; 5:10) Pila sila? Sama sa matag kagamhanan, limitado lamang ang magmando. Mao usab sa langitnong Gingharian. Si Jesus, ang Kordero sa Diyos, magmando uban sa 144,000 ka kaubang mga magmamando “nga gipalit gikan sa katawhan.”—Pinadayag 14:1, 4, 5.

Oo, ang 144,000 gamay ra kon itandi sa gidaghanon sa tanang matinumanon, kaniadto ug karon. Apan natural lamang kini kay ang 144,000 banhawon ngadto sa langit tungod sa usa ka espesipikong sagradong buluhaton. Kon magtukod kag balay, tawgon ba diay nimo ang tanang batid nga magtutukod sa imong dapit? Dili. Kadto lamang gikinahanglan sa trabaho. Sa susama, dili tanang matinumanon ang gipili sa Diyos alang sa talagsaong pribilehiyo nga magmando uban ni Kristo sa langit.

Buhaton niining langitnong kagamhanan ang orihinal nga katuyoan sa Diyos alang sa tawo. Si Jesus ug ang iyang 144,000 ka kaubang mga magmamando magdumala sa paghimo sa tibuok yuta nga paraiso, diin daghan kaayong matinumanon ang malipayong mabuhi sa walay kataposan. (Isaias 45:18; Pinadayag 21:3, 4) Lakip niini kadtong anaa sa panumdoman sa Diyos nga pagabanhawon.—Juan 5:28, 29.

Ang tanang matinumanong magsisimba ni Jehova—kaniadto ug karon—makadawat sa kahibulongang gasa nga kinabuhing walay kataposan. (Roma 6:23) May pipila nga moadto sa langit alang sa usa ka espesyal nga asaynment, ug ang kadaghanan makadawat ug kinabuhing walay kataposan sa usa ka tibuok yutang paraiso.