Damgo nga Nahugno

Sumala sa giasoy ni Zoya Dimitrova

Niadtong 15 anyos ko, natuman ang akong damgo nga magpasundayag sa mga sirkos, ug nagbiyahe mi sa lainlaing mga dapit. Apan pagka-Septiyembre 4, 1970, nadisgrasya ko. Samtang ako nagsirko diha sa hangin, kalit lang ko nga nahagsa.

NATAWO ko sa Disyembre 16, 1952. Kami sa akong mga ginikanan ug magulang nga babaye nagpuyo sa Sofia, Bulgaria. Nianang panahona, Komunista ang Bulgaria diin wala dasiga ang mga tawo sa pagbatog relihiyon. Ang kadaghanan sa mga tawo wala motuo sa Diyos, ug kadtong mituo sa Diyos wala magpaila niini sa dayag. Bisan tuod ang akong pamilya nag-angkong Ortodokso, wala ko matutoa bahin sa Diyos.

Sa bata pa ko, nainteres ko kaayo sa tanang matang sa esports ilabina sa gymnastics. Niadtong 13 anyos ko, may tawong nangitag batang babaye sa among eskuylahan aron bansayon sa sirkos. Girekomendar ko sa akong maestro sa gymnastics. Nahinam kaayo ko nga gipasakay sa awto sa manedyer, awto pa gyod nga gikan sa Amerika, aron dad-on ngadto sa usa ka grupo sa mga magbabansay nga mointerbiyo ug mosulay kanako. Nalipay kaayo ko kay napili ko. Sukad niadto, estrikto ug grabe ang pagbansay nako sulod sa kapin sa duha ka tuig. Pagka-15 anyos nako, natapos ko ang pagbansay ug unya nagpasundayag na ko sa mga sirkos ug nagbiyahe mi sa lainlaing mga dapit. Sa primero, mibiyahe ko sa tibuok Bulgaria, ug dayon sa mga nasod sa kanhing Soviet Union ug gani sa Algeria, Hungary, ug sa kanhing Yugoslavia.

Sulod sa tulo ka malipayong tuig, natuman ang akong damgo. Unya, samtang nagpasundayag ko sa Titov Veles, Macedonia, nahitabo ang aksidente nga gihisgotan ko sa sinugdan. Samtang nagsirko ko diha sa hangin, ang akong paris, nga nagbitay nga pabalit-ad, mag-itsa ug magpatuyok kanako diha sa hangin ug dayon magsalo kanako kon magpaubos na ko. Wala ko makagunit sa iyang kamot, ug sa dihang nabugto ang pisi nga nagsuportar kanako, nahulog ko sa gihabogong 6 metros. Gidali ko pagdala sa ospital—nabalian kog bukton, pipila ka gusok, ug usa ka taludtod. Na-trauma ko sulod sa pipila ka adlaw ug wala koy kalibotan sa nahitabo. Sa dihang nakaamgo na ko, akong nasayran nga naparalisar ko gikan sa hawak hangtod sa tiil. Kay batan-on pa, ako positibo nga kon moagi kog terapiya o operasyon, makalakaw ra ko pag-usab ug basin makapasundayag ug balik sa sirkos.

Sa misunod nga duhag tunga ka tuig, gipatambalan ko sa lainlaing mga rehabilitasyon, kay naglaom nga maulian pa. Sa kataposan, kinahanglan dawaton nako ang kamatuoran  nga nahugno ang akong damgo ug nga kinahanglan na kong mag-wheelchair.

Ang Pagsugod sa Bag-ong Kinabuhi

Human sa akong pagsirkos, dili ko makatuong mag-wheelchair na ko. Kay nawad-ag paglaom, nasakit kog depresyon. Dayon, niadtong 1977, usa ka batan-ong lalaki nga ginganlag Stoyan ang nanuktok sa amoa. Sa pagkasayod nga igsoon diay siya sa kauban ko sa sirkos kanhi, dihadiha ako siyang gipadayon. Samtang nagsultihanay mi, nangutana siya kon may paglaom pa bang maulian ko. Kay nadismaya sa akong kinabuhi, giingnan ko siyang dili na ko maulian. Sa dihang iya kong giingnan nga ang Diyos ray makatabang nako, gitubag ko siya uban ang mga pagmahay, “Aw, kon duna pay Diyos, nganong nahitabo man ni nako?”

Dayon, si Stoyan, nga bag-o pang na-Saksi ni Jehova samtang nagtrabaho sa Amerika ingong sirkador, maluloton kaayong nagpatin-aw nako bahin sa katingalahang saad sa Bibliya sa umaabot. Nalipay ko nga sa dili madugay ang yuta diay mahimong paraiso. Natandog ko sa saad nga “ang kamatayon mawala na, ni may pagbangotan ni pagtiyabaw ni may kasakit pa.” (Pinadayag 21:4) Nangandoy gyod ko nga maulian ko! Misugot dayon kong regular nga magtuon sa Bibliya. Busa, nagsugod ang akong bag-ong kinabuhi. Nakaplagan ko ra gayod ang tinuod nga paglaom!

Mahinamon ko sa among pagtuon matag semana. Una, nagtuon ko uban kang Stoyan ug dayon uban kang Totka, nga buotan kaayo nga sister. Pinaagi sa iyang tabang, ang akong kahibalo sa Bibliya kusog nga miuswag, ug akong gipahinungod ang akong kinabuhi kang Jehova nga Diyos. Nianang panahona, walay usa sa Sofia ang kuwalipikado nga mobawtismo kanako, busa naghulat ko sa pagduaw sa brader nga gikan sa Macedonia. Sa Septiyembre 11, 1978, mga usa ka tuig gikan sa akong pagtuon sa Bibliya, gibawtismohan ko sa bathtub sa akong apartment. Ang akong bawtismo nakahatag kanakog dakong kalipay, ug duna nay tinuod nga kahulogan ang akong kinabuhi.

Ang akong nakat-onan sa Bibliya nagdilaab sa sulod nako. Maikagon kong gipaambit ang bag-o kong nakaplagan nga paglaom sa tanan nga moadto sa akong balay. Apan, morag walay usang maminaw pag-ayo nako, kay tingali sila nagtuong tungod sa akong pagkaaksidente dili na ko normal.

Usa ka Dakong Sayop

Gibando nianang panahona ang mga Saksi ni Jehova sa Bulgaria, ug diyutay ra ang mga Saksi sa tibuok nasod. Wala koy matambongan nga kongregasyon, ug wala kaayo koy mapakig-ubanan nga mga igsoon sa pagtuo. Tungod niini, ug tungod usab sa akong pagkadili-mabinantayon sa pagpakig-uban  niadtong wala magkinabuhi sa mga sukdanan sa Bibliya, ako nakahimog dakong sayop.

Kanunay kong gihasol sa akong tanlag, ug sakit kaayo ang akong gibati nga nahimulag kang Jehova nga Diyos. Kay nahugno ug naulaw, tim-os kong nag-ampo kang Jehova ug nangayo kaniyag pasaylo. Sa ulahi, pinaagi sa tabang sa mahigugmaong mga ansiyano, napasig-uli ko sa espirituwal, ug nahibalik kanako ang kalipay sa pag-alagad kang Jehova. Gipabilhan ko gayod ang pribilehiyo nga mag-alagad kang Jehova uban ang hinlong tanlag ug ang pagpakig-uban sa iyang hinlong organisasyon!

Malipayon Bisan sa mga Limitasyon

Ang pagkaaksidente nako 40 ka tuig kanhi nakahugno sa akong damgo ug nakahimo kanakong baldado. Apan, karon wala ko kini lantawa uban ang kaguol ug pagbasol, nga morag ang akong kinabuhi napakyas. Ang kamatuoran sa Bibliya nakapaamgo kanako nga ang akong damgo sa usa ka malipayong kinabuhi sa sirkos nalangkit sa mga butang nga temporaryo lamang. Nasaksihan ko nga kadtong kanhi kong mga kaubanan nga nagpadayon sa pagkasirkador nakasinati ug hilabihang kagul-anan. Sa laing bahin, nakaplagan ko ang kinadak-ang bahandi, nga mao ang personal nga relasyon sa akong Maglalalang, si Jehova nga Diyos. Kini nakahatag kanako ug mas labawng kalipay kay sa akong kinabuhi sa sirkos.

Dugang pa, nalipay ko sa pagkakita nga daghan pa ang nahibalo bahin sa kamatuoran sa Bibliya ug nagpahinungod sa ilang kinabuhi sa atong mahigugmaong Diyos, si Jehova. Sa nagtuon pa ko sa Bibliya niadtong 1977, pipila lang ang mga Saksi sa Bulgaria. Bisan niadtong 1991, sa dihang ang mga Saksi ni Jehova unang narehistro human mahugno ang rehimen sa Komunista, diha lamay kapin sa usa ka gatos ka Saksi sa tibuok nasod. Nalipay kaayo kong nakasaksi sa padayong pag-uswag sa gidaghanon sa mga magmamantala sa Gingharian nga miabot na karon ug halos 1,800!

Daghan pa gihapon ang buluhaton sa Bulgaria. Daghan ang nangita sa kamatuoran. Makita kini sa talagsaong gidaghanon nga 3,914 nga mitambong sa Memoryal niadtong 2010. Nalipay ko sa pagpamalandong nga ang  kanhing diyutayng mga Saksi sa Bulgaria gipalambo gayod ni Jehova. Nasaksihan nako nga “ang gamay” nahimong “usa ka gamhanang nasod,” ingon sa gitagna sa Isaias 60:22.

Ang lain pang nakahatag ug dakong kalipay sa akong kinabuhi mao ang pagluwat sa New World Translation of the Holy Scriptures sa pinulongan sa Bulgaria niadtong Agosto 2009 sa “Padayon sa Pagbantay!” nga Distritong Kombensiyon nga gihimo didto sa Sofia. Ang pagluwat sa Bibliya sa kaugalingon kong pinulongan maoy usa ka damgong natinuod! Hinungdanon kaayo kini sa pagtabang sa mas daghan pa nga makahibalo sa kamatuoran sa Bibliya dinhi sa Bulgaria.

Bisan tuod nga sa akong pagkabaldado malimitahan ang akong pagsangyaw sa maayong balita sa Gingharian sa Diyos, malipay ko sa pagpaambit sa kamatuoran sa Bibliya sa akong mga silingan ug kang bisan kinsa nga moadto sa akong balay. Usa ka higayon niana, samtang didto sa balkon, gitawag ko ang usa ka babayeng silingan nga milabay. Siya midayon ug human ko makapaambit kaniya ug makapadasig nga kamatuoran sa Bibliya, siya dihadiha midawat sa akong tanyag nga magtuon mig Bibliya. Nalipay kaayo ko nga sa ulahi siya nabawtismohan ug nahimong Saksi. Nakapribilehiyo ko sa pagtabang ug upat ka tawo sa pagpahinungod sa ilang kinabuhi kang Jehova.

Hilabihan ang akong kalipay ug kadasig sa regular nga pagtambong sa Kristohanong mga tigom uban sa kapin sa usa ka gatos ka igsoon, nga samag pamilya alang kanako. Kay dinhi walay may espesyal nga transportasyon alang sa mga tigulang ug sa mga luya na, malisdan ko sa pagtambong sa mga tigom sa kongregasyon. Apan mapasalamaton ko sa mahigugmaong tabang sa usa ka batan-ong brader. Matag tigom, iya kong kuhaon sa akong apartment ug pasakyon sa iyang awto, ug gikan sa iyang awto dad-on ko niya sa Kingdom Hall, ug balik na pod. Mapasalamaton ko nga nahimong bahin sa usa ka mahigugmaong espirituwal nga pamilya!

Akong nakita nga lahi ra kaayo ang akong kinabuhi sa kon unsay akong gidamgo niadtong batan-on pa ko. Ang pag-alagad kang Jehova nakahatag kanakog kinadak-ang kalipay karon ug usa ka katingalahang paglaom sa umaabot. Akong gipabilhan ang saad sa Diyos nga sa paraisong yuta, “ang bakol mosaka ingon sa laking osa.” (Isaias 35:6) Uban ang bug-os nga pagsalig ako nagpaabot nga nianang adlawa molukso na ko gikan sa akong wheelchair, nga mapasig-uli na sa hingpit nga panglawas ug kahimsog.

[Blurb sa panid 30]

“Hilabihan ang akong kalipay ug kadasig sa regular nga pagtambong sa Kristohanong mga tigom”

[Blurb sa panid 31]

‘Nakahatag ug dakong kalipay sa akong kinabuhi ang pagluwat sa New World Translation of the Holy Scriptures sa pinulongan sa Bulgaria’

[Hulagway sa panid 29]

Nagsugod ko sa pagpasundayag sa sirkos niadtong 15 anyos pa ko