Kahupayan sa mga Dugmok ug Kasingkasing
Pakigsuod sa Diyos
Kahupayan sa mga Dugmok ug Kasingkasing
‘SI Jehova dili gayod mahigugma kanako,’ matod sa usa ka Kristohanong babaye nga dugay nang nag-antos sa depresyon. Siya nagtuong si Jehova halayo ra kaniya. Tinuod bang halayo si Jehova sa iyang mga magsisimba nga tingali nag-antos sa depresyon? Ang makapahupayng tubag makita diha sa inspiradong mga pulong sa salmistang si David nga natala sa Salmo 34:18.
Nasayod si David sa epekto sa tumang kaguol sa matinumanong magsisimba ni Jehova. Ingong batan-on, siya nagkinabuhing kagiw ug kanunayng gigukod ni Saul, usa ka masinahong hari nga determinadong mopatay kaniya. Si David midangop sa dapit nga gituohan niyang dili adtoon ni Saul—ang kaawayng siyudad sa Gat, sa Filistehanong teritoryo. Apan human siya mailhi, si David nagpabuangbuang ug hapit siyang wala makaikyas. Gipasidungog ni David sa Diyos ang iyang kaluwasan, ug iyang gisulat ang Salmo 34 pinasukad sa iyang kasinatian.
Gibati ba ni David nga ang Diyos halayo niadtong nagmagul-anon o mibating dili takos sa Iyang pagtagad? Si David misulat: “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.” (Bersikulo 18) Tan-awon nato kon sa unsang paagi kini naghatag ug kahupayan ug paglaom.
“Si Jehova haduol.” Matod sa usa ka reperensiya, kini nga prase “nagpasiugda nga ang Ginoo matinagdanon ug mabinantayon, nga kanunayng andam motabang ug moluwas sa iyang katawhan.” Makapalipayng masayran nga si Jehova nagabantay sa iyang katawhan. Siya nahibalo sa ilang nasinatian niining ‘makuyawng mga panahon,’ ug siya nasayod sa ilang kahiladman.—2 Timoteo 3:1; Buhat 17:27.
“Niadtong mga dugmok ug kasingkasing.” Sa ubang mga kultura, ang “dugmok ug kasingkasing” nagpasabot sa gugmang hinikawan. Apan matod sa usa ka eskolar, kini nagtumong sa “komon nga kasubo ug kaguol.” Oo, bisan ang matinumanong mga magsisimba sa Diyos usahay makasinatig hilabihang kalisdanan nga makapahugno sa ilang kasingkasing.
“Niadtong mga nahugno sa espiritu.” Ang mga magul-anon tingali mobating makaluluoy kaayo maong sila sa kasamtangan mawad-ag paglaom. Matod sa usa ka reperensiya sa mga maghuhubad sa Bibliya, kining ekspresyona mahimong hubaron nga “niadtong walay sanag nga kaugmaon.”
Unsay gibati ni Jehova niadtong “dugmok ug kasingkasing” ug “nahugno sa espiritu”? Halayo ba siya kanila, nga mobating sila dili takos sa iyang gugma ug pagtagad? Dili gayod! Sama sa mahigugmaong ginikanan nga mogunit ug mohupay sa iyang anak panahon sa kalisdanan, si Jehova haduol sa iyang mga magsisimba nga nagpakitabang kaniya. Siya buot gayod nga mohupay kanila. Siya makahatag kanilag kaalam ug kusog nga gikinahanglan aron makalahutay sila sa bisan unsang pagsulay.—2 Corinto 4:7; Santiago 1:5.
Nganong dili nimo sutaon kon sa unsang paagi mas masuod ka kang Jehova? Kining mabination nga Diyos nagsaad: ‘Ako magapuyo uban sa nahugno ug mapaubsanon sa espiritu, aron buhion pag-usab ang espiritu sa mga mapainubsanon ug aron buhion pag-usab ang kasingkasing sa mga nangahugno.’—Isaias 57:15.
Sugyot nga pagbasa sa Bibliya sa Hunyo:
