Nganong ang Kinabuhi Daw Walay Kahulogan?

NGANONG angayng tuohan nga ang kinabuhi dili kay magpabiling “lumalabay sama sa usa ka anino,” ingon sa gihubit ni Haring Solomon? (Ecclesiastes 6:12, The New English Bible) Ang inspiradong Pulong sa Diyos, ang kasaligang tinubdan sa impormasyon, nagsaad nga ang kinabuhi sa umaabot makahuloganon gayod.—2 Timoteo 3:16, 17.

Gihubit kanato sa Bibliya kon unsay orihinal nga katuyoan sa Diyos alang sa yuta. Gisaysay usab niini kon nganong ang kalibotan karon napuno sa inhustisya, pagdaogdaog, ug pag-antos. Nganong hinungdanon nga masabtan nato kini? Kay ang pangunang hinungdan nga ang mga tawo nagtuong ang kinabuhi wala gayoy kahulogan mao nga sila wala mahibalo, o tinuyong nagsalikway, sa katuyoan sa Diyos alang niining planetaha o sa mga tawong nagpuyo niini.

Unsay Katuyoan sa Diyos Alang sa Yuta?

Gihimo ni Jehova nga Diyos * ang yuta nga hingpit nga paraisong puy-anan alang sa tawo, usa ka dapit diin sila makapahimulos ug hingpit ug malipayong kinabuhi  hangtod sa hangtod. Sukwahi kini sa kasagarang gidawat apan dili Kasulatanhong ideya nga ang Diyos naghimo kono sa yuta ingong sulayanan sa tawo, aron matino kon sila ba takos nga makabatog mas makahuloganong kinabuhi sa dominyo sa mga espiritu.—Tan-awa ang kahon nga  “Kinahanglan ba Kitang Mobiya sa Yuta Aron Makabatog Makahuloganong Kinabuhi?” sa panid 6.

Gihimo sa Diyos ang lalaki ug babaye sumala sa Iyang larawan, nga naghatag kanilag katakos nga makasundog sa kahibulongan Niyang mga hiyas. (Genesis 1:26, 27) Siya naghimo kanila nga hingpit ug gihatagan sa tanan nilang panginahanglan aron makabatog mabungahon ug makahuloganon nga kinabuhi. Kana naglakip sa pagpuno sa yuta ug sa paggahom niini, ug paghimo sa tibuok planeta ingong paraiso sama sa tanaman sa Eden.—Genesis 1:28-31; 2:8, 9.

Unsay Daotang Nahitabo?

Dayag nga diha gayoy daotang nahitabo. Ang katawhan sa katibuk-an wala magpabanaag sa personalidad sa Diyos. Ang yuta karon dili gayod usa ka paraiso. Ngano? Ang atong unang mga ginikanan, si Adan ug Eva, nag-abuso sa ilang kagawasan. Sila buot “mahisama sa Diyos,” nga maoy magdesidir sa ilang kaugalingon sa “maayo ug sa daotan.” Ilang gisunod ang pagkarebelyoso ni Satanas nga Yawa.—Genesis 3:1-6.

Nan, ang pagkadaotan dili gayod bahin sa sekretong plano nga gimbut-an daan sa Diyos. Mitungha kini sa dihang si Satanas, ug sa ulahi si Adan ug Eva, mirebelde sa Diyos. Tungod niini, nawala kanila ang Paraiso ug ang kahingpitan ug kini maoy hinungdan nga makasala ug mamatay usab ang tanan nilang kaliwatan—ang tibuok tawhanong banay. (Genesis 3:17-19; Roma 5:12) Sa ingon, mitungha ang mga kahimtang nga naghimo sa kinabuhi nga daw wala gayoy kahulogan.

Nganong Wala Dayon Paphaa ang Pagkadaotan?

Ang pipila nangutana, ‘Nganong wala man dayon paphaa sa Diyos ang pagkadaotan pinaagi sa paglaglag kang Satanas ug sa ubang mga rebelde ug unya maglalang na usab ug mga tawo?’ Makataronganon ba kana? Unsay imong bation kon patyon dayon sa usa ka gamhanang gobyerno ang bisan kinsa nga maghagit sa awtoridad niini? Dili ba makapaluya kini sa makataronganong mga tawo ug makadaot sa reputasyon sa gobyerno?

Ang Diyos wala maglaglag dayon sa mga rebelde. Iyang gipalabay ang panahon aron bug-os mahusay ang mga isyu nga gipatungha didto sa Eden bahin sa iyang paagi sa pagmando.

Pagpapha sa Tanang Pagkadaotan

Angay kining hinumdoman: Gitugotan sa Diyos ang pagkadaotan sulod lamang sa limitadong panahon kay nasayod man siya nga bug-os niyang mahanaw ang tanang kaalaotan kon mahusay na ang hinungdanong mga isyu nga mitungha tungod sa pagrebelde sa iyang paagi sa pagmando.

Wala kalimti sa Diyos ang iyang katuyoan alang sa yuta ug sa tawo. Pinaagi ni manalagnang Isaias, si Jehova nagpasalig nga Siya mao ang Magbubuhat sa yuta, ang usa “nga wala maglalang niini sa wala lamay kapuslanan, nga nag-umol niini aron pagapuy-an.” (Isaias 45:18) Duol na kaayo niyang ipasig-uli ang kahingpitan sa yuta sumala sa iyang orihinal nga  katuyoan. Kon bug-os na niyang mapamatud-an nga husto ang iyang paagi sa pagmando, makataronganong gamiton niya ang iyang gahom sa pagtuman sa iyang kabubut-on ug sa paglaglag sa tanang pagkadaotan. (Isaias 55:10, 11) Sa iyang modelong pag-ampo, nangamuyo si Jesu-Kristo nga buhaton kini sa Diyos. Siya nagtudlo kanato sa pag-ampo: “Matuman unta ang imong kabubut-on, maingon sa langit, mao man usab sa yuta.” (Mateo 6:9, 10) Unsay lakip niana?

Ang Kabubut-on sa Diyos Alang sa Yuta

Lakip sa iyang kabubut-on mao nga “ang mga maaghop magapanag-iya sa yuta.” (Salmo 37:9-11, 29; Proverbio 2:21, 22) Si Jesu-Kristo ‘magaluwas sa kabos nga nagatuaw alang sa tabang, ingon man sa sinakit.’ Siya magaluwas kanila “gikan sa pagpanglupig ug sa kapintasan.” (Salmo 72:12-14) Wala na unyay gubat, kamatayon, luha, kasakit, o bisan unsang pag-antos. (Salmo 46:9; Pinadayag 21:1-4) Daghan sa mga tawong namatay sa dihang gitugotan sa  Diyos ang pagkadaotan ang pagabanhawon dinhi sa yuta, ug sila hatagag kahigayonan nga mapahimuslan kini ug ang uban pang mga panalangin.—Juan 5:28, 29.

Ngani, hanawon ni Jehova ang tanang kadaot nga gipahinabo sa pagrebelde ni Satanas. Bug-os kining masulbad nga tungod niana “ang kanhing mga kasakit [ang tanang butang nga nagpahinabog kaguol ug kasakit karon] mahikalimtan gayod.” (Isaias 65:16-19) Segurado kanang mahitabo. Ang Diyos dili mamakak. Ang tanan niyang mga saad matuman. Ang kinabuhi dili na unya kay “walay kahulogan, usa ka paghakop sa hangin.” (Ecclesiastes 2:17, Ang Biblia, NCV) Hinunoa, kini matugob na unya sa kahulogan.

Apan komosta karon? Ang pagkahibalo ba kon unsay gitudlo sa Bibliya ug ang pagkasabot sa katuyoan sa Diyos alang sa yuta makahatag ug tinuod nga kahulogan sa imong kinabuhi karon? Hisgotan sa kataposang artikulo niini nga serye kining pangutanaha.

[Footnote]

[Kahon sa panid 6]

 Kinahanglan ba Kitang Mobiya sa Yuta Aron Makabatog Makahuloganong Kinabuhi?

Sa kasiglohan, ang mga tawo nga wala mahibalo sa katuyoan sa Diyos alang sa yuta nagtudlo nga kinahanglan kitang mobiya sa yuta sa dili pa kita makapahimulos ug tinuod nga kalipay.

Ang pipila miingon nga ang mga kalag “nakapahimulos na ug mas maayong kahimtang sa dili pa mosulod sa tagsatagsa ka lawas sa tawo.” (New Dictionary of Theology) Ang uban miingon nga ang kalag “gibilanggo sa lawas ingong silot sa mga sala nga nahimo niini samtang kini diha sa langitnong kahimtang.”—Cyclopedia of Biblical, Theological, and Ecclesiastical Literature.

Ang Gregong mga pilosopo, sama kang Socrates ug Plato, nagtudlo niini nga ideya: Kon ang kalag makagula na sa pisikal nga lawas sa tawo kini usab “mahimuyo na ug mahigawas sa kabuangan ug kahadlok, sa kusganong mga tinguha niini ug sa uban pang mga sakit nga naghasol sa tawo” ug mopuyo na kini “uban sa mga diyos hangtod sa hangtod.”—Plato’s Phaedo, 81, A.

Sa ulahi, ang “mga pangagpas [sa Gregong mga pilosopo] bahin sa pagkadili-mamatay sa kalag” gilakip sa gitawag nga Kristiyanong mga pangulo diha sa ilang mga pagtulon-an.—Christianity—A Global History.

Itandi kini nga mga ideya sa tulo ka kamatuoran nga makaplagan sa Bibliya:

1. Katuyoan sa Diyos nga ang yuta mahimong permanenteng puy-anan sa tawo, dili kay temporaryong dapit nga sulayanan aron matino kon kinsay takos mopuyo uban kaniya didto sa langit. Kon si Adan ug Eva misunod pa sa mga balaod sa Diyos, sila nagkinabuhi pa gihapon unta karon sa paraisong yuta.—Genesis 1:27, 28; Salmo 115:16.

2. Bisag ang kadaghanang relihiyon nagtudlo nga ang tawo adunay kalag—usa ka espirituhanong persona nga nagpuyo sa sulod sa lawas sa tawo—gitudlo sa Bibliya ang usa ka simpleng kamatuoran. Ang tawo maoy “buhing kalag” nga giumol gikan sa “abog sa yuta.” (Genesis 2:7) Wala gayod hisgoti sa Bibliya nga kini nga kalag dili mamatay. Kini nag-ingon nga ang kalag mahimong patyon o malaglag, nga dili na maglungtad sa bug-os. (Salmo 146:4; Ecclesiastes 9:5, 10; Ezequiel 18:4, 20) Ang unang kalag, si Adan, namatay gayod ug mibalik sa abog nga gikan niini siya gilalang. Siya mibalik sa pagkawala-maglungtad.—Genesis 2:17; 3:19.

3. Ang umaabot nga kinabuhi sa tawo nagdepende, dili sa pagkaadunay dili mamatay nga kalag nga mopanaw ngadto sa dominyo sa mga espiritu, apan sa saad sa Diyos sa pagkabanhaw gikan sa mga patay aron mabuhi sa usa ka paraisong yuta.—Daniel 12:13; Juan 11:24-26; Buhat 24:15.