Pakigsuod sa Diyos

“Oh Jehova, . . . Ikaw Nakaila Kanako”

“DILI lalim ang imong bation kon imong masayran nga walay nahingawa o misabot kanimo.” * Gibati mo ba usab kini? Mibati ka ba sukad nga wala gayoy nahingawa o nakasabot sa imong problema? Kon mao, ikaw mahupay niini: Si Jehova nahingawa pag-ayo sa iyang mga magsisimba ug siya nakakita kon unsay nahitabo kanila sa matag adlaw. Ang mga pulong ni David sa Salmo 139 nagpasalig kanato niini.

Kay nasayod nga ang Diyos nahingawa kaniya, si David miingon: “Oh Jehova, ikaw nakasusi kanako, ug ikaw nakaila kanako.” (Bersikulo 1) Gigamit dinhi ni David ang malarawanong pulong. Ang Hebreohanong pulong nga gihubad nga “nakasusi” mahimong magtumong sa pagkalot ug mina (Job 28:3), pagsusig yuta (Maghuhukom 18:2), o pagtino sa mga detalye bahin sa usa ka kaso (Deuteronomio 13:14). Oo, si Jehova nakaila pag-ayo kanato ug nagsusi sa tibuok natong pagkatawo. Pinaagi sa paggamit ug pulong nga “kanako,” gipasiugda ni David nga ang Diyos interesado gayod sa iyang mga alagad. Siya bug-os nagsusi kanila ug nakaila pag-ayo kanila.

Gipasiugda pa ni David ang kabug-os sa pagsusi nga gihimo sa Diyos sa dihang siya miingon: “Ikaw nahibalo sa akong paglingkod ug sa akong pagtindog. Gitagad mo ang akong hunahuna gikan sa halayo.” (Bersikulo 2) Oo, si Jehova atua sa “halayo,” nga nagpuyo sa langit. Apan, siya nahibalo kon kita molingkod, tingali pagkatapos sa tibuok adlaw, ug kon kita mobangon ug mopadayon sa atong inadlawng buluhaton. Siya nasayod usab sa atong mga hunahuna, tinguha, ug mga motibo. Nahadlok ba si David nga siya ginasusi pag-ayo ni Jehova? Wala gayod. Gani siya mismo ang nag-awhag niini. (Bersikulo 23, 24) Ngano?

Si David nasayod nga maayo ang motibo ni Jehova sa pagsusi sa Iyang mga magsisimba. Mao kini gipunting ni David sa dihang siya misulat: “Ang akong pagpanaw ug ang akong paghigda imong nasusi, ug ikaw nasinati sa tanan kong mga dalan.” (Bersikulo 3) Matag adlaw, si Jehova nakakita sa ‘tanan natong mga dalan’—ang atong mga sayop ug maayong mga buhat. Unsay iyang gihatagag pagtagad, ang daotan o ang maayo? Ang Hebreohanong termino nga gihubad nga “nasusi” mahimong magpasabot ug “pag-alig-ig,” o “pagpalid,” sama sa pagpalid sa mag-uuma sa tahop aron mahibilin ang maayong mga lugas. Ang pulong nga “nasinati” maoy hubad sa Hebreohanong pulong nga mahimong magkahulogag “pagpabili.” Sa dihang magsusi sa gisulti ug gibuhat sa iyang mga magsisimba matag adlaw, pabilhan ni Jehova ang maayo. Ngano? Kay sila naningkamot sa pagpahimuot kaniya.

Gipasiugda sa Salmo 139 nga si Jehova may dakong kahingawa sa iyang mga magsisimba. Siya nagsusi ug nagbantay kanila sa matag adlaw nilang pagkinabuhi. Siya nasayod sa ilang mga problema, ug siya nakasabot sa kagul-anan nga ilang giantos. Dili ka ba matukmod sa pagsimba sa maong mahingawaon nga Diyos? Kon mao, ikaw makatino niini: Dili gayod “kalimtan [ni Jehova] ang inyong buhat ug ang gugma nga inyong gipakita alang sa iyang ngalan.”—Hebreohanon 6:10.

Sugyot nga Pagbasa sa Bibliya sa Septiyembre:

▪ Salmo 119-150

[Footnote]