Mga Magbabasa Nangutana . . .

Unsa ang Armagedon?

▪ Alang sa daghan, ang pulong nga “Armagedon” naghulagway sa katibuk-ang kalaglagan pinaagig nukleyar nga gubat, malukpanong kalamidad, o pagkadaot sa kalikopan tungod sa pag-init sa yuta. Sumala sa pagkagamit sa Bibliya, kining pulonga wala magtumong sa bisan hain niana. Nan unsa ang Armagedon diha sa Bibliya?

Ang “Armagedon,” o “Har–Magedon,” makita diha sa basahon sa Pinadayag. Kini nagtumong sa usa ka talagsaong gubat, ang “gubat sa dakong adlaw sa Diyos nga Labing Gamhanan,” diin ang “mga hari sa tibuok gipuy-ang yuta” gitigom alang sa kataposang pakiggubat batok sa Diyos. Gihisgotan usab kini nga gubat diha sa uban pang teksto.—Pinadayag 16:14-16; Ezequiel 38:22, 23; Joel 3:12-14; Lucas 21:34, 35; 2 Pedro 3:11, 12.

Unsay nalangkit niining gubata? Ang basahon sa Pinadayag mahulagwayong nag-asoy kanato: ‘Ang mga hari sa yuta ug ang ilang kasundalohan nagkatigom aron makiggubat sa usa nga nagsakay sa kabayo ug uban sa iyang kasundalohan.’ Kining “usa nga nagsakay sa kabayo” mao ang Anak sa Diyos, si Jesu-Kristo, nga gitudlo sa Diyos aron mangulo sa linibo ka manggugubat nga manulonda aron sa pagbuntog sa mga kaaway sa Diyos. (Pinadayag 19:11-16, 19-21) Ang Jeremias 25:33 nagbutyag kon unsa ka daghang dili-diyosnon ang pagalaglagon: “Ang mga pinatay ni Jehova nianang adlawa maoy gikan gayod sa usa ka tumoy sa yuta hangtod sa laing tumoy sa yuta.”

Nganong kinahanglan ang Armagedon? Ang mga nasod wala moila sa pagkasoberano sa Diyos. Hinunoa, ilang giproklamar ang ilang kaugalingong pagmando. (Salmo 24:1) Kini gihubit diha sa Salmo 2:2: “Ang mga hari sa yuta mibarog ug ang hataas nga mga opisyal naghugpong ingong usa batok kang Jehova ug batok sa iyang dinihogan.”

Kini nga mga rebelde daw samag gahig-ulong mga eskuwater nga dili lang kay nangangkog propidad kondili nagdaot usab niini. Ang mga nasod karon nagdaot sa yuta ug naghugaw sa kalikopan. Gitagna sa Bibliya kini nga kaalaotan, nga nag-ingon: ‘Ang kanasoran nangapungot, ug miabot ang kapungot sa Diyos.’ Ug unya siya ‘maglaglag sa mga nagalaglag sa yuta.’ (Pinadayag 11:18) Ang Armagedon maoy paagi sa Diyos sa pagsulbad sa isyu kon kinsa ang may katungod nga momando sa tanang katawhan.—Salmo 83:18.

Kanus-a mahitabo ang Armagedon? Ang Anak sa Diyos tin-awng nag-ingon: “Mahitungod nianang adlawa ug taknaa walay nahibalo, ni ang mga manulonda sa mga langit ni ang Anak, kondili ang Amahan lamang.” (Mateo 24:36) Bisan pa niana, sa paghisgot bahin niini, ang Manggugubat nga haring si Jesu-Kristo nagdugang niini nga pasidaan: “Tan-awa! Ako moabot ingon sa usa ka kawatan. Malipayon ang usa nga pabiling magatukaw.” (Pinadayag 16:15) Busa, kining tibuok-yutang gubat mahitabo sulod sa presensiya ni Kristo nga nagsugod na sumala sa gipakita sa Bibliya.

Ang laglagon sa Armagedon mao lamang ang mga daotan nga dili magbag-o, ug dunay “usa ka dakong panon” nga makalabang buhi. (Pinadayag 7:9-14) Makita nila ang katumanan niining mga pulonga: “Sa dili na madugay, ug ang daotan mawala na; ug pagasusihon mo gayod ang iyang dapit, ug siya mawala diha. Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”—Salmo 37:10, 11.

[Blurb sa panid 10]

“Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait”