Pagkat-on Gikan sa Pulong sa Diyos

Sa Unsang Paagi Makapili Kitag Maayong mga Higala?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Nganong angay natong pilion pag-ayo ang mga higala?

Kadaghanan kanato gustong dawaton sa uban. Tungod niini, gusto natong sundogon kadtong anaa sa atong palibot. Busa ang atong mga higala dakog impluwensiya sa mga tinamdan nga maugmad sa atong kasingkasing. Nan, ang mga higala nga atong pilion makaimpluwensiya sa atong pagkatawo.—Basaha ang Proverbio 4:23; 13:20.

Ang inspiradong magsusulat sa Bibliya nga si David maalamong nagpili sa iyang mga higala. Siya nakig-uban niadtong mitabang kaniya sa paghupot sa iyang integridad ingong alagad sa Diyos. (Salmo 26:4, 5, 11, 12) Pananglitan, nalipay si David sa iyang pagpakighigala kang Jonatan kay gidasig siya niini sa pagsalig kang Jehova.—Basaha ang 1 Samuel 23:16-18.

2. Sa unsang paagi ka mahimong higala sa Diyos?

Bisag si Jehova labing gamhanan, kita mahimo niyang higala. Pananglitan, si Abraham nahimong higala sa Diyos. Siya misalig ug mituman kang Jehova, busa giisip siya ni Jehova nga higala. (Genesis 22:2, 9-12; Santiago 2:21-23) Kon kita mosalig kang Jehova ug mobuhat sa iyang gisugo kanato, kita mahimo usab niyang higala.—Basaha ang Salmo 15:1, 2.

  3. Sa unsang paagi ka makabenepisyo gikan sa maayong mga higala?

Ang tinuod nga mga higala maunongon ug motabang nimo sa pagbuhat ug matarong. (Proverbio 17:17; 18:24) Pananglitan, bisag si Jonatan lagmit magulang kang David ug 30 anyos ug mao untay manununod sa trono sa Israel, siya maunongong mipaluyo kang David ingong pinili sa Diyos nga mahimong hari. Ang tinuod nga mga higala usab may kaisog sa pagtul-id nimo kon nahiangay. (Salmo 141:5) Ang mga higala nga nahigugma sa Diyos motabang nimo sa pag-ugmad ug maayong batasan.—Basaha ang 1 Corinto 15:33.

Makahimamat kag mga tawo nga nahigugma usab sa pagkamatarong diha sa Kingdom Hall sa mga Saksi ni Jehova. Didto makakaplag kag mga higala nga modasig nimo sa imong paningkamot nga pahimut-an ang Diyos.—Basaha ang Hebreohanon 10:24, 25.

Apan, bisan ang mga higala nga nahigugma sa Diyos makapahigawad usahay kanato. Ayaw dayog kasilo sa ilang mga sayop. (Ecclesiastes 7:9, 20-22) Hinumdomi, walay higala nga hingpit ug ang mga higala nga nahigugma sa Diyos bililhon kanato. Ang Pulong sa Diyos nag-awhag nato nga pasayloon ang kasaypanan sa mga isigka-Kristohanon.—Basaha ang Colosas 3:13.

4. Komosta kon ang mga higala konohay mosupak nimo?

Daghan ang nakasinati nga sa dihang nagsugod sila pagtuon sa Pulong sa Diyos, ang pipila nila ka higala mosupak kanila. Tingali ang maong mga higala wala makasabot sa praktikal nga tambag o sa tinuod nga paglaom nga imong nakat-onan sa Bibliya. Mahimong matabangan nimo sila.—Basaha ang Colosas 4:6.

Sa laing bahin, ang mga higala konohay magbiaybiay sa maayong balita nga anaa sa Pulong sa Diyos. (2 Pedro 3:3, 4) Ang uban magtamay sa imong paningkamot sa pagbuhat ug matarong. (1 Pedro 4:4) Kon mahitabo kana nimo, kinahanglang mamili ka kon kinsay imong higalaon. Kon mopili ka nga mahimong higala sa Diyos, imong gipili ang kinamaayohang higala.—Basaha ang Santiago 4:4, 8.

Alang sa dugang impormasyon, tan-awa ang kapitulo 12 ug 19 niining libroha, Unsay Tinuod nga Gitudlo sa Bibliya?, nga gipatik sa mga Saksi ni Jehova.