DIHA bay butang nga nagustoan kaayo nimo?— a Kon mao, sama ka sa kadaghanang tawo. Apan, angay ka bang mamakak aron lang kana makuha?— Dili gayod. Hakog ang tawo nga mobuhat niana. Atong tan-awon kon sa unsang paagi nadaot ang kinabuhi sa tawong si Gehazi tungod sa kahakog. Siya sulugoon ni Eliseo, usa ka propeta sa matuod nga Diyos, si Jehova.

Si Eliseo ug Gehazi nabuhi dugay na kanhi, mga 1,000 ka tuig una pa matawo sa yuta ang Anak sa Diyos, si Jesus. Gigamit ni Jehova si Eliseo sa paghimog kahibulongang mga butang, o mga milagro. Pananglitan, ang Bibliya naghisgot bahin sa usa ka prominenteng tawo sa kasundalohan sa Sirya kinsa gisanla. Walay makaayo niya, apan mahimo kana ni Eliseo.

Sa dihang gigamit sa Diyos si Eliseo sa pagtabang sa mga tawo nga mamaayo, wala gayod siya modawat ug kuwarta. Nahibalo ka ba kon ngano?— Kay si Eliseo nahibalo nga gikan kang Jehova ang mga milagro, dili sa iyang kaugalingon. Sa dihang naayo si Naaman, nalipay kaayo siya nga gusto niyang hatagan si Eliseo ug bulawan, plata, ug maayong mga besti. Wala kana dawata ni Eliseo, apan gusto kaayo kana ni Gehazi.

Human makabiya si Naaman, si Gehazi miapas nga wala magpahibalo kang Eliseo. Sa dihang naapsan niya si Naaman, nahibalo ka ba kon unsay gisulti ni Gehazi kaniya?— ‘Gipadala ko ni Eliseo aron sultian ka nga may duha ka bisitang  nangabot. Gusto niyang mangayog duha ka besti aron ihatag kanila.’

Apan bakak kana! Si Gehazi naghimohimo rag estorya bahin sa duha ka bisita. Gisulti niya kana kay gusto niyang maiyaha ang mga besti nga ihatag unta ni Naaman kang Eliseo. Siyempre, wala mahibalo niini si Naaman. Busa nalipay siya nga ihatag kang Gehazi ang maong mga gasa. Gani, si Naaman naghatag ug mas labaw pa kay sa gipangayo ni Gehazi. Nahibalo ka ba kon unsay sunod nga nahitabo?—

Sa dihang nakauli na si Gehazi, gipangutana siya ni Eliseo: ‘Diin ka man gikan?’

‘Wala man ko molakaw,’ mitubag si Gehazi. Apan, gipahibalo ni Jehova si Eliseo sa gibuhat ni Gehazi. Busa si Eliseo miingon: ‘Dili kini panahon sa pagdawat ug kuwarta ug mga besti!’

Gikuha ni Gehazi ang kuwarta ug mga besti nga dili iyaha. Busa gipahinabo sa Diyos nga ang sanla ni Naaman motakboy kang Gehazi. Unsa may atong makat-onan niini?— Atong makat-onan nga dili ta angayng maghimohimog estorya.

Nganong naghimohimo mag estorya si Gehazi?— Tungod kay si Gehazi hakog. Gusto niyang makuha ang dili iyaha, ug gibuhat niya kana pinaagig pagpamakak. Ang resulta, nag-antos siyag grabeng sakit sa tibuok niyang kinabuhi.

Sa pagkatinuod, labaw pa sa sanla ang naagoman ni Gehazi. Nahibalo ka ba kon unsa kana?— Nawad-an siya sa pabor ug gugma sa Diyos. Hinaot nga dili gyod ta mobuhat ug bisan unsa nga moresulta niana! Hinunoa, magbinuotan ta ug magmaandam sa pagpaambit sa mga butang nga atong nabatonan.