Sa dili pa ka mohimog bisan unsa, moingon gyod tingali ka, ‘Makabenepisyo ba ko niini?’ Apan, kon mangutana ka niana bahin sa pag-ampo, nagpasabot ba nga kaugalingon ray imong gihunahuna? Wala. Natural lang nga buot natong masayod kon duna ba kanay kaayohan. Bisan ang matarong nga tawong si Job nangutana: “Kon ako motawag kaniya, motubag ba siya kanako?”—Job 9:16.

Sa nag-unang mga artikulo, atong nakita nga ang pag-ampo mas labaw pa kay sa relihiyosong rutina o paagi nga maulian sa gibati. Maminaw gyod sa pag-ampo ang matuod nga Diyos. Siya magpatalinghog kon mag-ampo ta sa hustong paagi ug alang sa hustong mga butang. Gani, iya tang giawhag nga moduol kaniya. (Santiago 4:8) Busa, unsay atong dahomon kon himoon natong bahin sa atong kinabuhi ang pag-ampo? Kini ang pipila sa mga kaayohan.

Kon dunay mga problema ug hagit sa kinabuhi, bation ba nimo ang tumang kabalaka? Nan, gidasig ta sa Bibliya sa “pag-ampo nga walay-hunong” ug ipahibalo ‘sa Diyos ang atong mga pangaliya.’ (1 Tesalonica 5:17; Filipos 4:6) Gipasaligan ta sa Bibliya nga kon moampo ta sa Diyos, “ang kalinaw sa Diyos nga labaw sa tanang panghunahuna magbantay sa [atong] mga kasingkasing ug sa [atong] mga gahom sa pangisip.” (Filipos 4:7) Mobati tag kalinaw kon isulti nato sa atong langitnong Amahan ang atong mga kabalaka. Gani, kini ang iyang pagdasig sa Salmo 55:22, “Itugyan ang imong palas-anon kang Jehova, ug siya magasapnay kanimo.”

Sa tibuok kalibotan, daghan ang nakasinati niini nga kalinaw. Si Hee Ran, taga-South Korea, miingon: “Bisag dagko kog problema, daw mahuwasan ko ug mobating makalahutay dihang mag-ampo ko.” Matod  ni Cecilia nga taga-Pilipinas: “Kay inahan man ko, kanunay kong mabalaka sa akong mga anak nga babaye ug sa akong mama nga di na makaila nako. Pero tungod sa pag-ampo, padayon kong nagkinabuhi nga wa na kaayoy kabalaka. Nahibalo kong tabangan ko ni Jehova aron maatiman sila.”

Naluya ka ba pag-ayo, ug naguol sa usa ka panghitabo o hulga sa kinabuhi? Mahuwasan ka sa gibati kon moampo ka sa “Diyos sa tanang paghupay.” Ang Bibliya nag-ingon nga siya ‘nagahupay kanato sa tanan natong kasakitan.’ (2 Corinto 1:3, 4) Pananglitan, dihang si Jesus naguol pag-ayo, siya “miluhod ug nag-ampo.” Ang resulta? “Usa ka manulonda gikan sa langit nagpakita kaniya ug nagpalig-on kaniya.” (Lucas 22:41, 43) Si Nehemias, nga matinumanon usab, gihulga sa daotang mga tawo nga naningkamot nga  pahunongon siya sa pagbuhat sa buluhaton sa Diyos. Siya miampo: “Karon lig-ona ang akong mga kamot.” Gipakita sa misunod nga panghitabo nga gitabangan gyod siya sa Diyos nga mabuntog ang iyang kahadlok ug molampos sa iyang buluhaton. (Nehemias 6:9-16) Gihubit ni Reginald nga taga-Ghana ang iyang kasinatian sa pag-ampo: “Dihang mag-ampo ko, ilabina kon naa sa tumang kalisod, bation nako nga duna koy gisultihan sa akong problema kinsa makatabang nako ug mopasalig nako nga wa koy angayng kabalak-an.” Oo, ang Diyos makahupay nato kon moampo ta kaniya.

Duna tay mga desisyon nga makaapektar nato ug sa atong mga minahal hangtod sa hangtod. Unsaon nato paghimog maalamong desisyon? Ang Bibliya nag-ingon: “Kon aduna man kaninyoy nakulangan ug kaalam [ilabina sa pagsagubang sa pagsulay], magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy; ug kini igahatag kaniya.” (Santiago 1:5) Kon mag-ampo ta alang sa kaalam, puwedeng gamiton sa Diyos ang iyang balaang espiritu aron giyahan ta sa paghimog maalamong desisyon. Gani, espesipiko tang makapangayog balaang espiritu kay gipasaligan ta ni Jesus nga ang “Amahan sa langit mohatag ug balaang espiritu niadtong nagapangayo kaniya!”—Lucas 11:13.

Bisan si Jesus mibati nga kinahanglang mangayog tabang sa iyang Amahan kon mohimog importanteng mga desisyon. Gibutyag sa Bibliya nga dihang mopili na siyag 12 ka lalaki nga himoon niyang mga apostoles, “siya nagpadayon sa tibuok gabii sa pag-ampo ngadto sa Diyos.”—Lucas 6:12.

Sama kang Jesus, daghan karon ang nadasig dihang sila nagiyahan sa paghimog maalamong mga desisyon human sila mangayog tabang sa Diyos. Matod ni Regina nga taga-Pilipinas, lainlain siyag problema human mamatay ang iyang bana—nagtrabaho siya para sa kaugalingon ug sa pamilya, nawad-ag trabaho, ug naglisod sa pagpadakog mga anak. Unsay nakatabang niya nga mohimog maayong mga desisyon? Siya miingon, “Ako misalig kang Jehova pinaagi sa pag-ampo.” Giasoy ni Kwabena nga taga-Ghana kon nganong nangayo siyag tabang sa Diyos, “Nawad-an kog trabaho sa konstruksiyon nga maayo untag suweldo.” Dihang nagtimbangtimbang kon unsay himoon, siya miingon, “Kanunay kong nag-ampo kang Jehova alang sa giya aron makadesidir kon unsay maayo.” Miingon pod siya, “Gibati gyod nakong gitabangan ko ni Jehova nga mopilig karera nga makatagana sa akong espirituwal ug pisikal nga mga panginahanglan.” Tabangan sab ka sa Diyos kon imong iampo ang bisan unsa nga makaapektar sa imong relasyon kaniya.

Nahisgotan nato ang pipila lang ka kaayohan sa pag-ampo. (Alang sa dugang pananglitan, tan-awa ang kahong “ Mga Kaayohan sa Pag-ampo.”) Apan kinahanglan una nimong ilhon ang Diyos ug ang iyang kabubut-on aron makabenepisyo niini. Kon kana ang imong gusto, gidasig ka namo nga hangyoon ang mga Saksi ni Jehova nga tabangan kang magtuon sa Bibliya. * Kini ang unang lakang aron mas masuod ka sa “Tigpatalinghog sa pag-ampo.”—Salmo 65:2.